သူအသတ်ခံရလျှင် သမ္မတလည်း လုပ်ကြံခံရလိမ့်မည်–ဆာရာ

သူ အသတ်ခံခဲ့ရပါက သမ္မတ ဖာဒီနန်မားကို့စ်ဂျူနီယာကို လုပ်ကြံသတ်ဖြတ်ခိုင်းမည်ဖြစ်ကြောင်း ဖိလစ်ပိုင် ဒုတိယသမ္မတ ဆာရာ ဒူတာတေးက စနေနေ့တွင် ပြောကြားလိုက်သည့်အတွက် သင့်တော်သည့် အရေးယူဆောင်ရွက်မှုကိုချက်ချင်းလုပ်သွားမည်ဟု မားကို့စ်၏ ရုံးက ကတိပြုခဲ့သည်။

ဖိလစ်ပိုင်နိုင်ငံ၏ သြဇာအကြီးဆုံး နိုင်ငံရေးမိသားစုနှစ်ခုအကြား အကွဲအပြဲ ကြီးမားကျယ်ပြန့်လာသည့် လက္ခဏာရပ်အဖြစ် နံနက်အစောပိုင်း သတင်းစာရှင်းလင်းပွဲတစ်ခု၌ ဒူတာတေးက သူ လူသတ်သမားတစ်ဦးနှင့် စကားပြောခဲ့ကြောင်းနှင့် သူသာ အသတ်ခံခဲ့ရပါက မားကို့စ်၊ သူ့ဇနီးနှင့် ဖိလစ်ပိုင်အောက်လွှတ်တော် ဥက္ကဌတို့ကို သတ်ဖြတ်ရန် သူ့ကို ညွှန်ကြားခဲ့ကြောင်း ပြောဆိုခဲ့သည်။

“ကျွန်မ လူတစ်ယောက်နဲ့ စကားပြောထားပါတယ်၊ ကျွန်မ အသတ်ခံရရင် ဘီဘီအမ်(မားကို့စ်) လီဇာ အေရာနက်တာ(သမ္မတကတော်) နဲ့ မာတင် ရိုမြူလ်ဒက်ဇ်(လွှတ်တော် ဥက္ကဌ) တို့ကို သတ်ပစ်လိုက်ပါလို့ ပြောခဲ့တယ်၊ နောက်နေတာမဟုတ်ဘူး၊ ရီစရာမဟုတ်ဘူးနော်” ဟု ဒူတာတေးက ပြောခဲ့ပြီး သူတို့ကို မသတ်နိုင်မချင်း တာဝန်ကို ရပ်မပစ်ရန် ပြောခဲ့ကြောင်းနှင့် သူကလည်း လိုက်နာမည်ဟု ပြန်ပြောခဲ့ကြောင်း ဆိုခဲ့သည်။

ဒူတာတေးသည် ကွန်ဂရက်၏ အောက်လွှတ်တော်ခန်းမတွင် သူ၏ အရာရှိချုပ်နှင့်အတူရှိနေခဲ့စဉ်က သူ့အနြေ့ဖင့် ရန်သူ့နယ်မြေတွင် ရောက်ရှိနေခြင်းဖြစ်သောကြောင့် လုံလုံခြုံခြုံနေထိုင်ရန် အွန်လိုင်း မှတ်ချက်ပေးသူတစ်ဦးက တိုက်တွန်းခဲ့မှုကို တုန့်ပြန်ခဲ့သည်။ သူ့အပေါ် ခြိမ်းခြောက်မှုတစ်စုံတရာရှိနေခြင်းနှင့်ပတ်သက်၍မူ ဒူတာတေးက ဖွင့်ဟပြောဆိုသွားခြင်း မရှိပေ။

ဒုသမ္မတ၏ ရှင်းလင်းပြတ်သားသော ထုတ်ဖော်ပြောဆိုချက်အရ သူ့အပေါ် လုပ်ကြံမှုတစ်ခု အောင်မြင်ခဲ့လျှင် သမ္မတကို လုပ်ကြံသတ်ဖြတ်ရန် သဘောတူစာချုပ်ထားသည့် သဘောဖြစ်ကြောင်းနှင့် အမှုဆောင်အတွင်းဝန်က အဆိုပါ ခြိမ်းခြောက်မှုနှင့်ပတ်သက်ပြီး သင့်တော်သော အရေးယူဆောင်ရွက်မှု ချက်ချင်းလုပ်ဆောင်ရန် သမ္မတလုံခြုံရေးကွပ်ကဲမှုအဖွဲ့ထံ လွှဲပြောင်းခဲ့သည်ဟု သမ္မတ၏ ဆက်သွယ်ရေးရုံးက တုန့်ပြန်ပြောဆိုခဲ့သည်။

သမ္မတရုံး၏ ထုတ်ပြန်ချက်နှင့် ပတ်သက်၍ မှတ်ချက်ပေးရန် တောင်းဆိုခဲ့မှုအပေါ် ဒူတာတေး၏ရုံးက လတ်တလော တုန့်ပြန်ဖြေကြားခြင်း မရှိသေးဟု သိရသည်။

Ref: စီအင်န်အင်န်