ကမ္ဘာ့ဘောလုံးအဖွဲ့ချုပ်(FIFA)၏ လူမှုအကျိုးပြုလုပ်ငန်းကော်မတီဥက္ကဋ္ဌအဖြစ် မြန်မာနိုင်ငံဘောလုံးအဖွဲ့ချုပ်(MFF)ဥက္ကဋ္ဌ၊ အာရှဘောလုံးအဖွဲ့ချုပ်(AFC)အကြီးတန်းဒု-ဥက္ကဋ္ဌ ဦးဇော်ဇော်အား ပြီးခဲ့သည့်ရက်ပိုင်းအတွင်းကကျင်းပခဲ့သော FIFA ကောင်စီအစည်းအဝေးမှ ရွေးချယ်ခန့်အပ်ခဲ့သည်။
ထို့ကြောင့် ဦးဇော်ဇော်သည် FIFA ၏ လူမှုအကျိုးပြုလုပ်ငန်းကော်မတီဥက္ကဋ္ဌတာဝန်အား ယခုနှစ် ၂၀၂၅ ခုနှစ်မှ ၂၀၂၉ ခုနှစ်အထိ တာဝန်ယူသွားမည်ဖြစ်ကာ ဒု- ဥက္ကဋ္ဌအဖြစ် အာဂျင်တီးနားဂန္ထဝင်ကစားသမား Javier Zanetti ကတာဝန်ယူဆောင်ရွက်မည်ဖြစ်ပြီး ကော်မတီအဖွဲ့ဝင်(၂၁)ဦးပါဝင်သည်။
MFF ဥက္ကဋ္ဌဦးဇော်ဇော်သည် AFC ၏ လူမှုရေးရာကော်မတီဥက္ကဋ္ဌနှင့် AFC Dream Asia Foundation ၏ Board of Trustees တစ်ဦးအဖြစ်လည်း ၂၀၂၃ ခုနှစ်မှ ၂၀၂၇ ခုနှစ်အထိတာဝန်ယူဆောင်ရွက်လျက်ရှိကာ အာရှဘောလုံးအဖွဲ့ချုပ်၊ အာဆီယံဘောလုံးအဖွဲ့ချုပ်တို့၏ AFC Dream Asia Award (2013)၊ ASEAN Goodwill Award (2014)၊ ASEAN Goodwill Award (2017)၊ AFC Distinguished Service Award (2024)တို့ကိုလည်း ချီးမြှင့်ခြင်းခံခဲ့ရသူဖြစ်သည်။