ကာတာအစိုးရမှ လက်ဆောင်ပေးသည့် လေယာဉ်ကို Air Force One အဖြစ် ယာယီအသုံးပြုမည်ဖြစ်ကြောင်း ထရမ့်အတည်ပြု

ကာတာအစိုးရမှ လက်ဆောင်ပေးအပ်သည့် ဇိမ်ခံလေယာဉ်အား Air Force One အဖြစ် ယာယီအသုံးပြုမည်ဖြစ်ကြောင်း သမ္မတ ဒေါ်နယ်ထရမ့်က အတည်ပြုခဲ့သည်။ ထရမ့်၏ဆုံးဖြတ်ချက်သည် ဝါရှင်တန်တွင် ကျင့်ဝတ်နှင့် လုံခြုံရေးဆိုင်ရာ စိုးရိမ်မှုများကို မြင့်တက်စေခဲ့သည်။

“Boeing 747 လေယာဉ်ကို အမေရိကန်လေတပ်/ကာကွယ်ရေးဌာနသို့ ပေးအပ်ခြင်းဖြစ်ပြီး ကျွန်တော့်အတွက် မဟုတ်ပါ။ ကျွန်တော်တို့ နှစ်ပေါင်းများစွာ အကာအကွယ်ပေးခဲ့သည့် ကာတာနိုင်ငံမှ လက်ဆောင်ဖြစ်ပါသည်။ လေယာဉ်အသစ်များ နောက်ကျစွာရောက်ရှိလာသည်အထိ ကျွန်တော်တို့အစိုးရက ယာယီ Air Force One အဖြစ် အသုံးပြုမည်” ဟု ထရမ့်က လူမှုကွန်ရက်ပေါ်တွင် ရေးသားခဲ့သည်။

“ကျွန်တော်တို့ လုပ်ဆောင်ပေးခဲ့မှုအတွက် ကျေးဇူးဆပ်လိုသည့် နိုင်ငံတစ်နိုင်ငံမှ လက်ဆောင်ကို အခမဲ့ရယူနိုင်ပါသည်။ ဤကြီးမားသော ငွေကြေးသက်သာမှုအား အမေရိကန်ကို ပြန်လည်ကြီးပွားစေရန်အတွက် အသုံးပြုမည်။ ဤလက်ဆောင်ကို ငြင်းပယ်မည့်သူမှာ အရူးသာဖြစ်မည်။ ဤကိစ္စကို အာရုံစိုက်မှုအတွက် အားလုံးကို ကျေးဇူးတင်ပါသည်”ဟုလည်း သူက ဆက်လက်ရေးသားခဲ့သည်။

ထရမ့်က အမေရိကန်သည် အခြားနိုင်ငံများ၏ ခေါင်းဆောင်များထက် ပိုမိုအထင်ကရဖြစ်သော လေယာဉ်ရှိသင့်ကြောင်း အစောပိုင်းကပင် ပြောကြားခဲ့သည်။ လက်ရှိ Air Force One လေယာဉ်သည် အခြားနိုင်ငံ့ခေါင်းဆောင်များ၏ လေယာဉ်များထက် “အလွန်သေးသိမ်ပြီး အထင်ကရဖြစ်မှုနည်းသည်ဟု” ဝေဖန်ခဲ့သည်။

ထရမ့်၏ ပထမသက်တမ်းအတွင်း အမေရိကန်အစိုးရသည် အဟောင်းဖြစ်နေသော Air Force One လေယာဉ်ကိုအစားထိုးရန် Boeing 747-8 အသစ် နှစ်စင်းအား ဝယ်ယူရန် သဘောတူညီခဲ့သည်။ မူလက ၂၀၂၄ ခုနှစ်တွင် အားလုံးအပြီးအစီး စီစဉ်ထားသော်လည်း ဤစီမံကိန်းသည် အကြောင်းကြောင်းကြောင့် အကြိမ်ကြိမ် နောက်ကျခဲ့သည်။