ဇူလိုင်လ ၁ရက်နေ့မှစတင်၍ YTV Channel နှင့် Living Myanmar Media Group တို့မှ ပူးပေါင်း၍ “ဒို့ဘိုးဘွားအမွေ မြန်မာဆိုးရိုးစကားတွေ” (Snack Film Festival) ပြိုင်ပွဲအစီအစဉ် ပြုလုပ်လျက်ရှိသည်။
“ပျောက်ကွယ်လုနီးပါးဖြစ်နေပြီဖြစ်တဲ့ တချို့ဆိုရိုးစကားပုံတွေရဲ့ အဓိပ္ပာယ်မှန်ကို မသိကြတော့ ကွဲလွဲနေတာမျိုးတွေရှိတယ်။ စကားလုံးနဲ့ မြန်မာစကား အသုံးအနှုန်းတွေ လူငယ်တွေပြန်ပြီး မှန်မှန်ကန်ကန်သုံးတတ်အောင် ဒီအစီအစဉ်ကို ကျင်းပပြုလုပ်တာပါ” ဟု Living Myanmar Media Group မှတာဝန်ရှိသူတစ်ဦးက ပြောကြားသည်။
မြန်မာစကားပုံများ အဓွန့်ရှည်တည်တံ့စေရန် ရည်ရွယ်ကာ ပြိုင်ပွဲပြုလုပ်ခြင်းဖြစ်ပြီး ယခု ဇူလိုင်လတွင် ရွေးချယ်ပေးထားသော ခေါင်းစဉ််ဖြင့်သာ ယှဉ်ပြိုင်ရမည်ဖြစ်ကြောင်း၊ အဆိုပါစကားပုံနှင့် ပတ်သက်၍ Short Film, Podcast, Tiktok များကို ဖန်တီးရိုက်ကူးရမည်ဖြစ်ပြီး သတ်မှတ်အရည်အသွေးနှင့်ကိုက်ညီသော သရုပ်ဖော် Video ကို ဆုကြေးငွေ ကျပ် (၅) သိန်း ချီးမြှင့်မည်ဖြစ်ကြောင်း သိရသည်။
“ပြိုင်ပွဲဝင်တစ်ဦးက သတ်မှတ်ထားတဲ့ ‘အချိန်နှင့်ဒီရေသည်လူကိုမစောင့်’ နဲ့ ‘အတုမြင်အတတ်သင်’ ဒီ (၂) ခုထဲက (၁)ခုပဲဖြစ်ဖြစ်၊ (၂)ခုလုံးကိုပဲဖြစ်ဖြစ် ကြိုက်သလိုပြိုင်လို့ရတယ်။ နောက်လတွေမှာဆိုရင်တော့ နောက်ခေါင်းစဉ်ပေါ့လေ။ အဓိက,ကတော့ သတ်မှတ်ပေးထားတဲ့ခေါင်းစဉ်နဲ့ပဲပြိုင်ရမှာပါ။ ခေါင်းစဉ် (၁)ခုစီအတွက် Short Film, Podcast, Tiktok တွေထဲက ကိုယ်နှစ်သက်ရာနဲ့ ပြိုင်လို့ရပါတယ်။ ခေါင်းစဉ်တစ်ခုစီအတွက် ဆုတစ်ခုသတ်မှတ်ထားလို့ ခေါင်းစဉ် (၂)ခုဆိုတော့ ဆု (၂)ဆု ရှိပါမယ်” ဟု ၎င်းက ဆက်လက်ပြောကြားသည်။
ပြိုင်ပွဲဝင်များလိုက်နာရန် စည်းကမ်းချက်များမှာ (က) ဆိုရှယ်မီဒီယာတွင် ဖော်ပြမည်ဖြစ်သဖြင့် Tiktok မှအပ အခြားသော ဗီဒီယိုအရှည်သည် ၃ မိနစ်ထက် မများစေရန်၊ (ခ) ပြိုင်ပွဲဝင်ဗီဒီယိုများတွင် ပါဝင်သည့် ရိုက်ကူးတင်ပြချက်များတွင် ဘာသာရေး၊ မြန်မာ့ယဉ်ကျေးမှုနှင့် မဆီလျော်သော အပြုအမူ၊ အပြောအဆိုများ၊ ဥပဒေနှင့်ငြိစွန်းနိုင်သည့် အချက်များ၊ ကလေး သူငယ်များ ကြည့်ရှုရန် မသင့်တော်သည့် အကြောင်းအရာများ မပါဝင်ရန်၊ (ဂ) ပါဝင်ယှဉ်ပြိုင်သူများသည် ယှဉ်ပြိုင်မည့်ဗီဒီယိုများကို ကိုယ်ပိုင် Tiktok နှင့် Facebook Account များတွင်တင်ပြီး ထိုဗီဒီယိုများ၏ Caption တွင် စကားပုံခေါင်းစဉ်နှင့် Living Myanmar Media Group ကို # tag တွဲ၍ တင်ပေးရမည်ဖြစ်ကြောင်း သတ်မှတ်ထားသည်။
အဆိုပါ ပြိုင်ပွဲကို ဇူလိုင်လ ၃၁ ရက်နေ့အထိ နောက်ဆုံးသတ်မှတ်ထားပြီး ဆုရရှိသူများစာရင်းကို ဩဂုတ်လ ပထမပတ်တွင် ကြေညာသွားမည်ဖြစ်ကြောင်းနှင့် သိရှိလိုသည့် အသေးစိတ်အချက်အလက်များကို Living Myanmar Media Group Facebook Page တွင် ဆက်သွယ်မေးမြန်းနိုင်ကြောင်း သိရသည်။
