ကရင်ပြည်နယ် မြဝတီမြို့နယ် ဒေါနတောင်ခြေ အတွင်းကွင်းကလေးဒေသရှိ ကပေါ်ထော့အထက်တန်းကျောင်းကို ငါးနှစ်ခန့် ပိတ်ထားခဲ့ရပြီးနောက် ၂၀၂၆-၂၀၂၇ ပညာသင်နှစ်တွင် ပြန်လည်ဖွင့်လှစ်နိုင်ရေးအတွက် BGF တပ်ဖွဲ့ဝင်များနှင့် ဒေသခံပြည်သူများ စုပေါင်းရှင်းလင်းရေးလုပ်ငန်းများ ဆောင်ရွက်လျက်ရှိကြောင်း သိရသည်။
ဒေသတွင်း စစ်ရေးပဋိပက္ခများကြောင့် နှစ်ရှည်ပိတ်ထားခဲ့ရသည့် အဆိုပါကျောင်းတွင် ဇွန် ၅ ရက်က BGF အမှတ်(၄) စစ်ဒေသမှူး ဗိုလ်မှူးကြီး စောမုတ်သုန်နှင့် ဗိုလ်မှူး စောထူး ဦးဆောင်သည့် တပ်ဖွဲ့ဝင် ၁၅၀ ကျော်၊ အတွင်းကွင်းကလေး(နို့ဖိုး)၊ အပြင်ကွင်းကလေး(ထိမူထ)နှင့် အတွင်းမဲကနယ်ကျေးရွာများမှ ဒေသခံ ၁၅၀ ကျော်တို့ ပူးပေါင်းကာ သန့်ရှင်းရေးလုပ်ငန်းများ ဆောင်ရွက်ခဲ့ကြသည်။
ရှင်းလင်းရေးလုပ်ငန်းများတွင် ကျောင်းဆောင်များနှင့် စာသင်ခန်းများ သန့်ရှင်းရေးပြုလုပ်ခြင်း၊ စာရေးစားပွဲနှင့် ခုံများ ဆေးကြောသန့်စင်ခြင်း၊ ပေါင်းမြက်နှင့် ခြုံနွယ်များ ရှင်းလင်းခြင်းတို့ကို လူအား၊ စက်အား အသုံးပြု၍ ဆောင်ရွက်ခဲ့ကြောင်း သိရသည်။
ကပေါ်ထော့အထက်တန်းကျောင်းသည် ဒေသတွင်း လုံခြုံရေးအခြေအနေများကြောင့် ငါးနှစ်ခန့် စာသင်ကြားနိုင်ခြင်းမရှိဘဲ ပိတ်ထားခဲ့ရသော်လည်း လက်ရှိတွင် ကျောင်းသား၊ ကျောင်းသူများ ပညာသင်ကြားနိုင်ရေးအတွက် ပြန်လည်ဖွင့်လှစ်ရန် ပြင်ဆင်မှုများ အရှိန်အဟုန်ဖြင့် ဆောင်ရွက်နေကြောင်း ဒေသခံများထံမှ သိရသည်။
ဓာတ်ပုံ- Nay Naw FB