အမေရိကန်စစ်တပ်က အီရန်ရဲ့ ပင်လယ်ဆိပ်ကမ်းတွေကို ပိတ်ဆို့ခဲ့တာဟာ ဗုံးကြဲတိုက်ခိုက်တာထက် ပိုပြီးထိရောက်မှုရှိခဲ့တယ်လို့ အမေရိကန်သမ္မတ ဒေါ်နယ်ထရမ့်က အိမ်ဖြူတော်မှာ သတင်းထောက်တွေကို ပြောကြားခဲ့ပါတယ်။ လိုအပ်လာရင် ဒီလိုဗျူဟာမျိုးကို အမြန်ဆုံးပြန်သုံးဖို့ အမေရိကန်အစိုးရအနေနဲ့ အသင့်ရှိနေတယ်လို့လည်း ဆိုပါတယ်။
“ကျွန်တော့်အမြင်တော့ ဆိပ်ကမ်းပိတ်ဆို့လိုက်တာက ဗုံးတွေကြဲချတာထက် ပိုပြီးသက်ရောက်မှုရှိတယ်” လို့ အမေရိကန်ခေါင်းဆောင်က ပြောပါတယ်။ “ဒီအစီအစဉ်ကို ၁၅ မိနစ်အတွင်းမှာတင် ပြန်ပြီး စီစဉ်ပိတ်ဆို့နိုင်တယ်” လို့လည်း သူက မှတ်ချက်ပြုခဲ့ပါတယ်။
ဒါ့အပြင် ထရမ့်က အိမ်ဖြူတော်မှာရှိနေတဲ့ အမေရိကန်ကာကွယ်ရေးဝန်ကြီး ပိထ် ဟက်ဆက်သ် ကို ဆိပ်ကမ်းပိတ်ဆို့မှုကို တကယ်ပဲ အမြန်ပြန်လုပ်နိုင်လားလို့ လှမ်းမေးခဲ့ပါသေးတယ်။ ပင်တဂွန်စစ်ဌာနချုပ် အကြီးအကဲကတော့ လိုအပ်လာရင် အမေရိကန်စစ်တပ်အနေနဲ့ ချက်ချင်းအရေးယူဆောင်ရွက်ဖို့ အသင့်ပဲလို့ ပြန်လည်ဖြေကြားခဲ့ပါတယ်။