ကျောက်ဖြူ၊ ဩဂုတ် ၄
ရခိုင်ပြည်နယ်၊ ကျောက်ဖြူမြို့နယ်ရှိ အထူးစီးပွားရေးဇုန် (SEZ) ရေနက်ဆိပ်ကမ်း စီမံကိန်းအတွက် လိုအပ်သည့် ရေသိုလှောင်နိုင်ရန် မဒေးကျွန်းတွင် ကျောက်တန်း (၁) နှင့် ကျောက်တန်း (၂) ရေလှောင်တမံများကို တည်ဆောက်လျက်ရှိကြောင်း ရခိုင်ပြည်နယ် အစိုးရအဖွဲ့ထံမှ သိရသည်။
အဆိုပါ တည်ဆောက်ရေး လုပ်ငန်းခွင်သို့ ရခိုင်ပြည်နယ်ဝန်ကြီးချုပ် ဦးနိုင်ဦးသည် ပြည်နယ်လွှတ်တော် ဒုတိယဥက္ကဋ္ဌ၊ ပြည်နယ်ဝန်ကြီးများနှင့်အတူ ဇူလိုင် ၂၉ ရက်က သွားရောက် ကြည့်ရှုစစ်ဆေးခဲ့သည်။
ယင်းခရီးစဉ်အတွင်း မဒေးကျွန်းရှိ အရှေ့တောင်အာရှ ရေနံနှင့် သဘာဝဓာတ်ငွေ့ ပိုက်လိုင်းစီမံကိန်းမှ ပိုက်လိုင်းများဖြင့် ရေနံနှင့် သဘာဝဓာတ်ငွေ့ ပို့လွှတ်နေမှု၊ လုံခြုံရေးနှင့် မီးဘေးကာကွယ်ရေး အစီအမံများ ဆောင်ရွက်ထားရှိမှု၊ ရေနံတင်သင်္ဘောပေါ်မှ ရေနံများကို သိုလှောင်ကန်များအတွင်းသို့ လွှဲပြောင်းတင်ပို့နေသည့် လုပ်ငန်းစဉ်များကို စစ်ဆေးခဲ့သည်။
ထို့ပြင် ပြည်နယ်ဝန်ကြီးချုပ်နှင့် အဖွဲ့သည် ကျောက်ဖြူမြို့ ပြင်ဖြူမော်ရပ်ကွက်ရှိ ငလပွေ့ ရေငန်တားတာတမံ ကြံ့ခိုင်မှု၊ Parapet တည်ဆောက်ပြီးစီးမှု၊ Solar Dryer Dome တည်ဆောက်ထားရှိမှုနှင့် Gas Turbines များဖြင့် လျှပ်စစ်ဓာတ်အား ဖြန့်ဖြူးပေးနိုင်ရေး ဆောင်ရွက်မည့် နေရာတို့ကိုလည်း လှည့်လည် စစ်ဆေးခဲ့သည်။
ရခိုင်ပြည်နယ် အစိုးရအဖွဲ့အနေဖြင့် ကျောက်ဖြူဒေသ ဖွံ့ဖြိုးတိုးတက်ရေးနှင့် အခြေခံအဆောက်အအုံများ အဆင့်မြှင့်တင်ရေး လုပ်ငန်းများကို ဆက်လက် အကောင်အထည်ဖော် ဆောင်ရွက်လျက်ရှိကြောင်း သိရသည်။
