ထိုင်းနိုင်ငံသို့ ရောက်ရှိနေပြီး အကြောင်းအမျိုးမျိုးကြော င့် နေရပ်ပြန်ရန် အခက်အခဲဖြစ်နေသည့် ရန်ကုန်တိုင်းနှင့် ရခိုင်ပြည်နယ်အတွင်းမှ မြန်မာနိုင်ငံသား အချို့ကို မြန်မာ့တပ်မတော်(ရေ) က ပြန်လည်ပို့ဆောင်ပေးခဲ့ကြောင်း သိရသည်။
တနင်္သာရီတိုင်းဒေသကြီး ကော့သောင်းမြို့သို့ ပြန်လည်ဝင်ရောက်လာသည့် နေရပ်ပြန် (၆၇၉)ဦး အနက်မှ ရန်ကုန်တိုင်းနှင့်ရခိုင်ပြည်နယ်သို့ပြန်မည့် နေရပ်ပြန် ၂၀၀ ကျော်ကို မြန်မာ့တပ်မတော်(ရေ)က ယမန်နေ့ ဖေဖေါ်ဝါရီ (၅) ရက်တွင် လိုက်လံပို့ဆောင်ပေးခဲ့ခြင်း ဖြစ်သည်။
ထိုင်းနိုင်ငံမှ ပြန်လည်ဝင်ရောက်လာသည့် နေရပ်ပြန် (၆၇၉) ဦးအနက်မှ ရန်ကုန်တိုင်းဒေသကြီးသို့ ပြန်မည့် နေရပ်ပြန် (၁၁၈) ဦးအား မြန်မာ့တပ်မတော်(ရေ) မှ စစ်ရေယာဉ် (ကျန်စစ်သား) ဖြင့်ခေါ်ဆောင်ကာ ရန်ကုန်မြို့၊ အမှတ်(၃) ရေတပ်ဆိပ်ခံတံတား (သီလဝါ) သို့ ပို့ဆောင်ပေးခဲ့ကြောင်း သိရသည်။
ယင်းသို့ ပို့ဆောင်ပေးခဲ့ရာ ဖေဖေါ်ဝါရီလ (၅) ရက် မွန်းလွဲ (၂) နာရီတွင် ရောက်ရှိလာပြီး သက်ဆိုင်ရာ တာဝန်ရှိသူများနှင့် မိသားစုဝင်များက သွားရောက်ကြိုဆိုခဲ့ကြောင်း သိရသည်။
အဆိုပါ နေရပ်ပြန် (၁၁၈) ဦးကို ဒဂုံဆိပ်ကမ်းမြို့နယ်ရှိ ရိုးမရိပ်သာ Quarantine Center ၌ COVID-19 စည်းကမ်းချက်များနှင့်အညီ စနစ်တကျ စောင့်ကြည့်ထားရှိပြီး ရန်ကုန်တိုင်းဒေသကြီးအတွင်းရှိ နေရပ်ပြန်များအား သက်ဆိုင်ရာ မြို့နယ်အုပ်ချုပ်ရေးမှူးများထံသို့လည်းကောင်း၊ ရန်ကုန်တိုင်းဒေသကြီး ပြင်ပတွင်နေထိုင်သော နေရပ်ပြန်များအား သက်ဆိုင်ရာတိုင်းဒေသကြီး၊ ပြည်နယ်အစိုးရ အဖွဲ့များထံသို့လည်းကောင်း စနစ်တကျအပ်နှံသွားမည်ဖြစ်ကြောင်း သိရသည်။
အလားတူ ရခိုင်ပြည်နယ် စစ်တွေမြို့နှင့် ကျောက်ဖြူမြို့နယ်တို့မှ နေရပ်ပြန် (၁၁၁) ဦးကို မြန်မာ့တပ်မတော်ရေမှ စစ်ရေယာဉ်(အနော်ရထာ)ဖြင့် နေရပ်အသီးသီးသို့ ပြန်လည်ပို့ဆောင်ပေးရာ ကျောက်ဖြူမြို့သို့ ဖေဖေါ်ဝါရီ (၅) ရက် မွန်းလွှဲပိုင်းတွင် ရောက်ရှိခဲ့ကြောင်း သိရသည်။
ကျောက်ဖြူမြို့ အနီးဝန်းကျင်မှ နေရပ်ပြန် (၃၁) ဦးကို သက်ဆိုင်ရာ တာဝန်ရှိသူများမှတဆင့် မိသားစုဝင်များထံ ပြန်လည်အပ်နှံခဲ့ပြီး စစ်တွေမြို့နှင့်အနီးတဝိုက်မှ နေရပ်ပြန် (၈၀) ဦးကိုလည်း ဆက်လက်ပို့ဆောင်ပေးသွားမည်ဖြစ်ကြောင်း သိရသည်။
