နေပြည်တော်ရှိ လွှတ်တော်အဆောက်အအုံ ပြည်သူ့လွှတ်တော်အစည်းအဝေးခန်းမ၌ ဇွန် ၂ ရက်နံနက် ၁၀ နာရီကကျင်းပသည့် တတိယအကြိမ် ပြည်သူ့လွှတ်တော် ဒုတိယပုံမှန်အစည်းအဝေးပထမနေ့တွင် နိုင်ငံတကာဆက်ဆံရေးကော်မတီကို ဖွဲ့စည်းခဲ့ကြောင်း သိရသည်။
အဆိုပါ ကော်မတီအား ရပ်စောက်မဲဆန္ဒနယ်မှ ဒေါက်တာပွင့်ဆန်းကို ဥက္ကဋ္ဌ၊ နန်းယွန်းမဲဆန္ဒနယ်မှ ဦးယောအေးလှကို အတွင်းရေးမှူးအဖြစ်တို့အပါအဝင် အဖွဲ့ဝင် (၁၅) ဦးဖြင့် တာဝန်ပေးဖွဲ့စည်းသွားမည်ဟု ပြည်သူ့လွှတ်တော် ဥက္ကဋ္ဌ ဦးခင်ရီက လွှတ်တော်သို့ တင်ပြခဲ့ကြောင်း သိရသည်။
ထို့နောက် ပြည်သူ့လွှတ်တော်ဒု-ဥက္ကဋ္ဌက နိုင်ငံတကာဆက်ဆံရေးကော်မတီ၏ တာဝန်၊ လုပ်ပိုင်ခွင့်၊ ရပိုင်ခွင့်၊ သက်တမ်းတို့ကို ရှင်းလင်းတင်ပြရာ ပြည်သူ့လွှတ်ဥက္ကဋ္ဌက လွှတ်တော်၏ အတည်ပြုချက်ရယူရာ လွှတ်တော်ကသဘောတူ၍ နိုင်ငံတကာဆက်ဆံရေးကော်မတီ၏ တာဝန်၊ လုပ်ပိုင်ခွင့်၊ ရပိုင်ခွင့်၊ သက်တမ်းတို့ကို လွှတ်တော်ကအတည်ပြုသည်ဟု ကြေညာခဲ့ကြောင်း သိရသည်။
တတိယအကြိမ် ပြည်သူ့လွှတ်တော် ဒုတိယပုံမှန်အစည်းအဝေး ပထမနေ့ကို တက်ရောက်ခွင့်ရှိသည့် ပြည်သူ့လွှတ်တော်ကိုယ်စားလှယ် (၃၅၁) ဦး အနက် (၃၅၀) ဦး တက်ရောက်ခဲ့၍ တက်ရောက်မှုရာခိုင်နှုန်းမှာ (၉၉ ဒသ မ ၇၂) ရှိကြောင်း သိရသည်။