ဂျပန်တွင် ကွာရှင်းထားသော ဇနီးမောင်နှံများကလေးကို အတူစောင့်ရှောက်ခွင့်ရတော့မည်

ဧပြီလ ၁ ရက်

ဂျပန်နိုင်ငံ၏ တရားမဥပဒေကို အထူးပြင်ဆင်ချက်တစ်ရပ်သည် ဗုဒ္ဓဟူးနေ့တွင် စတင်အသက်ဝင်လာပြီးနောက် ကွာရှင်းထားသော ဇနီးမောင်နှံများသည် ၎င်းတို့၏ ကလေးသူငယ်များကို အတူတကွ စောင့်ရှောက်ခွင့်ရရှိကြတော့မည် ဖြစ်သည်။

၂၀၂၄ ခုနှစ်တွင် လွှတ်တော်က အတည်ပြုခဲ့သော အဆိုပါပြင်ဆင်ချက်မတိုင်မီက ဂျပန်နိုင်ငံသည် G7 နိုင်ငံများအနက် အတူတကွ စောင့်ရှောက်ခွင့် (Joint Custody) ကို ဥပဒေကြောင်းအရ အသိအမှတ်မပြုသည့် တစ်ခုတည်းသော နိုင်ငံဖြစ်ခဲ့သည်။

ယခင်က ကလေးစောင့်ရှောက်ခွင့်ကို မိဘတစ်ဦးဦး (အများအားဖြင့် မိခင်) ထံသို့သာ အပ်နှင်းလေ့ရှိပြီး အဆိုပါမိဘသည် ကျန်ရှိသည့် မိဘတစ်ဦးနှင့် ကလေးအား တွေ့ဆုံခွင့်ကို ဖြတ်တောက်နိုင်သည့် လုပ်ပိုင်ခွင့်ရှိခဲ့သည်။ ဤသို့ တစ်ဦးတည်းစောင့်ရှောက်ခွင့်စနစ်ကြောင့် ကွာရှင်းထားသူ အများအပြားသည် ၎င်းတို့၏ ကလေးများနှင့် အဆက်အသွယ်ပြတ်တောက်သွားရသဖြင့် ဂျပန်ပြည်တွင်းနှင့် နိုင်ငံတကာမှ ဝေဖန်မှုများ မြင့်တက်ခဲ့သည်။

ဥပဒေသစ်အရ မိသားစုတရားရုံးသည် ကွာရှင်းထားသော ဇနီးမောင်နှံများကို တစ်ဦးတည်းစောင့်ရှောက်ခွင့် သို့မဟုတ် အတူတကွစောင့်ရှောက်ခွင့် ပေး၊ မပေးကို ဆုံးဖြတ်နိုင်မည် ဖြစ်သည်။ စနစ်ဟောင်းအရ ကွာရှင်းခဲ့သော မိဘများသည်လည်း ယခုအခါ ၎င်းတို့၏ စောင့်ရှောက်ခွင့် အစီအစဉ်များကို ပြန်လည်သုံးသပ်ပေးရန် တရားရုံးသို့ လျှောက်ထားနိုင်ပြီ ဖြစ်သည်။

ထို့ပြင် တရားမ ကိုဓ ပြင်ဆင်ချက်တွင် ကွာရှင်းပြီးနောက် ကလေးသူငယ် ထောက်ပံ့ကြေးပေးဆောင်ရန်ကိုလည်း ထည့်သွင်းသတ်မှတ်ထားပြီး ကလေးနှင့်အတူ နေထိုင်သည့် မိဘသည် အခြားတစ်ဦးထံမှ တစ်လလျှင် ယန်း ၂၀,၀၀၀ (အမေရိကန်ဒေါ်လာ ၁၂၅ ခန့်) တောင်းခံပိုင်ခွင့် ရှိလာမည် ဖြစ်သည်။

ဤအပြောင်းအလဲများသည် မကြာသေးမီနှစ်များအတွင်း လူပြောများခဲ့သည့် “မိဘကိုယ်တိုင် ကလေးကို ပြန်ပေးဆွဲခြင်း” ဖြစ်စဉ်များကို တားဆီးနိုင်လိမ့်မည်ဟု မျှော်လင့်ရသည်။ ၂၀၂၃ ခုနှစ်တွင် ဂျပန်စားပွဲတင်တင်းနစ် အကျော်အမော် အိုင်ဖူကူဟာရသည် သူ၏ ထိုင်ဝမ်လူမျိုး ခင်ပွန်းဟောင်းထံမှ သားဖြစ်သူကို ခိုးယူသွားသည်ဟု စွပ်စွဲခံခဲ့ရပြီး နောက်ပိုင်းတွင် နှစ်ဦးသဘောတူ ညှိနှိုင်းမှုရရှိခဲ့သည်။ ၂၀၂၁ ခုနှစ် တိုကျိုအိုလံပစ်ကာလတွင်လည်း ပြင်သစ်လူမျိုး ဖခင်တစ်ဦးက သူ၏ဇနီးဟောင်းမှ ကလေးများကို ခိုးယူသွားသည်ဟုဆိုကာ အစာငတ်ခံ ဆန္ဒပြခဲ့သည့် ဖြစ်စဉ်များ ရှိခဲ့သည်။

သို့သော် ဤဥပဒေပြင်ဆင်ချက်ကို စိုးရိမ်မှုများလည်း ရှိနေပြီး အတူတကွ စောင့်ရှောက်ခွင့်သည် အိမ်တွင်းအကြမ်းဖက်မှု ကျူးလွန်ခံရသည့် အမျိုးသမီးများကို ၎င်းတို့၏ ခင်ပွန်းဟောင်းများနှင့် ဆက်သွယ်မှု မဖြစ်မနေ ထိန်းသိမ်းထားရန် ဖိအားပေးသကဲ့သို့ဖြစ်မည်ကို အချို့က စိုးရိမ်လျက်ရှိပေသည်။ သို့ဖြစ်ပါ၍ ဥပဒေသစ်တွင် အိမ်တွင်းအကြမ်းဖက်မှု သို့မဟုတ် ညှင်းပန်းနှိပ်စက်မှု အထောက်အထားများ တွေ့ရှိပါက တရားရုံးအနေဖြင့် တစ်ဦးတည်း စောင့်ရှောက်ခွင့်ကိုသာ ချမှတ်ပေးမည်ဖြစ်ကြောင်း ဖော်ပြထားပါသည်။

Ref: ဘီဘီစီ