တနင်္သာရီမြစ်ရေ အန္တရာယ်ရေမှတ်ကျော်လွန်ရောက်ရှိခဲ့သဖြင့် ယာယီကယ်ဆယ်ရေးစခန်း ၆ ခုဖွင့်၍ ကူညီကယ်ဆယ်ရေးများ ဆောင်ရွက်နေ

တနင်္သာရီ၊ စက်တင်ဘာ ၂

တနင်္သာရီတိုင်းဒေသကြီး၊ တနင်္သာရီမြို့တွင် ဩဂုတ် ၃၀ ရက်နှင့် ၃၁ ရက်တို့က မိုးသည်းထန်စွာ ရွာသွန်းခဲ့မှုကြောင့် တနင်္သာရီမြစ်ရေသည် စိုးရိမ်ရေမှတ်နှင့် အန္တရာယ်ရေမှတ်တို့ကို ကျော်လွန်ရောက်ရှိခဲ့ကြောင်း သိရသည်။

တနင်္သာရီမြစ်ရေသည် ၂၅ ပေ ၇ လက်မအထိ မြင့်တက်ခဲ့ပြီး မြို့၏ စိုးရိမ်ရေမှတ်ဖြစ်သည့် ၁၇ ပေထက် ၈ ပေ ၇ လက်မနှင့် အန္တရာယ်ရေမှတ်ဖြစ်သည့် ၂၄ ပေထက် ၁ ပေ ၇ လက်မအထိ ကျော်လွန်ခဲ့ခြင်းဖြစ်သည်။

မြစ်ရေမြင့်တက်မှုကြောင့် မြေနိမ့်ပိုင်းနေပြည်သူများကို ဘေးလွတ်ရာသို့ ပြောင်းရွှေ့နိုင်ရန် ယာယီကယ်ဆယ်ရေးစခန်း ၆ ခု ဖွင့်လှစ်ထားရှိပြီး ကမ်းရိုးတန်းဒေသတိုင်းစစ်ဌာနချုပ်မှ နယ်မြေခံတပ်မတော်သားများ၊ ရဲတပ်ဖွဲ့ဝင်များ၊ မီးသတ်တပ်ဖွဲ့ဝင်များ၊ လူမှုကူညီရေးအဖွဲ့များနှင့် ဒေသခံများ ပူးပေါင်း၍ ကူညီကယ်ဆယ်ရေး လုပ်ငန်းများ ဆောင်ရွက်လျက်ရှိသည်။

အဆိုပါ ပူးပေါင်းအဖွဲ့များသည် ကယ်ဆယ်ရေးစခန်းများသို့ စားသောက်ဖွယ်ရာများ ပို့ဆောင်ပေးခြင်းနှင့် အရေးပေါ် ကျန်းမာရေးစောင့်ရှောက်မှုများ အပါအဝင် လိုအပ်သည်များကို အချိန်နှင့်တစ်ပြေးညီ ကူညီပေးနေပြီး တနင်္သာရီတပ်နယ်မှ တာဝန်ရှိသူများကလည်း ကွင်းဆင်းကြည့်ရှုကာ ပေါင်းစပ်ညှိနှိုင်း ဆောင်ရွက်ပေးလျက်ရှိကြောင်း သိရသည်။