MWCDF က ပဲခူးတိုင်းအတွင်း ကျေးလက်နေအမျိုးသမီးများ ဖွံ့ဖြိုးတိုးတက်ရေးနှင့် ကျန်းမာရေးစောင့်ရှောက်မှုလုပ်ငန်းများ ဆောင်ရွက်

ပဲခူး၊ စက်တင်ဘာ ၇

မြန်မာနိုင်ငံအမျိုးသမီးများနှင့် ကလေးသူငယ်များဘဝမြှင့်တင်ရေးအသင်း (MWCDF) သည် ပဲခူးတိုင်းဒေသကြီးအတွင်း ကျေးလက်နေအမျိုးသမီးများ၏ လူမှုစီးပွားဘဝ ဖွံ့ဖြိုးတိုးတက်ရေးဆိုင်ရာ ဆွေးနွေးပွဲများ၊ ကျန်းမာရေးအသိပညာပေးခြင်းနှင့် ကျန်းမာရေးစောင့်ရှောက်မှုလုပ်ငန်းများ ဆောင်ရွက်ခဲ့ပြီး ဒေသခံပြည်သူများ၊ ကျောင်းသားကျောင်းသူများနှင့် လူမှုအဖွဲ့အစည်းများအား ထောက်ပံ့လှူဒါန်းမှုများ ပြုလုပ်ခဲ့သည်။

“လုံခြုံလှပဘဝများ အမျိုးသမီးနှင့်ကလေးတိုင်း ရစေသား” ဆောင်ပုဒ်ဖြင့် လူမှုကူညီရေးလုပ်ငန်းများ ဆောင်ရွက်လျက်ရှိသည့် MWCDF အသင်းမှ ဥက္ကဋ္ဌ ဒေါက်တာနန္ဒာမွှန်း ဦးဆောင်သည့် တာဝန်ရှိသူများသည် စက်တင်ဘာ ၇ ရက် မွန်းလွဲပိုင်းတွင် ပဲခူးမြို့နယ်၊ ထုံးကြီးစံပြကျေးရွာသို့ သွားရောက်၍ ဒေသခံရပ်မိရပ်ဖများ၊ ကျေးလက်နေအမျိုးသမီးများနှင့် လူငယ်များအား တွေ့ဆုံခဲ့သည်။

တွေ့ဆုံပွဲသို့ MWCDF အသင်းဥက္ကဋ္ဌ ဒေါက်တာနန္ဒာမွှန်း၊ အတွင်းရေးမှူး ဒေါ်မေမြင့်မောင်၊ ဗဟိုအလုပ်အမှုဆောင်များ၊ MWCDF ပဲခူးတိုင်းဒေသကြီးဥက္ကဋ္ဌနှင့် အဖွဲ့ဝင်များအပြင် ထုံးကြီး၊ ကော့ချဲ၊ မှော်လုံ၊ ကမ်းနီ၊ ကင်းပိုင်ကျုံ၊ ဘုရားငုတ္တို၊ လသာကုန်း စသည့် ကျေးရွာခွဲများမှ ဒေသခံများ တက်ရောက်ခဲ့ကြသည်။

တွေ့ဆုံပွဲတွင် ဒေါက်တာနန္ဒာမွှန်းက အသင်း၏ ရည်ရွယ်ချက်နှင့် လှုပ်ရှားဆောင်ရွက်နေမှုများကို ရှင်းလင်းပြောကြားခဲ့ပြီး ကျေးလက်နေအမျိုးသမီးများ၏ လူမှုစီးပွားဘဝ အထောက်အကူပြုနိုင်ရေးနှင့် ကျန်းမာရေးဆိုင်ရာ အသိပညာဗဟုသုတများ ဖြန့်ဝေပေးခဲ့သည်။

ထို့နောက် လှိုင်သီရိမွန်အထူးကုဆေးခန်းမှ ဆရာဝန်နှင့် သူနာပြုများ၊ ဒေသခံကျန်းမာရေးမှူးနှင့် ကျန်းမာရေးဝန်ထမ်းများက သက်ကြီးရွယ်အိုများ၊ ကိုယ်ဝန်ဆောင်မိခင်များ၊ မသန်စွမ်းသူများနှင့် ဒေသခံပြည်သူများအား ကျန်းမာရေးစစ်ဆေးစောင့်ရှောက်ပေးကာ လိုအပ်သည့် ဆေးဝါးများ ထောက်ပံ့ပေးခဲ့သည်။

MWCDF အသင်းက ဒေသဖွံ့ဖြိုးရေးနှင့် လူမှုကူညီစောင့်ရှောက်ရေးအတွက် ကျေးရွာစာကြည့်တိုက်များသို့ သုတ၊ ရသစာအုပ်များ၊ ကျေးရွာဆေးပေးခန်းအတွက် အလှူငွေနှင့် ဆေးဝါးပစ္စည်းများ လှူဒါန်းခဲ့သည်။ ထို့ပြင် အခြေခံပညာအထက်တန်းကျောင်းမှ ဆရာ၊ ဆရာမ ၇၀ ဦးအတွက် ကျောင်းဝတ်စုံများ ပေးအပ်ခဲ့ပြီး တက္ကသိုလ်ဝင်တန်းတွင် ငါးဘာသာ၊ နှစ်ဘာသာနှင့် တစ်ဘာသာ ဂုဏ်ထူးရရှိခဲ့သည့် ကျောင်းသား၊ ကျောင်းသူများအား ပညာသင်စရိတ်များ ထောက်ပံ့ချီးမြှင့်ခဲ့သည်။

အလားတူ အခြေခံပညာကျောင်းသား၊ ကျောင်းသူ ၁၀၇ ဦးအား ထောက်ပံ့ငွေ၊ စာရေးကိရိယာနှင့် မုန့်များ၊ ကိုယ်ဝန်ဆောင်အမျိုးသမီး ၁၀၂ ဦးအား ထောက်ပံ့ငွေနှင့် အာဟာရဖြည့်စွက်အစားအစာများ၊ မသန်စွမ်းသူ ၁၇ ဦးအား ထောက်ပံ့ငွေ၊ ဆေးဝါးနှင့် အာဟာရဖြည့်စွက်အစားအစာများ၊ အသက် ၈၀ ကျော် သက်ကြီးရွယ်အို ၆၅ ဦးအား အလှူငွေ၊ အားဆေးနှင့် အာဟာရဖြည့်စွက်အစားအစာများ ပေးအပ်လှူဒါန်းခဲ့သည်။ ရပ်ကွက်နှင့် ကျေးရွာ အထောက်အကူပြုအဖွဲ့များကိုလည်း အလှူငွေနှင့် အဝတ်အထည်များ ပေးအပ်ခဲ့သည်။

ထို့မတိုင်မီ စက်တင်ဘာ ၆ ရက် နံနက်ပိုင်းကလည်း ပဲခူးမြို့ မြို့တော်ခန်းမ၌ ကျေးလက်နေအမျိုးသမီးများ ဖွံ့ဖြိုးတိုးတက်ရေးဆိုင်ရာ တွေ့ဆုံဆွေးနွေးပွဲနှင့် ထောက်ပံ့လှူဒါန်းပွဲကို ကျင်းပခဲ့ရာ ကျေးရွာများမှ အမျိုးသမီး ၆၇၅ ဦးအပါအဝင် သက်ဆိုင်ရာအဖွဲ့အစည်းများမှ တာဝန်ရှိသူများ တက်ရောက်ခဲ့ကြသည်။

အဆိုပါဆွေးနွေးပွဲတွင် ဒေါက်တာခင်သီရိ (ပန်းရောင်နှင်းဆီ ရင်သားကင်ဆာဖောင်ဒေးရှင်း) က “ရင်သားကင်ဆာ ဂရုပြုပါ” ခေါင်းစဉ်ဖြင့်လည်းကောင်း၊ ပါမောက္ခဒေါက်တာရင်ရင်ဇော် (ရွှေရောင်နှင်းဆီ ကင်ဆာဖောင်ဒေးရှင်း) က “သားအိမ်ခေါင်းကင်ဆာအကြောင်း သိကောင်းစရာများ” ခေါင်းစဉ်ဖြင့်လည်းကောင်း ရောဂါလက္ခဏာများ၊ ကြိုတင်ကာကွယ်ရေးနှင့် ကုသရေးဆိုင်ရာ အချက်အလက်များကို အသိပညာပေးဟောပြောခဲ့ပြီး တက်ရောက်လာသည့် အမျိုးသမီးများက အုပ်စုများခွဲ၍ ဆွေးနွေးခဲ့ကြသည်။