ပြီးခဲ့သည့် ၂၀၂၄ ခုနှစ်အတွင်းက တိုက်ခတ်ခဲ့သည့် “ရာဂိ”မုန်တိုင်းအရှိန်ကြောင့် နေပြည်တော်၊ ပျဉ်းမနားမြို့နယ်ရှိ အထက်ပေါင်းလောင်း ရေအားလျှပ်စစ်ဓာတ်အားပေးစက်ရုံအတွင်း၌ ရေကြီးရေလျှံမှုများဖြစ်ပွားကာ ရေပြန်လည်ကျဆင်းသွားချိန်တွင် ပျက်စီးဆုံးရှုံးမှုများနှင့်အတူ ရွှံ့နွံသဲနုန်းများတင်ကျန်ခဲ့၍ ဓာတ်အားထုတ်လုပ်မှုများရပ်နားခဲ့ရပြီး ပြန်လည်ပြုပြင်တည်ဆောက်ခြင်းလုပ်ငန်းများဆောင်ရွက်လျက်ရှိသည်။
ထိုသို့ ဆောင်ရွက်ရာ၌ ရွှံ့နွံသဲနုန်းများတင်ကျန်နေမှုများအား အပိုင်းလိုက်ဖယ်ရှားရှင်းလင်းမှုများပြုလုပ်ခဲ့ရာ ဖိအားမြင့်သံမဏိပိုက်လိုင်းအောက် ခရုပတ်ခွေအတွင်း၊ ရေထုတ်ပြွန်များအတွင်းနှင့် ရေတံခါးအောက်ခြေတို့မှ ရွှံ့နွံသဲနုန်းများဖယ်ရှားမှုမှာ ၂၂ ရာခိုင်နှုန်းပြီးစီးပြီဖြစ်ကြောင်း သိရသည်။
အဆိုပါ လုပ်ငန်းဆောက်ရွက်နေမှုများအား လျှပ်စစ်စွမ်းအားဝန်ကြီးဌာန ပြည်ထောင်စုဝန်ကြီးဦးဉာဏ်ထွန်းနှင့်တာဝန်ရှိသူများမှ ဇန်နဝါရီ ၂၅ ရက်နံနက်ပိုင်းကသွားရောက်၍ တမံရေပိုလွှဲမှ ပေ ၂၀ ကျော် ရေလျှံကျပြီး စက်ရုံအတွင်းသို့ ရေဝင်ရောက်ခဲ့သည့်အရှိန်ကြောင့် စက်ရုံရေ ထွက်မြောင်း(Tailrace Channel)နှင့် ခရုပတ်ခွေ (Spiral Casing)များအတွင်း ရွှံ့နွံသဲနုန်းနှင့် ကျောက်တုံးများ ဝင်ရောက်ပိတ်ဆို့မှုဖြစ်ပေါ်ခဲ့သဖြင့် ရေထွက်မြောင်းရှေ့တွင် ယာယီရေတားတမံတည်ဆောက်နေမှုကို ကြည့်ရှုစစ်ဆေးခဲ့သည်။
ထို့ပြင် ရေထွက်မြောင်းအတွင်းမှ ရေများအား အင်ဂျင်တပ်ရေစုပ်ပန့်များဖြင့် စုပ်ယူ၍ ရေစစ်ကန်သို့ ပေးပို့ခြင်း၊ ရေစစ်ကန်မှ ယာယီရေတား တမံအပြင်သို့ စွန့်ထုတ်ခြင်းဖြင့်(၂)ဆင့် ဆောင်ရွက်နေမှု၊ ရေထွက်ပေါက်အဝရှိ ရွှံ့နွံသဲနုန်းနှင့် ကျောက်တုံးများအား မြေကော်စက်(Backhoe) အသေးဖြင့်တူးပြီး ပစ္စည်းသယ်ခွက်(Bucket)အတွင်းထည့်၍ ပူလီကြိုးဖြင့်ဆွဲတင်ကာ မြေသယ်ယာဉ်ပေါ်တင်နေမှုတို့ကိုလည်း ကြည့်ရှုစစ်ဆေးခဲ့သည်။
ထို့အတူ လျှောစောက်(Slope)ပုံဖြစ်၍ အတွင်းပိုင်းရှိ ရွှံ့နွံသဲနုန်းနှင့် ကျောက်တုံးများအား လူ အင်အားဖြင့် ခက်ခက်ခဲခဲရှင်းလင်းတူးထုတ်နေရမှုအခြေအနေနှင့် Botton Outlet မှရေထုတ်ပြီး အောက်ပေါင်းလောင်းစက်ရုံသို့ ရေပေးပို့နေမှုတို့ကိုလည်း ကြည့်ရှုစစ်ဆေးကာ လုပ်ငန်းခွင်ဘေး အန္တရာယ်ကင်းရှင်းရေးကို အထူးအလေးထား ဂရုပြုဆောင်ရွက်ရန် မှာကြားခဲ့သည်။
လက်ရှိအချိန်၌ ယာယီရေတားတမံတည် ဆောက်ခြင်းနှင့် စက်ရုံရေထုတ်မြောင်းအတွင်းမှ ရေစုပ်ထုတ်ခြင်းလုပ်ငန်းများမှာ ရာနှုန်းပြည့်ပြီးစီးပြီဖြစ်ကာ စက်မှု/လျှပ်စစ်ပိုင်းဆိုင်ရာနှင့် မြို့ပြပိုင်းဆိုင်ရာလုပ်ငန်းများပြီးစီးမှုမှာ (၄၃ ဒသမ ၆၈)ရာခိုင်နှုန်း၊ ဓာတ်အားပေးစက် ၂ လုံး ပြန်လည်ပြင်ဆင်ခြင်းလုပ်ငန်းများမှာ (၂၁ ဒသမ ၇) ရာခိုင်နှုန်းပြီးစီးပြီဖြစ်သည်။
အထက်ပေါင်းလောင်း ရေအားလျှပ်စစ်ဓာတ်အားပေးစက်ရုံသည် ဓာတ်အားပေးစက်(၇၀)မဂ္ဂါဝပ်(၂)လုံးဖြင့် စုစုပေါင်း(၁၄၀)မဂ္ဂါဝပ်ကို ၂၃၀ ကေဗွီ အထက်ပေါင်းလောင်း-နန်ချို ဓာတ်အားလိုင်းဖြင့် နိုင်ငံတော်ဓာတ်အားကွန်ရက်စနစ်အတွင်းသို့ တစ်နှစ်လျှင် လျှပ်စစ်ဓာတ်အား ၄၅၄ ကီလိုဝပ်နာရီသန်းခန့် ထုတ်လုပ်ပေးလျက်ရှိသည်။