မြန်မာနိုင်ငံအိုလံပစ်ကော်မတီနှင့် မြန်မာနိုင်ငံအား ကစားမီဒီယာများအဖွဲ့ချုပ်တို့ပူးပေါင်းကျင်းပသည့် ၂၀၂၄ခုနှစ်အတွက် အကောင်းဆုံးအမျိုးသားအား ကစားသမားဆုကို ရဲထွန်းနောင်(ကာယဗလ)မှရရှိခဲ့ကြောင်း သိရသည်။
အဆိုပါ ၂၀၂၄ ခုနှစ်အတွက် အကောင်းဆုံးအားကစားသမား (အမျိုးသား/အမျိုးသမီး)၊ စွမ်းဆောင်ရည်အကောင်းဆုံးအားကစားအဖွဲ့ချုပ်၊ အကောင်းဆုံး အုပ်ချုပ်သူ/နည်းပြဆုများချီးမြှင့်ပွဲကို မေ ၈ ရက်နံနက် ၉ နာရီခွဲက ရန်ကုန်တိုင်း၊ တာမွေမြို့နယ်ရှိ ကျိုက္ကဆံအားကစားကွင်း၌ကျင်းပရာ မြန်မာနိုင် ငံအိုလံပစ်ကော်မတီ ဥက္ကဋ္ဌ၊ အားကစားနှင့်လူငယ်ရေးရာဝန်ကြီးဌာန ပြည်ထောင်စုဝန်ကြီး Jeng Phang နော်တောင်တက်ရောက်ခဲ့သည်။
ထိုသို့ တက်ရောက်ပြီးနောက် နှစ်အလိုက်ထူးချွန်ပြောင်မြောက်သည့် အားကစားသမားများကို ယခု ကဲ့သို့ ရွေးချယ်ဂုဏ်ပြုချီးမြှင့်ပေးနေခြင်းသည် အားကစားသမားများ၏ ယှဉ်ပြိုင်လိုစိတ်ကို အမြဲတမ်းရှင်သန်နိုးကြားစေရန်အတွက်ဖြစ်ကာ မြန်မာနိုင်ငံအိုလံပစ်ကော်မတီအနေဖြင့် အားကစားအဖွဲ့ချုပ်များ၏လိုအပ်ချက်များကို တတ်နိုင်သမျှပံ့ပိုးပေးသွားမည်ဟု ပြောသည်။
ထို့ကြောင့် မြန်မာနိုင်ငံအားကစားအဖွဲ့ချုပ်များမှတာဝန်ရှိသူများ၊ အုပ်ချုပ်သူ/နည်းပြများ၊ အားကစားသမားများအနေဖြင့် နိုင်ငံ့ဂုဏ်ဆောင်နိုင်ရန် ခိုင်မြဲသည့်ယုံကြည်ချက်၊ မှန်ကန်သည့်မျှော်မှန်းချက်၊ နည်းစနစ်မှန်မှန်ဖြင့် စိတ်ဓာတ်၊ ဇွဲ၊ လုံ့လများနှင့်အောင်မြင်မှုများကို စဉ်ဆက်မပြတ်ဆွတ်ခူးရယူနိုင်ရေးအတွက် အစွမ်းကုန်ကြိုးပမ်းကြရမည်ဟု တိုက်တွန်းမှာကြားခဲ့သည်။
ထို့နောက် ပြည်ထောင်စုဝန်ကြီးက ၂၀၂၄ ခုနှစ်အတွက် အကောင်းဆုံး အမျိုးသားအားကစားသမားဆုရရှိသော ရဲထွန်းနောင်(ကာယဗလ)အား ဂုဏ်ပြုလက်မှတ်နှင့် ဂုဏ်ပြုဆုငွေကျပ်သိန်း(၂၀)၊ ရန်ကုန်မြို့တော်ဝန် ဦးဗိုလ်ဌေးက ၂၀၂၄ ခုနှစ်အတွက် အကောင်းဆုံးအမျိုးသမီးအားကစားသမားဆုရရှိသူ ဝင်းဝင်းထွေး (လှေလှော်)အား ဂုဏ်ပြုလက်မှတ်နှင့် ဂုဏ်ပြုဆုငွေကျပ်သိန်း(၂၀)တို့ကို ပေးအပ်ချီးမြှင့်ခဲ့သည်။
ထို့အတူ ရန်ကုန်တိုင်းအစိုးရအဖွဲ့ လူမှုရေးရာဝန်ကြီးဦးဌေးအောင်က ၂၀၂၄ ခုနှစ်အတွက် အကောင်းဆုံးအုပ်ချုပ်သူဆုရရှိသူ ဦးသက်လွင်(လှေလှော်)အား ဂုဏ်ပြုလက်မှတ်နှင့် ဂုဏ်ပြုဆုငွေကျပ်(၁၀)သိန်း၊ ရန်ကုန်တိုင်းအစိုးရအဖွဲ့ တိုင်းရင်းသားရေးရာဝန် ကြီးဦးစောဂျက်ကော့ထူးက ၂၀၂၄ ခုနှစ်အတွက် အကောင်းဆုံးနည်းပြဆုရရှိသူ ဦးဘုန်းမြင့်တေဇာ (လှေလှော်) အား ဂုဏ်ပြုလက်မှတ်နှင့် ဂုဏ်ပြုဆု ငွေကျပ်(၁၀)သိန်းနှင့် မြန်မာနိုင်ငံ အားကစားမီဒီများအဖွဲ့ချုပ်ဥက္ကဋ္ဌဦးဉာဏ်ထွန်းက ၂၀၂၄ ခုနှစ်အတွက် စွမ်းဆောင်ရည်အကောင်းဆုံးအားကစားအဖွဲ့ချုပ်ဆုရရှိသော ဥက္ကဋ္ဌဦးသောင်းထိုက်မင်း(လှေလှော်အဖွဲ့ချုပ်)အား ဂုဏ်ပြုမှတ်တမ်းလွှာတို့ကို အသီးသီးပေးအပ်ချီးမြှင့်ခဲ့ကြသည်။
ထို့ပြင် လာမည့် သြဂုတ်လအတွင်း၌ တရုတ်နိုင်ငံ ချန်ဒူးမြို့၌ကျင်းပမည့် World Games ပြိုင်ပွဲသို့ သွားရောက်ယှဉ်ပြိုင်မည့် မြန်မာလှေလှော် အားကစားအဖွဲ့၏ အသွား/အပြန် လေယာဉ်ခရီးစရိတ်အတွက် ငွေကျပ်သိန်း(၃၅၀)ကို Trusty Pay Company မှ ပေးအပ်လှူဒါန်းရာ ပြည်ထောင်စုဝန်ကြီးက လက်ခံရယူခဲ့သည်။