အမေရိကန်တွင်ရောက်ရှိနေသည့် အထောက်အထားမဲ့ မြန်မာနိုင်ငံသားများ ပြည်နှင်ခြင်းမခံရမီ ကြိုတင်ထွက်ခွာကြရန် မြန်မာသံရုံးအသိပေး

အမေရိကန်နိုင်ငံတွင်ရောက်ရှိနေသည့် အထောက်အထားမဲ့မြန်မာနိုင်ငံသားများအနေဖြင့် အိမ်ရှင်အစိုးရ၏ ပြည်နှင်ခြင်းမခံရမီ ကြိုတင်ထွက်ခွာကြရန် အမေရိကန်နိုင်ငံဆိုင်ရာ မြန်မာသံရုံး၊ ဝါရှင်တန်မြို့က အသိပေးခဲ့သည်။

အမေရိကန်နိုင်ငံရောက် မြန်မာနိုင်ငံသားများအနေဖြင့် တရားဝင်အထောက်အထားများ သက်တမ်းကုန်ဆုံးနေပါက အထောက်အထားမဲ့ နိုင်ငံခြားသားနေရပ်ရွှေ့ပြောင်းသူအဖြစ်သတ်မှတ်ခံရပြီး အိမ်ရှင်အစိုးရ၏ ပြည်နှင်ခြင်းခံရနိုင်သည်ဟု အသိပေးခဲ့သည်။

ထို့ကြောင့် တရားဝင်အထောက်အထားများသက်တမ်းကုန်ဆုံးနေသူများအနေဖြင့် အမေရိကန်နိုင်ငံ၌ နေထိုင်ခွင့်ရရှိနိုင်ရန် မိမိအစီအစဉ်ဖြင့် ကြိုတင်ဆောင်ရွက်ထားကြရန်လည်း အသိပေးခဲ့သည်။

ထိုသို့ နေထိုင်ခွင့်အထောက်အထားမဲ့နေသူများ(သို့)တရားမဝင်ရောက်ရှိနေသူများဖြစ်ပါက အိမ်ရှင်အစိုးရ၏ ပြည်နှင်ခြင်းမခံရမီ ကြိုတင်ထွက်ခွာသင့်ပြီး မြန်မာနိုင်ငံသို့အပြန်ခရီးအတွက် မည်သည်ခရီးသွားလက်မှတ်အမျိုးအစားမျှမရှိသူများ(သို့)နိုင်ငံကူးလက်မှတ်ကြာမြင့်စွာသက်တမ်းလွန်နေသူများအနေဖြင့် မြန်မာသံရုံး၊ ဝါရှင်တန်မြို့တွင် မည်သူမည်ဝါဖြစ်ကြောင်း သက်သေခံလက်မှတ်လျှောက်ထားနိုင်သည်ဟု အသိပေးခဲ့သည်။

လျှောက်ထားရန်ပုံစံနှင့် လိုအပ်ချက်များအား မြန်မာသံရုံး၊ ဝါရှင်တန်မြို့၏ ဝက်ဘ်ဆိုက်မှ ရယူဖြည့်စွက်၍ အီးမေးလ်/ဖုန်းတို့ဖြင့် ဆက်သွယ်ဆောင်ရွက်နိုင်သည်ဟုလည်း အသိပေးခဲ့သည်။