ဟောင်ကောင်၏ “တစ်နိုင်ငံ၊ စနစ်နှစ်မျိုး” အုပ်ချုပ်မှုစနစ်ကို ဆက်လက်ထိန်းသိမ်းသွားမည်ကြောင်း သမ္မတရှီကျင့်ဖျင် ပြောကြား
ဟောင်ကောင်၊ ဇူလိုင် ၁ ရက်
ဟောင်ကောင်၏ “တစ်နိုင်ငံ၊ စနစ်နှစ်မျိုး” အုပ်ချုပ်မှုပုံစံကို ပြောင်းလဲသွားမည် မဟုတ်ကြောင်း တရုတ်သမ္မတ ရှီကျင့်ဖျင်က ကမ္ဘာ့ ဘဏ္ဍာရေးအချက်အချာမြို့တော် ဟောင်ကောင်သို့ လာရောက်လည်ပတ်စဉ် ဇူလိုင်လ ၁ ရက် သောကြာနေ့တွင် ပြောကြားခဲ့သည်။
ဗြိတိန်သည် ဟောင်ကောင်ကို တရုတ်အုပ်ချုပ်မှုအောက်သို့ ၁၉၉၇ ခုနှစ် ဇူလိုင်လ ၁ ရက်နေ့တွင် ပြန်လည်ပေးအပ်ခဲ့ရာ၌ ပေကျင်းသည် ဟောင်ကောင်အား ကျယ်ပြန့်သော ကိုယ်ပိုင်အုပ်ချုပ်ခွင့်၊ လွတ်လပ်သော ကိုယ်ပိုင်အခွင့်အရေးနှင့် တရားစီရင်ရေးဆိုင်ရာ လွတ်လပ်မှု များပါဝင်သည့် “တစ်နိုင်ငံ၊ စနစ်နှစ်မျိုး” အုပ်ချုပ်မှုစနစ်အောက်တွင် အနည်းဆုံး ၂၀၄၇ ခုနှစ်အထိ ထိန်းသိမ်းအုပ်ချုပ် သွားမည်ဖြစ်ကြောင်း ကတိပေးခဲ့သည်။
သို့သော် ပေကျင်းသည် ၂၀၁၉ ခုနှစ်တွင် ဖြစ်ပွားခဲ့သော ဒီမိုကရေစီလိုလားသည့် လူထုဆန္ဒပြပွဲများအပြီး တစ်နှစ်အကြာ ၂၀၂၀ ပြည့်နှစ်တွင် ဟောင်ကောင်အတွက် အမျိုးသားလုံခြုံရေး ဥပေဒေကို ပြင်းပြင်းထန်ထန် ပြဌာန်းလိုက်သည်။
ထို့ကြောင့် တရုတ်နိုင်ငံရေးဝေဖန်သူများက ပေကျင်းအာဏာပိုင်များကို ၎င်းတို့ ပေးထားသည့်ကတိများအား ၎င်းတို့ကိုယ်တိုင် ဖောက်ဖျက်နေသည်ဟု စွပ်စွဲခဲ့ကြသည်။
တရုတ်နှင့် ဟောင်ကောင်က အဆိုပါ ၂၀၂၀ခုနှစ် ပြဌာန်းဥပဒေသည် မြို့တော်အား မငြိမ်မသက်ဖြစ်မှုမှ ပြန်လည်ကောင်းမွန်လာစေရန် ရည်ရွယ်၍ ချမှတ်ခဲ့ခြင်းဖြစ်သည်ဟု ပြောဆိုကာ ၎င်းစွပ်စွဲချက်များကို မမှန်ကန်ကြောင်း ပြန်လည်ချေပခဲ့သည်။
ထို့နောက် ရှီက တစ်နိုင်ငံ၊ စနစ်နှစ်မျိုး အုပ်ချုပ်မှုပုံစံသည် တရုတ်နိုင်ငံ၏ ကျယ်ပြန့်သော တရားစီရင်ပိုင်ခွင့်အောက်တွင် အောင်မြင်နေပြီး ယင်းကဲ့သို့ ကောင်းမွန်သည့် စနစ်အား ပြောင်းလဲသွားရန် အကြောင်းပြချက်မရှိကြောင်း ပြောကြားခဲ့သည်။
ရှီက ဟောင်ကောင်အား နောက်တစ်ကြိမ် ဖရိုဖရဲ မဖြစ်စေရန်နှင့် ၎င်း၏ ဖွံ့ဖြိုးတိုးတက်မှုကို နှောင့်နှေးစေမည့် အနှောက်အယှက်မှန်သမျှကို ဖယ်ရှားရပစ်ရမည်ဖြစ်ကြောင်း ပြောကြားခဲ့သည်။
တရုတ်နိုင်ငံသည် နိုင်ငံတကာဘဏ္ဍာရေးနှင့် ကုန်သွယ်ရေးဗဟိုချက်တစ်ခုအဖြစ် ဟောင်ကောင်၏အခန်းကဏ္ဍကို ထောက်ခံမည်ဖြစ်ကြောင်း ရှီက ထပ်မံပြောကြားခဲ့သည်။
Source: Reuters
