ဂါဇာကမ်းမြောင်ဒေသတွင် အပစ်အခတ်ရပ်စဲရေးသည် ဇန်နဝါရီ ၁၉ ရက် ဒေသစံတော်ချိန် နံနက် ၈ နာရီ ၃၀ မိနစ်တွင် အသက်ဝင်မည်ဖြစ်ကြောင်း ကာတာနိုင်ငံခြားရေးဝန်ကြီးဌာန ပြောရေးဆိုခွင့်ရှိသူ မာဂျက် ဘင် မိုဟာမက် အယ်လ်အန်ဆရီ က ပြောကြားသည်။
“သဘောတူညီချက်အရ ဂါဇာကမ်းမြောင်ဒေသမှာ အပစ်အခတ်ရပ်စဲရေးကို ဇန်နဝါရီလ ၁၉ ရက်နေ့ ဒေသစံတော်ချိန် မနက် ၈ နာရီ ၃၀ မိနစ်မှာ စတင်မှာ ဖြစ်ပါတယ်။ ဂါဇာကမ်းမြောင်ဒေသခံတွေ ဒါကိုသတိထားကြဖို့ အကြံပြုထားပါတယ်” ဟု X လူမှုကွန်ရက်တွင် သူက ရေးသားခဲ့သည်။
ကာတာနိုင်ငံ ဝန်ကြီးချုပ်နှင့် နိုင်ငံခြားရေးဝန်ကြီး မိုဟာမက်ဘင် အဗ္ဗဒူရာမန် အယ်လ်-သန်နီက ဒိုဟာ၊ ကိုင်ရိုနှင့် ဝါရှင်တန်တို့၏ ကြားဝင်ဖျန်ဖြေရေး ကြိုးပမ်းမှုများမှတစ်ဆင့် အစ္စရေးနှင့် ဂါဇာအခြေစိုက် ပါလက်စတိုင်း အစွန်းရောက်အဖွဲ့ ဟားမတ်စ်တို့က ဂါဇာတွင် ထိန်းသိမ်းထားသည့် ဓ–ားစာခံများကို လွှတ်ပေးရေးနှင့် အပစ်အခတ်ရပ်စဲရေး သဘောတူညီခဲ့ကြောင်း ဇန်နဝါရီ ၁၅ ရက်က ကြေညာခဲ့သည်။
အပစ်အခတ်ရပ်စဲရေးကနဦး ၄၂ ရက်တာကာလအတွင်း ဟားမတ်စ်တို့သည် အစ္စရေးအကျဉ်းထောင်များမှ ပါလက်စတိုင်းအကျဉ်းသားများနှင့် အပြန်အလှန်လဲလှယ်ခြင်းအားဖြင့် အစ္စရေးစစ်သားနှင့် အရပ်သားအမျိုးသမီး ဓ–ားစာခံ ၃၃ ဦးအပြင် ထိခိုက်ဒဏ်ရာရရှိခဲ့သော အရပ်သားများ၊ က-လေ-းများနှင့် သက်ကြီးရွယ်အိုများကို လွှတ်ပေးမည်ဖြစ်သည်။
ထို့အပြင် အစ္စရေးတို့ကလည်း ဂါဇာနယ်စပ်မှ အနည်းဆုံး မီတာ ၇၀၀ အကွာအထိ ၎င်း၏တပ်ဖွဲ့များကို ရုပ်သိမ်းသွားမည်ဖြစ်ကြောင်း သတင်းရင်းမြစ်တစ်ခုအား ကိုးကား၍ Al Jazeera ရုပ်သံလိုင်းက ဖော်ပြခဲ့သည်။ သဘောတူညီချက်၏ ပထမအဆင့်တွင် နှစ်ဖက်စလုံးက ဂါဇာမှ အစ္စရေးတပ်များ အပြီးအပြတ် ဆုတ်ခွာရေး အပါအဝင် နောက်ဆက်တွဲ စည်းကမ်းချက်များကို ညှိနှိုင်းရန် စီစဉ်ထားသည်။