အီရန်နိုင်ငံအနေနဲ့ အမေရိကန်ပြည်ထောင်စုနဲ့ နားလည်မှုစာချွန်လွှာ လက်မှတ်ရေးထိုးတာဟာ “ခြွင်းချက်မရှိ လက်နက်ချတာပဲ”လို့ အမေရိကန်သမ္မတ ဒေါ်နယ်ထရန့်က ယုံကြည်နေကြောင်း Axios သတင်းဝက်ဘ်ဆိုက်က ဖော်ပြခဲ့ပါတယ်။
Axios နဲ့ ပြုလုပ်ခဲ့တဲ့ သီးသန့်အင်တာဗျူးတစ်ခုမှာ ထရန့်က အီရန်နဲ့ချုပ်ဆိုတဲ့ နားလည်မှုစာချွန်လွှာဟာ “ခြွင်းချက်မရှိ လက်နက်ချတာမျိုး ဖြစ်ဖို့များပါတယ်” လို့ ပြောကြားခဲ့တာပါ။ သတင်းထောက်တစ်ဦးက ‘သမ္မတကြီးအနေနဲ့ အရင်တုန်းက အီရန်ဆီကနေ “ခြွင်းချက်မရှိ လက်နက်ချဖို့” တောင်းဆိုသွားမယ်လို့ ပြောခဲ့ဖူးပေမဲ့ အခုလို နှစ်ဖက်စလုံးက နားလည်မှုစာချွန်လွှာ လက်မှတ်ရေးထိုးလိုက်တာကျတော့ အဲဒါနဲ့ ဆန့်ကျင်ဖက်ရလဒ်မျိုး ဖြစ်မနေဘူးလား’ လို့ ထောက်ပြခဲ့တဲ့အပေါ် သူက အခုလို ပြန်လည်တုံ့ပြန်ခဲ့တာ ဖြစ်ပါတယ်။
“စစ်ရေးအရတော့ ကျွန်တော်တို့ သူတို့ကို အပြတ်အသတ် အနိုင်ယူခဲ့တာပါ” လို့ ထရန့်က မှတ်ချက်ပြုခဲ့ပြီး၊ ဒီစစ်ပွဲဟာ အမေရိကန်ရဲ့ စစ်အင်အား ဘယ်လောက်တောင့်တင်းလဲဆိုတာကို လက်တွေ့ပြသနိုင်ခဲ့တယ်လို့ ထည့်သွင်းပြောဆိုခဲ့ပါတယ်။
“ဒီလိုမျိုး ပိတ်ဆို့မှုကို ဘယ်သူက လုပ်နိုင်ဦးမှာလဲ။ ကျွန်တော် ရေတပ်နဲ့ ပိတ်ဆို့ထားတုန်းက သင်္ဘောတစ်စီးမှ ဖြတ်သွားလို့မရခဲ့ဘူး။ တချို့ ဖြတ်ဖို့ကြိုးစားကြပါသေးတယ်၊ ဒါပေမဲ့ ကြာကြာမခံပါဘူး” လို့ အမေရိကန်သမ္မတက ပြောပါတယ်။
ဒီပဋိပက္ခရဲ့ ရလဒ်ကြောင့် သူ့အနေနဲ့ စစ်အင်အားသုံးနိုင်စွမ်းအပေါ် ကန့်သတ်ချက်တွေ ရှိနေတယ်ဆိုတာကို သတိထားမိလားလို့ မေးမြန်းတဲ့အခါမှာတော့ ထရန့်က “ဘာကန့်သတ်ချက်မှ မရှိပါဘူး” လို့ ပြန်လည်ဖြေကြားခဲ့ပါတယ်။
အမေရိကန်နဲ့ အစ္စရေးတို့ဟာ ပြီးခဲ့တဲ့ ဖေဖော်ဝါရီ ၂၈ ရက်နေ့က အီရန်နိုင်ငံအပေါ် စစ်ပွဲစတင်ဆင်နွှဲခဲ့တာ ဖြစ်ပါတယ်။ ပါကစ္စတန်နိုင်ငံက ကြားခံစေ့စပ်ညှိနှိုင်းပေးသူအဖြစ် ဆောင်ရွက်ခဲ့ပြီး၊ ဝါရှင်တန်နဲ့ တဟီရန်တို့အကြား အရှေ့အလယ်ပိုင်းပဋိပက္ခကို အဆုံးသတ်ဖို့ ရည်ရွယ်တဲ့ သဘောတူညီချက်တစ်ခု ရရှိသွားပြီဖြစ်ကြောင်း အမေရိကန်၊ အီရန်နဲ့ ပါကစ္စတန် တာဝန်ရှိသူတွေက ဇွန် ၁၄ ရက်နေ့မှာ အတည်ပြုခဲ့ကြပါတယ်။
အီရန် ဒုတိယနိုင်ငံခြားရေးဝန်ကြီး ခါဇမ် ဂါရီဘာဘာဒီရဲ့ ပြောကြားချက်အရ ရက် ၆၀ အပစ်အခတ်ရပ်စဲထားစဉ်အတွင်း နှစ်ဖက်စလုံးက တခြားကိစ္စရပ်တွေအပြင် အီရန်ရဲ့ နျူကလီးယားအစီအစဉ်ကိုပါ ဆွေးနွေးသွားကြမှာ ဖြစ်ပါတယ်၊ အီရန်အပေါ် အမေရိကန်ရဲ့ ရေကြောင်းပိတ်ဆို့မှုဟာလည်း ဇွန် ၁၅ ရက်နေ့မှာ ကုန်ဆုံးမှာဖြစ်ပြီး လက်ဘနွန်အပါအဝင် စစ်မျက်နှာအားလုံးမှာ စစ်ရေးလှုပ်ရှားမှုတွေကို ချက်ချင်းနဲ့ အပြီးတိုင် ရပ်တန့်သွားမှာ ဖြစ်ပါတယ်။ အမေရိကန်သမ္မတ ဒေါ်နယ်ထရန့်ကတော့ အီရန်နဲ့ နားလည်မှုစာချွန်လွှာ လက်မှတ်ရေးထိုးခဲ့တာကို ဇွန် ၁၇ ရက်နေ့မှာ အတည်ပြုခဲ့ပါတယ်။