ဧရာဝတီတိုင်းဒေသကြီး၊ ဟင်္သာတခရိုင်၊ လေးမျက်နှာမြို့နယ်၊ သရက်ချောင်းကျေးရွာအုပ်စု၊ ဂျမ်းကုန်းကျေးရွာအနီး ငဝန်ရေကာတာ တာမိုင် (၂၅/၃) ၌ အောက်ခံမြစ်ကျိုးအင်း သဲကြောမှ ထူးပေါက်၍ တာတမံနိမ့်ကျကာ ရေကျော်စီးဝင်မှု ဖြစ်ပွားခဲ့သဖြင့် ကျေးရွာနှင့် ရပ်ကွက်များမှ ပြည်သူ ၂ သောင်းကျော် ရေဘေးသင့်လျက်ရှိကြောင်း သိရသည်။
အဆိုပါ ရေကျော်စီးဝင်မှုကြောင့် ဩဂုတ် ၄ ရက်နေ့အထိ စာရင်းများအရ ရပ်ကွက် ၅ ရပ်ကွက်နှင့် ကျေးရွာ ၅၇ ရွာမှ အိမ်ခြေ ၅,၀၄၆ လုံး၊ အိမ်ထောင်စု ၅,၁၃၄ စု၊ စုစုပေါင်း လူဦးရေ ၂၁,၄၆၃ ဦး ရေဘေးသင့်ခဲ့ရသည်။
လက်ရှိတွင် ကယ်ဆယ်ရေးစခန်း ၁၃ ခု ဖွင့်လှစ်ထားရှိပြီး အိမ်ထောင်စု ၆၁၀ စုမှ လူဦးရေ ၂,၀၂၃ ဦး လာရောက်ခိုလှုံလျက်ရှိသည်။
ထောက်ပံ့ရေးနှင့် ကယ်ဆယ်ရေး ဆောင်ရွက်မှုများ
ရေဘေးသင့် ပြည်သူများအတွက် ဩဂုတ် ၃ ရက်နေ့အထိ စာရင်းများအရ ခေါက်ဆွဲခြောက်၊ ငါးသေတ္တာ၊ ကြက်ဥ၊ ရေသန့်နှင့် စားနပ်ရိက္ခာ ထောက်ပံ့ငွေ အပါအဝင် စုစုပေါင်းတန်ဖိုး ငွေကျပ် ၁၄၃ ဒဿမ ၄၂၂ သန်းခန့် ထောက်ပံ့ပေးထားပြီးဖြစ်သည်။
ဩဂုတ် ၃ ရက်နေ့ကလည်း ဧရာဝတီတိုင်းဒေသကြီး ဝန်ကြီးချုပ်သည် ရေဘေးသင့်ဒေသများနှင့် ကယ်ဆယ်ရေးစခန်းများသို့ သွားရောက်ကာ ဆန်နှင့် အခြေခံစားသောက်ကုန်များ ထောက်ပံ့ပေးအပ်ခဲ့ပြီး ကျန်းမာရေးစောင့်ရှောက်မှု၊ ဆက်သွယ်ရေးကွန်ရက် မပြတ်တောက်ရေးနှင့် ကယ်ဆယ်ရေးသုံး စက်သုံးဆီ လုံလောက်ရေးတို့ကို ပေါင်းစပ်ညှိနှိုင်း ဆောင်ရွက်ပေးခဲ့သည်။
ကယ်ဆယ်ရေးနှင့် ရွှေ့ပြောင်းရေးလုပ်ငန်းများတွင် တပ်မတော်၊ မြန်မာနိုင်ငံရဲတပ်ဖွဲ့၊ မီးသတ်တပ်ဖွဲ့၊ အထွေထွေအုပ်ချုပ်ရေးဦးစီးဌာန၊ ကြက်ခြေနီ၊ ပြည်သူ့လုံခြုံရေးအဖွဲ့များနှင့် လူမှုရေးအသင်းအဖွဲ့များ ပူးပေါင်း၍ အင်အား ၉၁၆ ဦး၊ လှေမျိုးစုံ ၆၄ စီးနှင့် မော်တော်ယာဉ် ၃၈ စီးတို့ဖြင့် ဆောင်ရွက်လျက်ရှိသည်။
ထို့ပြင် စက်သုံးဆီ လုံလောက်စွာ ရရှိစေရန် ရေနံထွက်ပစ္စည်း ကြီးကြပ်စစ်ဆေးရေးဦးစီးဌာနက ကယ်ဆယ်ရေးသုံး ဖိုက်ဘာလှေနှင့် ပဲ့ထောင်များအတွက် ဓာတ်ဆီ ၅၄၁ ဂါလံ၊ ဒီဇယ်ဆီ ၂၈၀ ဂါလံကို အခမဲ့ ဖြန့်ဝေပေးထားပြီး ဟင်္သာတမြို့ရှိ စက်သုံးဆီအရောင်းဆိုင် ၉ ဆိုင်မှလည်း ကယ်ဆယ်ရေးယာဉ်များအတွက် လိုအပ်သည့် စက်သုံးဆီများကို ရောင်းချပေးလျက်ရှိသည်။
တာပိတ်ဆို့ရေး နည်းပညာရပ်ဆိုင်ရာ ဆောင်ရွက်ချက်များ
နိမ့်ကျသွားသည့် တာပိတ်ဆို့ရေးလုပ်ငန်းများကို စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ဒုတိယဝန်ကြီး ဦးဗိုလ်ဗိုလ်ကျော် ကိုယ်တိုင် ဦးဆောင်၍ အရှိန်အဟုန်မြှင့် ဆောင်ရွက်လျက်ရှိသည်။
တာပိတ်ဆို့ရာတွင် ရေစီးအားလျော့ကျစေရန် မျောတုတ်တန်းရိုက်ခြင်း၊ ဝါးထရံကာခြင်း၊ သဲအိတ်ဖြည့်ခြင်းနှင့် Geobags များ ချထားခြင်းတို့ကို ဆောင်ရွက်လျက်ရှိသည်။
ရေအနက်ပိုင်း (ပေ ၂၀ မှ ၂၄ ပေရှိ နေရာများ)တွင် သစ်သားနှင့် သံထည် စက်လှေဟောင်းများအတွင်း သဲကျောက်ဖြည့်၍ မြုပ်နှံခြင်း၊ Gabion Box များအတွင်း ကျောက်ကြီးများဖြည့်ကာ ညှပ်ပိတ်ခြင်းနှင့် Geobags များ ဝန်းရံထပ်ဆင့်ချခြင်းတို့ကို ဆောင်ရွက်လျက်ရှိသည်။
ရေတိမ်ပိုင်းတွင် မျောတိုင်၊ ဝါးတုတ်တန်း၊ ဝါးထရံနှင့် သဲအိတ်များ အသုံးပြု၍ ယာယီရေထိန်းတာ တည်ဆောက်ခြင်းတို့ကို စက်တပ်ရေယာဉ်များနှင့် ဝန်ချီစက်များအသုံးပြုကာ ဆက်လက်ဆောင်ရွက်လျက်ရှိကြောင်း သိရသည်။