အီရန်အနေနဲ့ ဆွေးနွေးပွဲဝိုင်းကို ပြန်မလာဘူးဆိုရင်တော့ အမေရိကန်စစ်တပ်က အီရန်ကို ဆက်ပြီး တိုက်ခိုက်သွားမယ်လို့ အမေရိကန်သမ္မတ ဒေါ်နယ်ထရမ့်က ပြောလိုက်ပါတယ်။
”ဒီညလည်း သူတို့ကို အပြင်းအထန် တိုက်ခိုက်မယ်။ မနက်ဖြန်ညလည်း အပြင်းအထန် တိုက်ဦးမယ်။ သန်ဘက်ခါညလည်း ဆက်တိုက်မှာပဲ။ နောက်အပတ်ဆိုရင်တော့ သူတို့အတွက် အခြေအနေ တော်တော်လေး ဆိုးသွားလိမ့်မယ်” လို့ Fox News နဲ့ အင်တာဗျူးမှာ သူက ပြောသွားပါတယ်။
”သူတို့ စားပွဲဝိုင်းလာပြီး မဆွေးနွေးမချင်း” တိုက်ခိုက်မှုတွေ ဆက်လုပ်သွားမယ်လို့လည်း ထရမ့်က ထပ်ပြောပါတယ်။
ဒါ့အပြင် ဟော်မုဇ် ရေလက်ကြားကိုတော့ အီရန်သင်္ဘောတွေကလွဲပြီး တခြားသင်္ဘောတွေ အားလုံးအတွက် ဖွင့်ပေးထားတယ်လို့ သမ္မတ ထရမ့်က ဆိုပါတယ်။
”ဒါကြောင့်မို့လို့ အီရန်ဆိပ်ကမ်းတွေကို အဝင်အထွက်လုပ်တဲ့ သင်္ဘောတွေ၊ ဒါမှမဟုတ် အီရန်ကုန်ပစ္စည်းတွေ သယ်လာတဲ့ သင်္ဘောတွေကိုပဲ အပြည့်အဝ ပိတ်ဆို့သွားမှာပါ” လို့ သူက Truth Social ပလက်ဖောင်းပေါ်မှာ ရေးသားခဲ့ပါတယ်။