မလေးရှားနိုင်ငံသည် ဒေသဆိုင်ရာနှင့် စီးပွားရေးဆိုင်ရာ ပူးပေါင်းဆောင်ရွက်မှုကို ရည်ရွယ်၍ အာဆီယံနှင့် ဘရစ်အကြား ထိတွေ့ဆက်ဆံမှုကို မြှင့်တင်ရန် တက်တက်ကြွကြွဆောင်ရွက်သွားမည်ဖြစ်ကြောင်း မလေးရှားနိုင်ငံခြားရေးဝန်ကြီး ဒါတွတ် ဆရီမိုဟာမက် ဟာဆန်က ပြောကြားလိုက်သည်။
ဘရာဇီးနိုင်ငံ ရီယိုဒီဂျနေရိုးတွင် ကျင်းပပြုလုပ်မည့် ဘရစ် နိုင်ငံခြားရေးဝန်ကြီးများအစည်းအဝေးအတွက် ဧပြီလ ၂၈၊ ၂၉ နှစ်ရက်တာ သူ၏ ခရီးစဉ်အတွင်း အစည်းအဝေးတွင် တင်သွင်းမည့် အကြောင်းအရာများ၌ အဆိုပါအကြောင်းအရာလည်း ပါဝင်မည်ဖြစ်သည်ဟု နိုင်ငံခြားရေးဝန်ကြီးက ပြောကြားခဲ့သည်။
၂၀၂၅ ခုနှစ်အာဆီယံအလှည့်ကျ ဥက္ကဌမလေးရှားနိုင်ငံသည် ဒေသဆိုင်ရာ ပူးပေါင်းဆောင်ရွက်မှုနှင့် စီးပွားရေး ပူးပေါင်းဆောင်ရွက်မှုကို မြှင့်တင်ရန် ရည်ရွယ်သော အာဆီယံနှင့် ဘရစ်အကြား ပိုမိုနက်ရှိုင်းစွာ ထိတွေ့ဆက်ဆံရေးကို တက်ကြွစွာ ထောက်ခံအားပေးသွားမည်ဟု တနင်္လာနေ့က သတင်းထုတ်ပြန်ချက်တွင် သူက ပြောကြားထားသည်။
ထို့အပြင် ပိုမိုတရားမျှတ၍ ရေရှည်တည်တံ့သော ကမ္ဘာ့စီးပွားရေးဆီသို့ ဦးတည်သည့် စုပေါင်းအားထုတ်ကြိုးပမ်းမှုများကို ခိုင်မာအောင် ဆောင်ရွက်သွားမည်ဖြစ်ကြောင်း ကို လည်း သူက ပြောကြားခဲ့သည်။
ဘရစ်နိုင်ငံခြားရေးဝန်ကြီးများ အစည်းအဝေးသည် အဖွဲ့၏ လက်ရှိဥက္ကဌ ဘရာဇီးနိုင်ငံ လက်ထက် ဇူလိုင်လ ၆ ရက် နေ့နှင့် ၇ ရက်ေန့ တို့တွင် ကျင်းပမည့် ဘရစ်ခေါင်းဆောင်များ၏ ထိပ်သီးအစည်းအဝေးမတိုင်မီ အရေးကြီးသော ရှေ့ပြေးအစည်းအဝေးများထဲမှ တစ်ခုဖြစ်သည်။ ယခုအစည်းအဝေးသည် ဘရစ် အဖွဲ့ဝင်နှင့် မိတ်ဖက်နိုင်ငံများမှ နိုင်ငံခြားရေးဝန်ကြီးများ အဖို့ ယခုနှစ်အတွက် ပထမဆုံးအကြိမ် တွေ့ဆုံမှုလည်းဖြစ်သည်။
မလေးရှားနိုင်ငံသည် ဘရစ် ၏ မိတ်ဖက်နိုင်ငံအဖြစ် ဇန်နဝါရီလ ၁ ရက် နေ့တွင် တရားဝင် သတ်မှတ်ခံရသည်။
Ref: သည်စတား