အာရှ-ပစိဖိတ်ဒေသ၌ ရေရှည်တည်တံ့သော လုံ ခြုံရေးဗိသုကာတစ်ရပ်တည်ဆောက်ရန်ဆွေးနွေး

နိုင်ငံတကာဥပဒေကို လေးစားလိုက်နာမှု၊ တန်း တူညီမျှမှုနှင့် ပွင့်လင်းမြင်သာမှုဟူသော အခြေခံမူများအပေါ်အခြေခံ၍ အာရှ-ပစိဖိတ်ဒေသ၌ ရေရှည်တည်တံ့သော လုံခြုံရေးဗိသုကာတစ်ရပ်တည်ဆောက်ရန် ရုရှားနိုင်ငံခြားရေးဝန်ကြီးဌာန ဝန်ကြီး H.E. Mr. Sergey V. Lavrov နှင့် မြန်မာသံအမတ်ကြီးအပါအဝင် မော်စကိုမြို့အခြေစိုက် အာဆီယံနိုင်ငံသံရုံးများမှ သံအမတ်ကြီးများဆွေးနွေးခဲ့ကြသည်။

ရုရှားနိုင်ငံခြားရေးဝန်ကြီးဌာန ဝန်ကြီး H.E. Mr. Sergey V. Lavrov နှင့် မြန်မာသံအမတ်ကြီးဦးသစ်လင်းအုန်း အပါအဝင် မော်စကိုမြို့အခြေစိုက် အာဆီယံနိုင်ငံသံရုံးများမှ သံအမတ်ကြီးများသည် ဇန်နဝါရီ ၂၇ ရက်မွန်းလွဲ ၂ နာရီကပြုလုပ်သည့် လုပ်ငန်းညှိနှိုင်းနေ့လယ်စာစားပွဲ၌ ဆွေးနွေးခဲ့ကြခြင်းဖြစ်သည်။

ဥရောပအာရှဒေသအတွင်း ပေါင်းစည်းမှုနက်ရှိုင်းစေရေး၊ ဥရောပ အာရှစီးပွားရေးသမဂ္ဂ (EAEU)၊ ရှန်ဟိုင်းပူးပေါင်းဆောင်ရွက်မှုအဖွဲ့ (SCO)တို့နှင့် အာဆီယံကြား ဆက်ဆံရေးအရှိန် အဟုန်မြှင့်တင်ရေးနှင့် လက်ရှိ ဒေသတွင်းနှင့် နိုင်ငံတကာရေးရာများကို ဆွေးနွေးခဲ့ကြသည်။

ထို့ပြင် ရုရှား-အာဆီယံမဟာဗျူဟာမြောက် မိတ်ဖက်ဆက်ဆံရေးဖွံ့ဖြိုးတိုးတက်ရန် နိုင်ငံအကြီး အကဲများကချမှတ်ထားသည့် ဆုံးဖြတ်ချက်များအပေါ် အကောင်အထည်ဖော်မှု၊Comprehensive Plan of Action အစီအစဉ်သစ် ထပ်မံရေးဆွဲနိုင်ရေးပြင်ဆင်ဆောင်ရွက်နေမှုတို့ကိုလည်း ဆွေးနွေးခဲ့ကြသည်။

ထို့အတူ စီးပွားရေး၊ စွမ်းအင်၊ သိပ္ပံနှင့် အဆင့်မြင့်နည်းပညာ၊ ဒစ်ဂျစ်တယ်အသွင်ကူးပြောင်းရေး၊ စီးပွားရေးနှင့် လူငယ်ပိုင်းဆိုင်ရာ အဆက် အသွယ်များတိုးချဲ့ရေးတို့တွင် လက်တွေ့ကျသောပူးပေါင်းဆောင်ရွက်မှုများကို အာဆီယံ- မော်စကိုကော်မတီ၏ပါဝင်မှုဖြင့် မြှင့်တင်နိုင်ရေးကိုလည်း ဆွေးနွေးခဲ့ကြသည်။

ထို့ပြင် မြန်မာသံအမတ်ကြီးမှလည်း အာဆီယံ- ရုရှား မဟာဗျူဟာမြောက်မိတ်ဖက်ဆက်ဆံရေးတွင် မြန်မာနိုင်ငံက ၂၀၂၄-၂၀၂၇ ကာလအ တွက် Country-Coordinator အဖြစ်တာဝန်ယူဆောင်ရွက်နေမှု၊ အာဆီယံ Five-Point Consensus အပေါ် မြန်မာနိုင်ငံ၏ အကောင်အ ထည်ဖော်ဆောင်ရွက်နေမှုများနှင့် အခြား ကဏ္ဍများကိုရှင်းလင်းဆွေးနွေးပြောကြားခဲ့သည်။