ဂျာကာတာ၊ ဇူလိုင် ၁၄ ရက်
ပင်လယ်သမုဒ္ဒရာကို အခြေခံသည့် ရေရှည်တည်တံ့သော ဖွံ့ဖြိုးတိုးတက်မှုဆိုင်ရာ အကောင်းဆုံး လုပ်ဆောင်ချက်များကို အပြန်အလှန် မျှဝေဆွေးနွေးရန်အတွက် အင်ဒိုနီးရှားနိုင်ငံသည် လာမည့် သောကြာနေ့မှ စနေနေ့အထိ ဂျာဗားအရှေ့ပိုင်းပြည်နယ် ဘန်ယူဝမ်ဂီခရိုင် တွင် အာဆီယံအဖွဲ့ဝင်နိုင်ငံများနှင့် မိတ်ဖက်နိုင်ငံများ ပါဝင်မည့် နိုင်ငံတကာ အပြာရောင်စီးပွားရေး (Blue economy) ဖိုရမ်တစ်ခုကို အိမ်ရှင်အဖြစ် လက်ခံကျင်းပသွားမည် ဖြစ်သည်။
“ASEAN-ID Blue Forum” ဟု အမည်ရသည့် အဆိုပါဖိုရမ်ကို အင်ဒိုနီးရှားနိုင်ငံခြားရေးဝန်ကြီးဌာန၊ ပင်လယ်ပြင်ရေးရာနှင့် ငါးလုပ်ငန်းဝန်ကြီးဌာနတို့က နူးဇီလန်နိုင်ငံခြားရေးနှင့် ကုန်သွယ်ရေးဝန်ကြီးဌာနနှင့် ပူးပေါင်း၍ စီစဉ်ကျင်းပခြင်း ဖြစ်သည်။
အင်ဒိုနီးရှားနိုင်ငံခြားရေးဝန်ကြီးဌာနမှ တာဝန်ရှိသူတစ်ဦးဖြစ်သူ အတ်ဟ်ရန်တီ ဆာဒါနာရီနီ ဝီရာဂျူဒါ က တနင်္လာနေ့တွင် ပြောကြားရာ၌ ဘန်ယူဝမ်ဂီဒေသသည် ပင်လယ်ပြင်ထိန်းသိမ်းရေးလုပ်ငန်းကို ငါးလုပ်ငန်း၊ ခရီးသွားလုပ်ငန်း၊ အသေးစားစီးပွားရေးလုပ်ငန်းများနှင့် လူထုစွမ်းရည်မြှင့်တင်ရေးလုပ်ငန်းများအကြား အောင်မြင်စွာ ပေါင်းစပ်လုပ်ဆောင်နိုင်ခဲ့ခြင်းကြောင့် အဆိုပါဖိုရမ်ကျင်းပရာနေရာအဖြစ် ရွေးချယ်ခဲ့ခြင်းဖြစ်ကြောင်း သိရသည်။
၎င်းခရိုင်သည် အင်ဒိုနီးရှားနိုင်ငံအနေဖြင့် အခြားတက်ရောက်လာမည့် နိုင်ငံများနှင့် မျှဝေလိုသော ဖွံ့ဖြိုးတိုးတက်မှုပုံစံငယ်တစ်ခုကို ဖော်ဆောင်ပေးထားခြင်းဖြစ်ကြောင်း ၎င်းက ပြောကြားခဲ့သည်။
ယခုဖိုရမ်သို့ အာဆီယံအဖွဲ့ဝင်နိုင်ငံများ၊ အရှေ့အာရှထိပ်သီးအစည်းအဝေး တက်ရောက်မည့် နိုင်ငံများနှင့် ပစိဖိတ်ကျွန်းစုများဖိုရမ် အဖွဲ့ဝင်နိုင်ငံများမှ ကိုယ်စားလှယ်များ တက်ရောက်ကြမည်ဟု မျှော်လင့်ရပြီး၊ ဆွေးနွေးပွဲများတွင် အပြာရောင်စီးပွားရေးနှင့် ရေရှည်တည်တံ့သော ပင်လယ်ပြင်အရင်းအမြစ် စီမံခန့်ခွဲမှုဆိုင်ရာ ဒေသတွင်း ပူးပေါင်းဆောင်ရွက်မှုများ အားကောင်းလာစေရန် ဦးတည်ဆွေးနွေးသွားမည် ဖြစ်သည်။
Ref: ဆင်ဟွာ
