အိန္ဒိယနိုင်ငံ၊ ကာနာတာက ပြည်နယ်၊ ဘင်္ဂလူရူးမြို့ရှိ Bengaluru International Exhibition Centre (BIEC) ၌ (၉) ကြိမ်မြောက် Bengaluru Space Expo 2026 ကို စက်တင်ဘာ ၇ ရက်မှ ၉ ရက်အထိ သုံးရက်ကြာ ကျင်းပလျက်ရှိသည်။
ပြပွဲဖွင့်ပွဲအခမ်းအနားတွင် ဒေသဆိုင်ရာ ရိုးရာအကအလှများဖြင့် ကြိုဆိုဖျော်ဖြေခဲ့ကြပြီး အိန္ဒိယနိုင်ငံ၏ ရိုးရာယဉ်ကျေးမှုနှင့် ခေတ်မီနည်းပညာတို့ကို ပေါင်းစပ်ဖော်ပြသည့် အခမ်းအနား တစ်ရပ်အဖြစ် စိတ်ဝင်စားဖွယ် တွေ့မြင်ရသည်။
အဆိုပါပြပွဲတွင် နိုင်ငံပေါင်း ၂၀ မှ နည်းပညာဆိုင်ရာ အဖွဲ့အစည်းနှင့် ကုမ္ပဏီ ၂၅၀ ကျော် ပါဝင်ပြသ လျက်ရှိပြီး လာရောက်လေ့လာသူ ၁၂,၀၀၀ ခန့် တက်ရောက်မည်ဟု ခန့်မှန်းထားကြသည်။
ထို့အပြင် ပြပွဲတွင် အာကာသနည်းပညာနှင့် ဆက်စပ်သည့် ဟောပြောပွဲများ၊ စကားဝိုင်း ဆွေးနွေး ပွဲများ၊ နည်းပညာနှင့် စီးပွားရေးဆိုင်ရာ ညှိနှိုင်းဆွေးနွေးပွဲများနှင့် B2B စီးပွားရေးချိတ်ဆက်ပွဲများ ကိုလည်း ထည့်သွင်းကျင်းပလျက်ရှိသည်။
ပြပွဲ၌ Indian Space Research Organisation (ISRO)၊ Hindustan Aeronautics Limited (HAL)၊ Dhruva Space၊ Bellatrix Aerospace နှင့် Safran အပါအဝင် အာကာသနှင့် လေကြောင်းနည်းပညာ ဆိုင်ရာ နိုင်ငံတကာကုမ္ပဏီများ၊ ပုဂ္ဂလိကလုပ်ငန်းများနှင့် မိတ်ဖက်အဖွဲ့အစည်းများ ပါဝင်ပြသထား ကြသည်။
HAL ၏ ပြခန်းတွင် အိန္ဒိယ၏ Gaganyaan လူလိုက်ပါအာကာသမစ်ရှင် နှင့် သက်ဆိုင်သည့် နည်းပညာများ၊ အာကာသစနစ်ဆိုင်ရာ မော်ဒယ်များနှင့် PSLV အပါအဝင် ဒုံးပျံနည်းပညာဆိုင်ရာ ပြသမှုများကို တွေ့မြင်နိုင်သည်။ ထို့အပြင် Gaganyaan စီမံကိန်းနှင့်ဆိုင်သည့် နည်းပညာ ဖွံ့ဖြိုးတိုးတက်မှုများကိုလည်း လေ့လာနိုင်သည်။
Dhruva Space ၏ ပြခန်းတွင် မြေပြင်အခြေစိုက် ဂြိုဟ်တုဆက်သွယ်ရေး၊ ဒေတာလက်ခံရယူမှုနှင့် စီမံခန့်ခွဲမှုဆိုင်ရာ A.S.T.R.A.V.I.E.W စနစ်များနှင့် အခြားအဆင့်မြင့် အာကာသနည်းပညာများကို ခင်းကျင်းပြသထားပြီး၊ ဂြိုဟ်တုမြေပြင်စနစ်နှင့် အာကာသအခြေပြု ဝန်ဆောင်မှုများ၏ လက်ရှိတိုးတက်မှုအခြေအနေများကို လေ့လာနိုင်သည်။
Bengaluru Space Expo 2026 သည် အာကာသနည်းပညာကဏ္ဍတွင် အစိုးရနှင့် ပုဂ္ဂလိကအဖွဲ့အစည်းများအကြား ပူးပေါင်းဆောင်ရွက်မှု မြှင့်တင်ရန်၊ နည်းပညာဖလှယ်မှုနှင့် စီးပွားရေးမိတ်ဖက်ဆက်ဆံရေး တိုးချဲ့ရန်၊ အနာဂတ် အာကာသစက်မှုလုပ်ငန်း ဖွံ့ဖြိုးတိုးတက်ရေးကို အထောက်အကူပြုရန် ရည်ရွယ်ကျင်းပခြင်းဖြစ်သည်။
ထို့အပြင် အိန္ဒိယနိုင်ငံတွင် အာကာသနည်းပညာနှင့် ဆက်စပ်ပစ္စည်းများ ထုတ်လုပ်ရာ၌ ပုဂ္ဂလိကကဏ္ဍ၏ ပါဝင်မှု မြင့်တက်လာခြင်းနှင့် နည်းပညာဖွံ့ဖြိုးတိုးတက်မှု အရှိန်အဟုန်ကိုလည်း ယင်းပြပွဲမှတစ်ဆင့် ထင်ရှားစွာ တွေ့မြင်နိုင်သည်။
ပြပွဲသို့ လာရောက်လေ့လာသူများ များပြားစွာ တက်ရောက်လျက်ရှိပြီး၊ အာကာသနည်းပညာ၏ အနာဂတ်ဖွံ့ဖြိုးတိုးတက်မှု အလားအလာများ ကိုလည်း ဖော်ထုတ်ပြသနိုင်သည့် နိုင်ငံတကာအဆင့် ပြပွဲတစ်ရပ်ဖြစ်ကြောင်း သိရသည်။