လျှပ်စစ်ကား (EV) များလမ်း/တံတား အသုံးပြုခွင့်ကို လာမည့် ဧပြီ ၁ ရက်မှစတင်ပြီး ၂၀၂၅ ခုနှစ်အထိ ကင်းလွတ်ခွင့်ပြုသွားမည်ဖြစ်ကြောင်း ဆောက်လုပ်ရေးဝန်ကြီးဌာန၊ လမ်းဦးစီးဌာနမှ ညွှန်ကြားရေးမှူးချုပ် ဦးလှထွန်းဦးက ပေါ်ပြူလာနယူးစ်သို့ အတည်ပြုပြောကြားသည်။
ရန်ကုန်-မန္တလေးအမြန်လမ်းမကြီး အပါအဝင် BOT စနစ်ဖြင့် ဆောင်ရွက်နေသော လမ်းတံတားများအခြားပြည်ထောင်စုလမ်းနှင့် တိုင်းဒေသကြီး/ပြည်နယ်များ လမ်း တံတားအားလုံးတွင် လျှပ်စစ်သုံးယာဉ်များ လမ်းတံတား အသုံးပြုခကို ၁၀၀ ရာခိုင်နှုန်း ဖြေလျော့ပြီး အသုံးပြုခကောက်ခံခြင်းမပြုသည့် အစီအစဉ်အား ယခု လာမည့် ဧပြီ ၁ ရက် မှ ၂၀၂၅ ခုနှစ် မတ်လ ၃၁ ရက်အထိ ကင်းလွတ်ရရှိမည်ဖြစ်ပြီး ယင်းအတွက် ညွှန်ကြားချက်များရရှိထားပြီးဖြစ်ကြောင်း ၎င်းကဆိုသည်။
ကုန်းလမ်းပိုဆောင်ရေးညွှန်ကြားမှုဦးစီးဌာနအနေဖြင့်လည်း ပြည်ပမှ တင်သွင်းလာသည့်မော်တော်ယာဉ်များအပေါ်သတ်မှတ်ကောက်ခံသည့်ပြည်ပတင်သွင်းယာဉ်မှတ်ပုံတင်ခကိုလျှပ်စစ်စွမ်းအားသုံးမော်တော်ယာဉ်များ Battery Electric Vehicle (BEVs) အတွက် ကင်းလွတ်ခွင့်ပြုထားကြောင်း၊ အလားတူ လျှပ်စစ်သုံးမော်တော်ယာဉ်များအပေါ်၂၀၂၃-၂၀၂၅ အထိ ကနဦးမှတ်ပုံတင် သည့် ယာဉ်များအတွက် ၁၀၀ ရာခိုင်နှုန်း ဘီးခွန်ကင်းလွတ်ခွင့်၊ မြို့ဝင်ကြေး၊ လမ်းအသုံးပြုခ၊ တန်ပိုကြေး၊ အရောင်းပြခန်း၊ လုပ်ငန်းလိုင်စင်၊ ညအိပ်ခ၊ ပစ္စည်းခွန် စသည်တို့အပေါ်တွင်လည်း အခွန်အခကင်းလွတ်ခွင့် ပြုသွားမည်ဖြစ်ကြောင်း သိရသည်။
