နီပေါနိုင်ငံသည် မယုံကြည်နိုင်လောက်အောင် ကြေကွဲဖွယ်ကောင်းသော ဘေးအန္တရာယ်မျိုးနှင့် ရင်ဆိုင်နေရပြီး အာဏာပိုင်များအနေဖြင့် လူရာပေါင်းများစွာ သေဆုံးရသည့် ရေကြီးရေလျှံမှု၏ အတိုင်းအဆ ပမာဏ ကို အပြည့်အဝ အကဲဖြတ်ရန် ရုန်းကန်နေရကြောင်း ဝန်ကြီးချုပ် ဘာလန်ဒရာ ရှားက ပြောကြားခဲ့သည်။
သြဂုတ်လ ၂၆ ရက်နေ့က ကျေးရွာများနှင့် မြို့များသို့ ရေခဲ၊ ကျောက်တုံးများနှင့် အပျက်အစီးအပိုင်းအစများပါဝင်သော လှိုင်းလုံးကြီး ဝင်ရောက်ရိုက်ခတ်မှုကြောင့် တရုတ်နိုင်ငံနယ်စပ်တလျှောက်ရှိ နီပေါနှင့် တိဘက်နှစ်ဖက်စလုံးတွင် လူ ၇၉၇ ဦး ထက်မနည်းသေဆုံးခဲ့သည်။
“မယုံနိုင်လောက်အောင် ကြေကွဲစရာကောင်းတဲ့ သဘာဝဘေးအန္တရာယ်မျိုးနဲ့ ကျွန်တော်တို့နိုင်ငံ ရင်ဆိုင်နေရပါတယ်” ဟု ရှားက သြဂုတ်လ ၃၀ ရက်ညပိုင်းက လူမှုမီဒီယာပို့စ်တစ်ခုတွင် ပြောကြားခဲ့သည်။
ရာဆူဝါရှိ ဘိုတေကိုရှီမြစ်တွင် ကြီးမားသော ရေကြီးရေလျှံမှုကြောင့် လူ့အသက်များ၊ ပိုင်ဆိုင်မှုများနှင့် အခြေခံအဆောက်အဦများ ဆုံးရှုံးရမှုအပြည့်အစုံကို မှတ်တမ်းတင်ရန် အလွန်အခက်အခဲရှိနေသည် ဟု ၎င်းက ဆက်လက်ပြောကြားခဲ့သည်။
“ဆိုးဝါးတဲ့ ရာသီဥတု၊ မြေမျက်နှာပြင်အခြေအနေကြမ်းတမ်းမှုနဲ့ ဆက်လက်ဖြစ်ပွားနေတဲ့ အန္တရာယ်တွေကြောင့် ဒီတာဝန်ဟာ စိန်ခေါ်မှုများစွာရှိနေပေမယ့် နိုင်ငံသားတွေရဲ့ အသက်ကို ကာကွယ်ရမယ်ဆိုတဲ့ သံန္နိဋ္ဌာန်နဲ့ ကျွန်တော်တို့ ရှေ့ဆက်လုပ်ဆောင်နေပါတယ်” ဟု ၎င်းက ပြောကြားခဲ့သည်။
ဘေးအန္တရာယ်အတွင်း တိဘက်၏ ဘာသာရေးနယ်မြေ ကိုင်လာရှ်တောင်တက် ခရီးသွားများနှင့် ဘုရားဖူးများစွာ အပါအဝင် အနည်းဆုံး လူ ၃,၀၄၈ ဦး ပျောက်ဆုံးနေဆဲဖြစ်သည်။
အသက် ၃၆ နှစ်အရွယ် ရက်ပ်ပါ ဘဝမှ နိုင်ငံရေးသမား ဖြစ်လာသူ ဘာလန်ဟု လူသိများသော ရှားသည် လူမှုအသိုင်းအဝိုင်းများနှင့် အရေးကြီးသော အခြေခံအဆောက်အဦများကို ပြန်လည်တည်ဆောက်ရန် ကြီးမားသော တာဝန်နှင့် ရင်ဆိုင်နေရသည်။
Ref: သယ်စထရိတ်တိုင်းမ်စ်