ကျိုက်ထို၊ စက်တင်ဘာ ၁၁
မွန်ပြည်နယ်၊ ကျိုက်ထိုမြို့နယ်ရှိ ကျိုက်ထီးရိုးစေတီတော်မြတ်ကြီး၏ နှစ်စဉ်ကျင်းပမြဲဖြစ်သော ဗုဒ္ဓပူဇနိယပွဲတော်ကြီးကို လာမည့် အောက်တိုဘာ ၂၆ ရက် သီတင်းကျွတ်လပြည့်နေ့တွင် စတင်ကျင်းပသွားမည်ဖြစ်ကြောင်း ဂေါပကအဖွဲ့ထံမှ သိရသည်။
ကျိုက်ထီးရိုး ဗုဒ္ဓပူဇနိယပွဲတော်ကို နှစ်စဉ် သီတင်းကျွတ်လပြည့်နေ့မှ ကဆုန်လပြည့်နေ့အထိ ခုနစ်လတိုင် ကျင်းပလေ့ရှိပြီး ပွဲတော်ကာလအတွင်း အနယ်နယ်အရပ်ရပ်မှ ဘုရားဖူးပြည်သူများ သွားလာရေးအဆင်ပြေစေရန် တောင်တက်မော်တော်ယာဉ် ၁၅၂ စီးဖြင့် ပြေးဆွဲပေးသွားမည်ဖြစ်သည်။
မိုးတွင်းကာလတွင် တောင်တက်မော်တော်ယာဉ်များကို အုပ်စုနှစ်စုခွဲ၍ အလှည့်ကျပြေးဆွဲပေးခဲ့သော်လည်း ပွဲတော်စတင်သည့် သီတင်းကျွတ်လပြည့်နေ့မှစ၍ မော်တော်ယာဉ် ၁၅၂ စီးစလုံး ပုံမှန်ပြန်လည်ပြေးဆွဲပေးသွားမည်ဖြစ်ကြောင်း သိရသည်။
ဘုရားဖူးပြည်သူများ တည်းခိုနေထိုင်ရေးအဆင်ပြေစေရန် ဟိုတယ်နှင့် တည်းခိုဆောင်များအပြင် ဂေါပကအဖွဲ့က တည်ဆောက်ထားသည့် လေးထပ် ရင်ပြင်တော်အခမဲ့တည်းခိုဆောင်ကိုလည်း ဖွင့်လှစ်ပေးထားမည်ဖြစ်သည်။
ထို့အပြင် ဘုရားဖူးများ စိတ်အေးချမ်းသာစွာ ဖူးမြော်နိုင်ရေးအတွက် ရင်ပြင်တော် သန့်ရှင်းသာယာလှပရေး၊ စားသောက်ဆိုင်နှင့် အမှတ်တရပစ္စည်းဆိုင်များ ပုံမှန်ဖွင့်လှစ်နိုင်ရေးတို့ကို စီစဉ်ထားပြီး ကျန်းမာရေးစောင့်ရှောက်မှုပေးနိုင်ရန် ရင်ပြင်တော်ပေါ်၌ ဆေးခန်းတစ်ခုလည်း ဖွင့်လှစ်ပေးထားကြောင်း သိရသည်။