တနှစ်အတွင်းလူကုန်ကူးမှု ၆၇ မှုရှိခဲ့ရာတွင် ၄၈ မှုသည် တရုတ်ဇနီးမယားအဖြစ် ရောင်းစားခံရခြင်းဖြစ်
ပဲခူးမြို့တွင် အသက် ၁၇ နှစ်အရွယ် အမျိုးသမီးငယ်ကို တရုတ်အမျိုးသားတစ်ဦးနှင့် ပေါင်းသင်းရန် ရောင်းချခဲ့သည့် အမျိုးသမီးကို ထောင်ဒဏ် (နှစ် ၂၀) ချမှတ်လိုက်သည်။
ပဲခူးခရိုင်တရားရုံးက လူကုန်ကူးပုဒ်မဖြင့် (ဇွန်၃၀)ရက်က ချမှတ်ခဲ့ခြင်း ဖြစ်သည်။
ဖြစ်စဉ်တွင် ပဲခူးမြို့ ဥဿာမြို့သစ်၌နေသည့် ထိုပြစ်ဒဏ်ကျခံရသည့် အမျိုးသမီးသည် ပဲခူးမြို့ရှိ စားသောက်ဆိုင်တစ်ဆိုင်၌ စားပွဲထိုးလုပ်ကိုင်နေသည့် အသက်မပြည့်သေးသော အမျိုးသမီးငယ်ကို ရန်ကုန်၌ တရုတ်အမျိုးသားတစ်ဦးနှင့် ရက်တိုပေါင်းသင်းနေထိုင်ရန် ငွေကျပ်သိန်း ၅၀ ရရှိနိုင်မည်ဟု စည်းရုံးခဲ့ခြင်း ဖြစ်သည်ဟု သိရသည်။
ထို့အပြင် အသက်ပြည့်ပြီးပါက တရားဝင်ငွေကျပ်သိန်း ၁၅၀ ဖြင့် တင်တောင်းပြီး တရုတ်နိုင်ငံကို ခေါ်ဆောင်သွားကာ တရုတ်အမျိုးသားက ထောက်ပံ့မည်ဟုလည်း စည်းရုံးခဲ့သည်ဟု သိရသည်။
ထိုနည်းတူ ရန်ကုန်၊ သင်္ဃန်းကျွန်းမြို့နယ်၌ အသက် ၂၅ နှစ်အရွယ် အမျိုးသမီးငယ်တစ်ဦးကို တရုတ်ဇနီးမယားအဖြစ်ရောင်းချခဲ့သည့် ဆိပ်ကြီးခနောင်တိုမြို့နယ်ရှိ ပွဲစားအမျိုးသမီးကို လူကုန်ကူးပုဒ်မအရ မြစ်ကြီးနားခရိုင်တရားရုံးက အလုပ်နှင့် ထောင်ဒဏ် ၁၀ နှစ် (ဇွန်၃၀)ကပင် ချမှတ်ခဲ့သေးသည်။
ပြည်ထဲရေးဝန်ကြီးဌာန၏ ထုတ်ပြန်ချက်များအရ ပြီးခဲ့သည့် ၂၀၂၄၊ ၂၀၂၅ ခုနှစ်အတွင်း လူကုန်ကူးမှု ၆၇ မှုရှိခဲ့သည်။
ထိုအထဲတွင် ၄၈ မှုသည် တရုတ်ဇနီးမယားအဖြစ် ရောင်းစားခံရသည့် အမှုများ ဖြစ်သည်။
ထိုအချက်အလက်များကို နေပြည်တော်ရှိ မြန်မာနိုင်ငံရဲတပ်ဖွဲ့ဌာနချုပ် အရိန္ဒမာခန်းမ၌ ပြုလုပ်သည့် လူကုန်ကူးမှု တားဆီးကာကွယ်ရေးနှင့် လူကုန်ကူးခံရသူများအား အကာအကွယ်ပေးရေးဆိုင်ရာ လုပ်ငန်းကော်မတီ အစည်းအဝေး မှ သိရခြင်း ဖြစ်သည်။
ထိုလုပ်ငန်းကော်မတီအစည်းအဝေး၌ ပြည်တွင်းကိုရောက်ရှိသည့် အချို့သော တရုတ်လူမျိုးများသည် မြန်မာအမျိုးသမီးများကို ဇနီးသားမယားအဖြစ် စည်းရုံးခေါ်ဆောင်ပြီး ရောင်းစားနေသည့်အတွက် သတိထားရန်လိုကြောင်းလည်း ပြည်ထဲရေးဒုဝန်ကြီး ဗိုလ်ချုပ်အောင်ကျော်ကျော်က ပြောကြားသည်။
ပြည်ထဲရေးဝန်ကြီးဌာနအနေဖြင့် ၂၀၂၄ နှင့် ၂၀၂၅ ဇွန်လအတွင်း တရုတ်နိုင်ငံ ၄၈ မှု၊ လာအိုနိုင်ငံ ၁ မှု၊ ကမ္ဘောဒီးယား ၁ မှုနှင့် ပြည်တွင်း ၁၇ မှု စုစုပေါင်း လူကုန်ကူးမှု ၆၇ မှုကို အရေးယူနိုင်ခဲ့သည်ဟုလည်း ဆိုသည်။
ယင်းအမှုများထဲတွင် အဓမ္မလက်ထပ်စေမှု၊ ပြည့်တန်ဆာအဖြစ် အဓမ္မခိုင်းစေမှု၊ အငှါးကိုယ်ဝန်ဆောင်ခိုင်းမှုများလည်း ပါဝင်ကြောင်း သိရသည်။