ထိုင်းနိုင်ငံမှာတော့ တစ်လကို လစာနဲ့ ထောက်ပံ့ကြေး စုစုပေါင်း ဘတ် ၁၅,၀၀၀ ပေးမယ့် စေတနာ့ဝန်ထမ်း စစ်မှုထမ်းစနစ်ကို ရှေ့ဆက် အကောင်အထည်ဖော်နေပြီ ဖြစ်ပါတယ်။
မိမိသဘောဆန္ဒနဲ့ စစ်မှုထမ်းချင်သူတွေအတွက် ထိုင်းနိုင်ငံ ကြည်းတပ်က ခေါ်ယူမယ့် “စေတနာ့ဝန်ထမ်း စစ်သည်” အစီအစဉ်အတွက် လျှောက်လွှာတွေကို ၂၀၂၆ ခုနှစ် စက်တင်ဘာလ (၁၀) ရက်နေ့ကနေ ၂၀၂၇ ခုနှစ် ဇန်နဝါရီလ (၂၄) ရက်နေ့အထိ လက်ခံသွားမှာပါ။
ဒီအစီအစဉ်မှာ ပါဝင်သူတွေအနေနဲ့ ဆေးဝါးကုသခွင့်၊ အသက်အာမခံနဲ့ သဘာဝဘေးအန္တရာယ်ဆိုင်ရာ ထောက်ပံ့ကြေးတွေ ရရှိမယ့်အပြင်၊ စစ်ရေးလေ့ကျင့်မှု၊ ပညာရေးနဲ့ အသက်မွေးဝမ်းကျောင်း ကျွမ်းကျင်မှု သင်တန်းတွေကိုပါ ရရှိမှာ ဖြစ်ပါတယ်။ ဒါ့အပြင် တပ်မတော်မှာပဲ ဆက်လက် အသက်မွေးဝမ်းကျောင်း ပြုချင်သူတွေအတွက်ဆိုရင်လည်း ကြည်းတပ် အကြပ်သင်တန်းကျောင်းတွေမှာ သီးသန့်ခွဲတမ်းချပြီး တက်ခွင့်ပေးတာမျိုး၊ အလုပ်ခေါ်ယူရေး ဝင်ခွင့်စာမေးပွဲတွေမှာ အပိုမှတ် ပေးတာမျိုးတွေလို အခွင့်အလမ်းတွေလည်း ပါဝင်ပါတယ်။
မိမိသဘောဆန္ဒနဲ့ စစ်မှုထမ်းချင်ကြတဲ့ စေတနာ့ဝန်ထမ်းစစ်သည်တွေအနေနဲ့ ၄ နှစ်စာချုပ် ချုပ်ဆိုရမှာဖြစ်ပြီး၊ နောက်ထပ်တစ်ကြိမ် သက်တမ်းတိုးခွင့်ရမှာ ဖြစ်တဲ့အတွက် အများဆုံး ၈ နှစ်အထိ တာဝန်ထမ်းဆောင်နိုင်မှာပါ။
ဒီလို မိမိသဘောဆန္ဒနဲ့ စစ်မှုထမ်းချင်သူတွေကို ဆွဲဆောင်ပြီး၊ မဝင်မနေရ စစ်မှုထမ်းစနစ်(မဲနှိုက်ရွေးချယ်တာမျိုး) အပေါ် မှီခိုနေရတာကို တဖြည်းဖြည်း လျှော့ချသွားဖို့ ရည်ရွယ်ပြီး အစိုးရက ဒီ“စေတနာ့ဝန်ထမ်း စစ်သည်”အစီအစဉ်ကို စတင်တာဖြစ်တယ်လို့ သိရပါတယ်။