ခရီးသွားလုပ်ငန်းပိုမိုဖွံ့ဖြိုးတိုးတက်စေရန်ရည်ရွယ်ဆောင်ရွက်နေခြင်းဖြစ်ဟု နိုင်ငံတော်သမ္မတပြော
တစ်ရက်လျှင်ခရီးသွား(၁,၀၀၀)ခန့်ဝင်/ထွက်နိုင်ရန်အတွက် မန္တလေးတိုင်း၊ ပြင်ဦးလွင်မြို့နယ်ရှိ အနီးစခန်းလေဆိပ်အဆင့်မြှင့်တင်နေမှုကို ယနေ့ မေ ၁၇ ရက်တွင် နိုင်ငံတော်သမ္မတက ကြည့်ရှုစစ်ဆေးခဲ့သည်။
” အနီးစခန်းလေဆိပ်ကို အဆင့်မြှင့်တင်ခဲ့တာဟာ ပြည်တွင်းခရီးစဉ်တွေအတွက် ခရီးသွားလုပ်ငန်းပိုမိုဖွံ့ဖြိုးတိုးတက်စေဖို့၊ ပြင်ဦးလွင်ဒေသကထွက်ရှိတဲ့ သစ်သီးတွေနဲ့ ပန်းမန်တွေကို တခြားဒေသတွေဆီ လွယ်ကူလျင်မြန်စွာနဲ့ သယ်ယူပို့ဆောင်နိုင်ဖို့နဲ့ ဒေသဖွံ့ဖြိုးတိုးတက်ဖို့အတွက် အထောက်အကူပြုစေဖို့ရည်ရွယ်ဆောင်ရွက်တာပါ”ဟု နိုင်ငံတော်သမ္မတက ပြောသည်။
ထို့ပြင် လက်ရှိလေဆိပ်အသစ်တည်ဆောက်ထားမှုအရ တစ်ရက်လျှင်ခရီးသွား(၁,၀၀၀)ခန့် ဝင်/ထွက်နိုင်ရန်ဆောင်ရွက်ထား၍ လေဆိပ်အတွင်း ခရီးသွားများနားနေရန် ထိုင်ခုံနေရာချထားမှုများကို စနစ်တကျဆောင် ရွက်ရမည်ဖြစ်ကာ လေယာဉ်ပြေးလမ်းအဆင့်မြှင့်တင်ရာ၌ သတ်မှတ်ထားသည့် စံချိန်စံညွှန်းအတိုင်းဖြစ်စေရန် စနစ်တကျတွက်ချက်တည်ဆောက်အဆင့်မြှင့်တင်ရမည်ဟု ပြောသည်။
ထို့အတူ လေဆိပ်တွင် လေယာဉ်ဆင်းသက်မှုနှင့်ထွက်ခွာမှုများ အန္တရာယ်ကင်းရှင်းစေရေးအတွက် စနစ်တကျဆောင်ရွက်ရန်၊ လေဆိပ်ပတ်ဝန်းကျင်စိမ်းလန်းသာယာမှုရှိစေရေးအတွက် သစ်ပင်များစိုက်ပျိုးရန်လည်း နိုင်ငံတော်သမ္မတကမှာကြားပြီး လေဆိပ်အဆင့်မြှင့်တင်နေမှုများကိုကြည့်ရှုစစ်ဆေးခဲ့သည်။
လေယာဉ်ကွင်းဆိုင်ရာအချက်အလက်များ၊ လေယာဉ်ကွင်းအဆင့်မြှင့်တင်ခြင်းလုပ်ငန်းဆောင်ရွက်လျက်ရှိမှု၊ လေယာဉ်ကွင်းအဆင့်မြှင့်တင်ရာတွင် အရည်အသွေးပြည့်မီမှုရှိစေရေးအတွက်အရည်အသွေးစစ်ဆေး ထိန်းသိမ်းရေးအဖွဲ့ဖြင့် စနစ်တကျဆောင်ရွက်လျက်ရှိမှု၊ လေဆိပ်အဆောက်အဦသစ်တည်ဆောက်ပြီးစီးမှု၊ လေယာဉ်ရပ်နားရန်နေရာသစ်တည်ဆောက်ခြင်းလုပ်ငန်းနှင့် လေဆိပ်အဝင်လမ်းနှင့် လေဆိပ်ဝန်းကျင် အဆင့်မြှင့်တင်လျက်ရှိမှု၊ လေကြောင်းထိန်းမျှော်စင်အ သစ်တည်ဆောက်ပြီးစီးမှုတို့ကို တာဝန်ရှိသူတစ်ဦးက ရှင်းလင်းတင်ပြခဲ့သည်။