မေလ၁၈ရက်
တနင်္လာနေ့ အစောပိုင်းက တရုတ်နိုင်ငံ ကွမ်ရှီး ပြည်နယ်တွင် လှုပ်ခတ်ခဲ့သည့် ပြင်းအား ၅.၂ အဆင့်ရှိ ငလျင်ကြောင့် ဟောင်ကောင်ဒေသခံအချို့သည် မြေတုန်ခါမှုကို ခံစားခဲ့ရကြောင်း သတင်းပို့မှု ၁၀ ကြိမ်ထက်မနည်း ရရှိခဲ့သည်ဟု ဟောင်ကောင်မိုးလေဝသစောင့်ကြည့်ရေးစခန်းက ပြောကြားခဲ့သည်။
ငလျင်ခန့်မှန်းချက်များအရ အဆိုပါငလျင်၏ ဗဟိုချက် သည် ဟောင်ကောင်မြို့၏ အနောက်-နောက်မြောက်ဘက် ၅၅၀ ကီလိုမီတာ (၃၄၂ မိုင်) ခန့်အကွာတွင် တည်ရှိပြီး မြေအောက်အနက် ၁၀ ကီလိုမီတာခန့်ကို ဗဟိုပြု၍ လှုပ်ခတ်ခဲ့ခြင်း ဖြစ်သည်။
“ငလျင်စောင့်ကြည့်ရေးစခန်းအနေနဲ့ ဒေသတွင်း မြေတုန်ခါမှု ခံစားရတယ်ဆိုတဲ့ သတင်းပို့မှု ၁၀ ကြိမ်ထက်မနည်း ရရှိခဲ့ပြီး အဲဒီတုန်ခါမှုဟာ စက္ကန့်ပိုင်းလောက်ပဲ ကြာမြင့်ခဲ့ပါတယ်” ဟု တနင်္လာနေ့တွင် ထုတ်ပြန်ခဲ့သည်။ “မူလတွက်ချက်မှုတွေအရ ဒေသတွင်း တုန်ခါမှုအရှိန်နှုန်းဟာ ပြုပြင်မွမ်းမံထားတဲ့ မာဆာလီ အရှိန်နှုန်းစံစကေး အရ အဆင့် ၂ ရှိတာကြောင့် ငြိမ်ငြိမ်သက်သက် နေထိုင်သူတွေ၊ အဆောက်အအုံရဲ့ အထက်ထပ်မှာ ရှိနေသူတွေ ဒါမှမဟုတ် တုန်ခါမှုခံစားရလွယ်တဲ့ အနေအထားမှာ ရှိနေသူတွေပဲ သိသာရိပ်မိနိုင်တဲ့ အဆင့်ဖြစ်ပါတယ်” ဟု ဖြည့်စွက်ပြောကြားခဲ့သည်။
တရုတ်ပြည်မကြီး မီဒီယာများ၏ ဖော်ပြချက်အရ အဆိုပါငလျင်သည် လျိုကျိုးမြို့တွင် လှုပ်ခတ်ခဲ့ခြင်းဖြစ်ပြီး နံနက် ၄ နာရီအထိ ရရှိထားသော စာရင်းများအရ အနည်းဆုံး လူ ၄ ဦး ဆေးရုံတင်ထားရကာ ၃ ဦး ပျောက်ဆုံးနေကြောင်း သိရသည်။
လက်ရှိတွင် ဘေးလွတ်ရာသို့ ရွှေ့ပြောင်းပေးထားရသည့် ဒေသခံပြည်သူ ၇,၀၀၀ ခန့် ရှိသည်။ ငလျင်ဒဏ်သင့်ဒေသရှိ ဆက်သွယ်ရေး၊ လျှပ်စစ်မီး၊ ရေနှင့် ဂတ်စ်ပေးဝေမှုလုပ်ငန်းများနှင့် လမ်းပန်းဆက်သွယ်ရေး ကွန်ရက်များသည် ပုံမှန်အတိုင်း ပြန်လည်လည်ပတ်နေပြီဖြစ်ကြောင်း သိရသည်။
Ref: ဆော့သ်ချိုင်းနားမောနင်းပို့စ်