ရန်ကုန်၊ ဩဂုတ် ၄
လျှပ်စစ်ကျွမ်းကျင်မှု အခြေခံသင်တန်းအမှတ်စဉ် (၁/၂၀၂၆) ကို ရန်ကုန်တိုင်းဒေသကြီး၊ မရမ်းကုန်းမြို့နယ် ကျိုက်ဝိုင်းရှိ လျှပ်စစ်စစ်ဆေးရေး သင်တန်းခန်းမ၌ ဩဂုတ် ၃ ရက်က စတင်ဖွင့်လှစ်ခဲ့ပြီး သင်တန်းတွင် ဘာသာရပ် ၁၉ မျိုးကို လျှပ်စစ်စစ်ဆေးရေးဌာနမှ အတွေ့အကြုံရှိ စစ်ဆေးရေးမှူးများနှင့် ဝန်ထမ်းများက သင်ကြား ပို့ချသွားမည်ဖြစ်ကြောင်း စက်မှုနှင့် အသေးစား၊ အငယ်စား၊ အလတ်စား စီးပွားရေးလုပ်ငန်းများ ဖွံ့ဖြိုးတိုးတက်ရေးဝန်ကြီးဌာန ပြည်ထောင်စုဝန်ကြီး ဒေါက်တာချာလီသန်းက ပြောကြားခဲ့သည်။
ယခုသင်တန်းတွင် ဆိုလာဓာတ်အားပေးစနစ်နှင့် ပတ်သက်သည့် အခြေခံနည်းပညာနှင့် ဗဟုသုတများကိုပါ သီးခြားခေါင်းစဉ်တစ်ခုအနေဖြင့် ထည့်သွင်းသင်ကြားပေးမည် ဖြစ်သည်။
ပြည်ထောင်စုဝန်ကြီးက နိုင်ငံစီးပွားရေး ဖွံ့ဖြိုးတိုးတက်ရန် စက်မှုကုန်ထုတ်လုပ်ငန်းများနှင့် MSME များ ဖွံ့ဖြိုးရန် လိုအပ်ကြောင်း၊ ထုတ်လုပ်မှုလုပ်ငန်းများ အဆင်ပြေစေရန် လျှပ်စစ်စက်ပစ္စည်းများ အန္တရာယ်ကင်းရှင်းစွာ လည်ပတ်နိုင်ရေး၊ စနစ်တကျ ကိုင်တွယ်တပ်ဆင်ပြင်ဆင်နိုင်ရေးတို့အတွက် အဆင့်မီမီ တတ်ကျွမ်းသော လျှပ်စစ်ကျွမ်းကျင်သူများ ပေါ်ထွက်လာရန် အရေးကြီးကြောင်း ထည့်သွင်းပြောကြားခဲ့သည်။
အဆိုပါ သင်တန်းကို လျှပ်စစ်အခြေခံသဘောတရားများ၊ လျှပ်စစ်ဥပဒေ၊ နည်းဥပဒေများနှင့် လုပ်ထုံးလုပ်နည်းများကို သိရှိနားလည်လာစေရန်၊ လျှပ်စစ်အန္တရာယ်ကင်းရှင်းစွာ ကျွမ်းကျင်စွာ ဆောင်ရွက်နိုင်ရန်နှင့် အလုပ်အကိုင် အခွင့်အလမ်းများနှင့် လူ့စွမ်းအားအရင်းအမြစ် ဖွံ့ဖြိုးတိုးတက်စေရန် ရည်ရွယ်၍ ဖွင့်လှစ်ခြင်းဖြစ်သည်။
သင်တန်းသို့ သင်တန်းသား၊ သင်တန်းသူ ၈၅ ဦး တက်ရောက်နေပြီး သင်တန်းကာလမှာ ဩဂုတ် ၃ ရက်မှ စက်တင်ဘာ ၁၁ ရက်အထိ ရက်သတ္တ ၆ ပတ်ကြာ သင်ကြားပို့ချသွားမည်ဖြစ်ကြောင်း သိရသည်။