တနင်္သာရီတိုင်းဒေသကြီးအတွင်း ဆီအုန်း ဧက ၄ သိန်းကျော် စိုက်ပျိုးထားရှိပြီး ပြည်တွင်းစားသုံးဆီ ဖူလုံရေးနှင့် ကျန်းမာရေးနှင့် ညီညွတ်သည့် စားသုံးဆီများ ရရှိနိုင်ရေးအတွက် ဆီချောစက်ရုံတစ်ရုံ တည်ဆောက်ရန် စီစဉ်ဆောင်ရွက်လျက်ရှိကြောင်း တိုင်းဒေသကြီး စိုက်ပျိုးရေးဦးစီးဌာနမှ သိရသည်။
တနင်္သာရီတိုင်းဒေသကြီးတွင် ဆီအုန်း စိုက်ဧက စုစုပေါင်း ၄,၀၁,၆၀၅ ဧက စိုက်ပျိုးထားရှိပြီး အသီးခူးဧက ၁,၇၃,၉၂၆ ဧကမှ စုစုပေါင်း အထွက်နှုန်း တန်ချိန် ၂,၈၆,၆၄၀ ထုတ်လုပ်နိုင်ခဲ့ကြောင်း သိရသည်။
မြန်မာတစ်နိုင်ငံလုံးတွင် ဆီအုန်းစိုက်ပျိုးခြင်းကို ရေမြေရာသီဥတု ကိုက်ညီသည့် တနင်္သာရီတိုင်းဒေသကြီး တစ်ခုတည်း၌သာ စီးပွားဖြစ် စိုက်ပျိုးနိုင်ခြင်းဖြစ်ပြီး တောင်ပိုင်းဒေသများဖြစ်သည့် ထားဝယ်၊ မြိတ်နှင့် ကော့သောင်း ခရိုင်များအတွင်း ဧက အမြောက်အမြား စိုက်ပျိုးထားခြင်း ဖြစ်သည်။
လက်ရှိတွင် ဒေသတွင်း၌ ထားဝယ်ခရိုင်တွင် ၁ ရုံ၊ ဘုတ်ပြင်းခရိုင်တွင် ၂ ရုံနှင့် ကော့သောင်းခရိုင်တွင် ၂ ရုံ စုစုပေါင်း ဆီကြမ်းစက်ရုံ ၅ ရုံ လည်ပတ်လျက်ရှိသော်လည်း အများပြည်သူ စားသုံးနိုင်သည့် ဆီချောထုတ်လုပ်မှု မပြုလုပ်နိုင်သေးသဖြင့် ကျန်းမာရေးနှင့် ညီညွတ်သော စားသုံးဆီ ရရှိနိုင်ရေး ဆီချောစက်ရုံ တည်ဆောက်ရန် စီစဉ်နေခြင်း ဖြစ်သည်။
ထို့အပြင် ၂၀၂၅-၂၀၂၆ ဘဏ္ဍာနှစ်တွင် ဆီအုန်းစိုက်ဧက ၃,၉၆,၃၉၅ ဧက၊ အသီးခူးဧက ၁,၇၈,၂၃၈ ဧကနှင့် ၁ ဧက လျှင် အထွက်နှုန်း ၃.၄၇ တန် စိုက်ပျိုးထုတ်လုပ်နိုင်ခဲ့ကြောင်းလည်း တိုင်းဒေသကြီး စိုက်ပျိုးရေးဦးစီးဌာန၏ ထုတ်ပြန်ချက်အရ သိရသည်။