မြန်မာ့သမိုင်းဦး ပျူခေတ်ဗိသုကာလက်ရာများထဲမှ ထူးခြားသည့် ဆလင်ဒါပုံသဏ္ဌာန်အခြေခံ ငှက်ပျောဖူးပုံရှိသော ဘောဘောကြီးစေတီတော်သည် နှစ်ပေါင်းထောင်ချီသက်တမ်းရှိပြီ ဖြစ်သည်။ အဆိုပါစေတီတော်သည် ရာဇဝင်သမိုင်းများအရ သရေခေတ္တရာမင်းဆက်၏ ဒွတ်တပေါင်မင်းကြီးနှင့် ဗိဿနိုးဘုရင်မ ပန်ထွာမိဖုရားတို့၏ “ပွေးဖို၊ ပွေးမ” ဘဝအကြောင်းအရာများနှင့် ဆက်စပ်ပြီး လူသိများထင်ရှားသည့် စေတီတော်တစ်ဆူလည်း ဖြစ်သည်။
ငလျင်ဒ_ဏ်ကြောင့် စေတီတော်၏ လုံးပတ်နေရာများတွင် အက်ကွဲကြောင်းများ ဖြစ်ပေါ်ခဲ့သည့်အပြင်၊ စေတီကိုယ်ထည်ပေါ်၌ ပေါက်ရောက်နေသော ညောင်ပင်ငယ်များသည်လည်း ရေရှည်တွင် အဆောက်အအုံကြံ့ခိုင်မှုကို ထိခိုက်စေနိုင်သည့်အတွက် ထိန်းသိမ်းပြုပြင်ရန် လိုအပ်သည့်အခြေအနေသို့ ရောက်ရှိနေခြင်းဖြစ်သည်။
အဆိုပါ ပြုပြင်ထိန်းသိမ်းမှုလုပ်ငန်းခွင်ကို ဧပြီ ၂၇ ရက်က ပဲခူးတိုင်းဒေသကြီး ဝန်ကြီးချုပ် လာရောက်ကြည့်ရှုစစ်ဆေးခဲ့ရာ ရှေးဟောင်းသုတေသနပညာရှင်များနှင့် တာဝန်ရှိသူများက စေတီတော်ကြီး၏ အက်ကွဲကြောင်းများကို စနစ်တကျဖာထေးနေမှုနှင့် ညောင်ပင်များဖယ်ရှားနေသည့် အခြေအနေများကို ရှင်းလင်းတင်ပြခဲ့ကြသည်။
တိုင်းဒေသကြီး ဝန်ကြီးချုပ်က မိုးရာသီမရောက်မီ အက်ကွဲကြောင်းများအတွင်း မိုးရေဝင်ရောက်ပြီး ပိုမိုမပျက်စီးစေရန် အချိန်မီအပြီးသတ်ရန် မှာကြားခဲ့သည်။ ထို့ပြင် အနီးနားရှိ ဘုရားကြီးနှင့် ဘုရားမာစေတီတော်များကိုလည်း ကြံ့ခိုင်မှုစစ်ဆေး၍ လိုအပ်သည်များ ဆက်လက်ပြင်ဆင်သွားရန် ညွှန်ကြားခဲ့သည်။
ယခုကဲ့သို့ စနစ်တကျ ပြုပြင်ထိန်းသိမ်းနေခြင်းကြောင့် ပြည်မြို့သို့ လာရောက်ကြသည့် ခရီးသွားများနှင့် ဘုရားဖူးပြည်သူများအနေဖြင့် သမိုင်းဝင်အမွေအနှစ်များကို ပိုမိုစိတ်အေးချမ်းသာစွာ ဖူးမြော်နိုင်တော့မည်ဖြစ်သည်။