နစ်ကိုးကစ်ဒ်မင်းနှင့် ကိတ်သ် အာဘန်တို့သည် အိမ်ထောင်သက် နှစ် ၂၀ နီးပါးအကြာတွင် လမ်းခွဲလိုက်ကြပြီဖြစ်သည်။
သူတို့နှစ်ဦး လမ်းခွဲသည့် သတင်းကို တနင်္လာနေ့ညပိုင်းတွင် Variety သတင်းဌာနက အတည်ပြုဖော်ပြခဲ့ပြီး အမည်မဖော်လိုသည့် သတင်းရင်းမြစ်တစ်ခုက “တစ်ခါတလေမှာ အိမ်ထောင်ရေးတွေက သူတို့လမ်း သူတို့လျှောက်ကြပါပဲ” ဟု နူးယော့ခ်ပို့စ်ကို ပြောကြားခဲ့သည်။
အသက် ၅၈ နှစ်အရွယ် သြစတြေးလျသရုပ်ဆောင်နှင့် ၅၇ နှစ်အရွယ် ကန်ထရီးဂီတ အဆိုတော်တို့သည် ဇွန်လကတည်းက ခွဲနေခဲ့ခြင်းဖြစ်သည်ဟု ဖျော်ဖြေရေးဝက်ဘ်ဆိုက် TMZ က ဆိုသည်။
ဇွန်လတွင် ကစ်ဒ်မင်သည် သူတို့၏ မင်္ဂလာနှစ်ပတ်လည်အဖြစ် သူနှင့် အာဘန်တို့နှစ်ယောက်တွဲဓာတ်ပုံကို အင်စတာဂရမ်တွင် တင်ခဲ့သည်။
အာဘန်သည် သူတို့နှစ်ဦး နေထိုင်ရာ Nashville ရှိ နေအိမ်မှထွက်သွားခဲ့ပြီဟု ယုံကြည်ရကာ ကစ်ဒ်မင်းအနေဖြင့် သူတို့၏ အိမ်ထောင်ရေးမပြိုကွဲစေရန် အသည်းအသန်ကြိုးစားနေသည်ဟု သတင်းများက ဆိုသည်။
“သူက ဒါမျိုး မဖြစ်ချင်ပါဘူး။ အိမ်ထောင်ရေးမပြိုကွဲဖို့ သူကြိုးစားနေခဲ့တယ်” ဟု အခြားသတင်းရင်းမြစ်တစ်ခုက People မဂ္ဂဇင်းကို ပြောခဲ့သည်။ သူတို့ဇနီးမောင်နှံတွင် ဆန်းဒေးရို့စ်( ၁၇ နှစ်)၊ ဖိတ်သ် မာဂရက်(၁၄ နှစ်) အမည်ရ ကလေးနှစ်ဦးရရှိထားသည်။
ကစ်မင်းနှင့် အာဘန်တို့သည် ၂၀၀၅ ခုနှစ် ဇန်နဝါရီလက နှစ်စဉ်ကျင်းပသည့် G’Day USA gala တွင် တွေ့ဆုံခဲ့ကြပြီး တစ်နှစ်နီးပါးအကြာ ၂၀၀၆ ခုနှစ် ဇွန်လတွင် ဆစ်ဒ်နီ၌ လက်ထပ်ခဲ့ကြသည်။
ကစ်ဒ်မင်းသည် ယခင်အိမ်ထောင်ဖြစ်သော မင်းသာတွမ်ခရုစ်နှင့် ၁၉၉၀ ခုနှစ်မှ ၂၀၀၁ ခုနှစ်အထိ လက်တွဲခဲ့သည်။ သူနှင့် ခရုစ်တို့တွင် ဘယ်လာ (၃၂ နှစ်) နှင့် ကွန်နာ (၃၀ နှစ်) ကလေးနှစ်ဦး ရရှိခဲ့သည်။
Ref: သည်ဂါဒီးယန်း