ဇူလိုင် (၁) ရက်မှစတင်ပြီး အိမ်အရောက်ပို့စနစ်ဖြင့် ဆန်ရောင်းချမှုတွင် ငွေကြေးလိ-မ်လည်မှု (၆) မှုကြုံခဲ့ရကြောင်း မြန်မာနိုင်ငံဆန်စပါးအသင်းချုပ်က အသိပေးထုတ်ပြန်ထားသည်။
ပြည်တွင်းစားသုံးမှုများသည့် ရွှေဘိုပေါ်ဆန်း၊ ဧရာဝတီပေါ်ဆန်းများ ဈေးနှုန်းတည်ငြိမ်စေရေးနှင့် စားသုံးသူများ၏ နေအိမ်အရောက်ဆန်အိတ်များဖြန့်ဖြူးနိုင်ရေးအတွက် ဇူလိုင် (၁) ရက်မှ စတင်ဆောင်ရွက်ခဲ့ပြီး နေပြည်တော်၊ ရန်ကုန်မြို့နှင့် မန္တလေးမြို့တို့ရှိ အိမ်ထောင်စု (၃၉၁) စုထံ အရောက်ပို့ပေးခဲ့ကြောင်း သိရသည်။
အိမ်အရောက်ပို့စနစ်အား အွန်လိုင်းမှတစ်ဆင့် စီမံဆောင်ရွက်ခြင်း၊ ဆက်သွယ်ခြင်းနှင့် KBZ Pay ၊ AYA Pay ၊ At Wallet တို့ဖြင့် ငွေလက်ခံခြင်းတို့ကို ဆောင်ရွက်ရာတွင် မသမာသူများမှ မြန်မာနိုင်ငံဆန်စပါး အသင်းချုပ် Facebook Page အတုများ ဖွင့်လှစ်၍ ဖုန်းနံပါတ်များ ပြောင်းလဲပြီး ငွေကြေးလိမ်လည် လှည့်ဖြားဆောင်ရွက်မှု (၆) ခု ကြုံတွေ့ခဲ့ရသဖြင့် အမှုဖွင့်အရေးယူဆောင်ရွက်နေပြီဖြစ်ကြောင်း သိရသည်။
သို့ဖြစ်ပါ၍ အိမ်အရောက်ပို့ အစီအစဉ်အား ပိုမိုလွယ်ကူ ထိရောက်စေရန်နှင့် မှန်ကန်မြန်ဆန်စေရန် အလို့ငှာ မြို့နယ်အလိုက် ဆန်ဆိုင်များ ခွဲဝေတာဝန်ပေးပြီး၊ အဆိုပါ မြို့နယ်ရှိ ဆန်ဆိုင်များမှတစ်ဆင့် သက်ဆိုင်ရာ မြို့နယ်အနီးတစ်ဝိုက်ရှိ အိမ်ထောင်စုများထံ အိမ်အရောက် ဖြန့်ဖြူးရောင်းချခြင်းအား ၂၀၂၄ခုနှစ် ဇူလိုင် (၁၀) ရက်မှ စတင်ပြီး ရန်ကုန်တိုင်းဒေသကြီးတွင် ဆောင်ရွက်မည်ဖြစ်ကြောင်း ထုတ်ပြန်ထားသည်။
ထို့ပြင် ငွေပေးချေမှုသည်လည်း Cash on Delivery (ပစ္စည်းရောက်ငွေချေ) စနစ်ဖြစ်ကြောင်းနှင့် ဈေးနှုန်းများ ပြောင်းလဲမှုမရှိဘဲ ရွှေဘိုပေါ်ဆန်းတစ်အိတ်လျှင် ၁၅၂,၀ဝဝ ကျပ်၊ ဧရာဝတီပေါ်ဆန်း တစ်အိတ်လျှင် ၁၃၀,၀၀၀ ကျပ်တို့ ဖြင့်ဆက်လက် ရောင်းချမည်ဖြစ်ကြောင်း အသိပေးထုတ်ပြန်ထားသည်။
နေပြည်တော်၊ မန္တလေး၊ မော်လမြိုင်၊ တောင်ကြီးတို့တွင် အိမ်အရောက်ပို့စနစ်ဆောင်ရွက်နေပြီဖြစ်၍ လိုအပ်ပါက ဆက်သွယ်မှာကြားနိုင်ကြောင်းလည်း ဆန်စပါးအသင်းချုပ်က အသိပေးထားသည်။
မြန်မာနိုင်ငံဆန်စပါးအသင်းချုပ်၏ အိမ်အရောက်ပို့ အစီအစဉ်တွင် ပူးပေါင်းဆောင်ရွက်လိုသော ဆန်ဆိုင်များ အနေဖြင့် အသင်းချုပ်နှင့် ဆက်သွယ်ဆောင်ရွက်နိုင်ကြောင်းနှင့် စားသုံးသူ မိဘပြည်သူများအနေဖြင့် ဝယ်ယူရန် အခက်အခဲရှိလျှင်ဖြစ်စေ၊ သတ်မှတ်ဈေးနှုန်းထက် ပို၍ ရောင်းချမှုကို ကြုံတွေ့လျှင်ဖြစ်စေ မြန်မာနိုင်ငံဆန်စပါးအသင်းချုပ် ရုံးဖုန်းများ ၀၁-၂၃၀၁၁၂၈-၂၉၊ ၀၁-၂၁၈၂၆၆-၆၈ သို့ ဆက်သွယ်အကြောင်းကြားရန် အသိပေး ထုတ်ပြန်ထားသည်။