နေပြည်တော်၊ဇူလိုင်-၃၁
မိုးလေဝသနှင့် ဇလဗေဒညွှန်ကြားမှုဦးစီးဌာနက ယနေ့ (ဇူလိုင် ၃၁ ရက်) နံနက် ၇ နာရီတွင် ထုတ်ပြန်သည့် ရေကြီးခြင်းသတိပေးချက်အရ ဟင်္သာတမြို့နှင့် တာချီလိတ်မြို့တို့တွင် မြစ်ရေနှင့် ချောင်းရေများ စိုးရိမ်ရေမှတ်သို့ ရောက်ရှိနိုင်သဖြင့် ဒေသခံများအနေဖြင့် ကြိုတင်သတိပြုကြရန် တိုက်တွန်းထားသည်။
ယနေ့ နံနက် ၆ နာရီ ၃၀ မိနစ်အချိန် တိုင်းထွာချက်များအရ ဧရာဝတီမြစ်ရေသည် ဟင်္သာတမြို့တွင် စိုးရိမ်ရေမှတ်အောက် ပေဝက်ကျော်သာ လိုတော့သည့်အခြေအနေသို့ ရောက်ရှိနေပြီး လာမည့် ၁ ရက်အတွင်း စိုးရိမ်ရေမှတ်သို့ ရောက်ရှိနိုင်ကြောင်း သိရသည်။
အလားတူ မယ်ဆိုင်ချောင်းရေသည်လည်း တာချီလိတ်မြို့နယ် လွယ်တော်ခမ်းကျေးရွာတွင် စိုးရိမ်ရေမှတ်အောက် ပေဝက်ကျော်သာ ကျန်ရှိတော့ပြီး လာမည့် ၆ နာရီအတွင်း စိုးရိမ်ရေမှတ်ကို ကျော်လွန်ရောက်ရှိနိုင်ကြောင်း ထုတ်ပြန်ချက်တွင် ဖော်ပြထားသည်။
ထို့ကြောင့် ဟင်္သာတမြို့နယ်နှင့် တာချီလိတ်မြို့နယ်အတွင်းရှိ မြစ်ကမ်းအနီးနှင့် မြေနိမ့်ပိုင်းတွင် နေထိုင်သူများအနေဖြင့် မြစ်ရေမြင့်တက်လာပါက အချိန်မီ ရွှေ့ပြောင်းရှောင်ရှားနိုင်ရေးအတွက် ကြိုတင်ပြင်ဆင်ထားကြရန် မိုးဇလဌာနက သတိပေးနှိုးဆော်ထားသည်။