နိုင်ငံတော်သမ္မတရုံးက ဇူလိုင် ၂၁ ရက်တွင် ဥပဒေကဲ့သို့ အာဏာတည်သော အမိန့်အမှတ်(၁/၂၀၂၆)ဖြင့်ကြေညာခဲ့သည့် အရေးပေါ်အခြေအနေကာလ၏ ရက်ပေါင်း(၉၀)ပြည့်မြောက်ရန်နီးကပ်လာ၍ ထပ်မံတိုးမြှင့်သတ်မှတ်ပေးပါရန် ပြည်ထောင်စုလွှတ်တော်သို့ အဆိုတင်သွင်းခဲ့သည်။
ဇူလိုင် ၁၄ ရက်ကကျင်းပသည့် တတိယအကြိမ် ပြည်ထောင်စုလွှတ်တော် ဒုတိယပုံမှန်အစည်းအဝေး(အဋ္ဌမနေ့)တွင် ဥပဒေရေးရာဝန်ကြီးဌာန ဒု-ဝန်ကြီးနှင့် ဒု-ရှေ့နေချုပ် ဒေါက်တာထိန်လင်းဦးက အဆိုတင်သွင်းခဲ့ခြင်းဖြစ်သည်။
အရေးပေါ်အခြေအနေကြေညာထားသည့် မြို့နယ်များတွင် အုပ်ချုပ်ရေး၊ ရပ်ရွာအေးချမ်းသာယာရေးနှင့် တရားဥပဒေစိုးမိုးရေးတို့ကို မူလအခြေအနေပြန်လည်ရောက်ရှိစေရန် အရေးပေါ်အခြေအနေကြေညာထားခြင်းကာလကို တိုးမြှင့်သတ်မှတ်ရန်လိုအပ်လျက်ရှိသည်ဟု ရှင်းလင်းပြောဆိုသည်။
ထို့ပြင် ဖွဲ့စည်းပုံအခြေခံဥပဒေပုဒ်မ ၂၁၂ ပုဒ်မခွဲ(ဃ)မှ ပြဋ္ဌာန်းချက်နှင့်အညီ နိုင်ငံတော်သမ္မတက ဥပဒေကဲ့သို့ အာဏာတည်သော အမိန့်အမှတ်(၁/၂၀၂၆)ဆက်လက်အတည်ဖြစ်သည့် ကာလတိုးမြှင့်သတ်မှတ်ခြင်းကို ပြည်ထောင်စုလွှတ်တော်က သဘောတူပေးနိုင်ရေးအ တွက် နိုင်ငံတော်သမ္မတ (ကိုယ်စား) အဆိုတင်သွင်းခြင်းဖြစ်သည်ဟု ရှင်းလင်းပြောဆိုသည်။
ထို့နောက် အဆိုကို ထပ်မံဆွေးနွေးလိုသည့် လွှတ်တော်ကိုယ်စားလှယ်များက ၎င်းတို့၏ အမည်စာရင်းများကို ပြည်ထောင်စုလွှတ်တော်ရုံး ညွှန်ကြားရေးမှူးချုပ်ထံ တင်သွင်းနိုင်သည်ဟု ပြည်ထောင်စုလွှတ်တော်နာယက ဦးအောင်လင်းဒွေးကကြေညာခဲ့သည်။