လျှပ်စစ်နှင့် စွမ်းအင်ဝန်ကြီးဌာနသည် စွမ်းအင်အရင်းအမြစ်မျိုးစုံမှ ဓာတ်အားများကို စိစစ်ထုတ်လုပ်၍ ဧပြီ ၂၂ ရက်မှစတင်ကာ လျှပ်စစ်ဓာတ်အားဖြန့်ဖြူးမှုကို အဆင့်ဆင့်တိုးမြှင့်ဆောင်ရွက်လျက်ရှိကြောင်း သိရသည်။
ထိုသို့ တိုးမြှင့်ဆောင်ရွက်မှုများကြောင့် လက်ရှိတွင် နိုင်ငံတစ်ဝှမ်းရှိ မြို့နယ်များသို့ နေ့စဉ် လျှပ်စစ်ဓာတ်အား ဖြန့်ဖြူးပေးနိုင်မှုမှာ ယူနစ်(၅၉ ဒသမ ၄)သန်းမှ ယူနစ်(၇၀)သန်းအထိ ရောက်ရှိလာခဲ့ကြောင်း သိရသည်။
ယင်းအပြင် လျှပ်စစ်ဓာတ်အား အမြင့်ဆုံးသုံးစွဲသည့် ဧပြီနှင့် မေကာလများအတွင်း ယခုနှစ်၏ ဖြန့်ဖြူးပေးနိုင်မှုသည် ယမန်နှစ်ကာလတူထက် ပိုမိုတိုးမြင့်လာကြောင်းလည်း ဝန်ကြီးဌာနက ထုတ်ပြန်ထားသည်။
လက်ရှိအချိန်တွင် လျှပ်စစ်ဓာတ်အားပြတ်တောက်မှုများ မကြာခဏဖြစ်ပေါ်နေခြင်းကို လျော့နည်းစေရန် ဒေသအလိုက် ဓာတ်အားလိုင်းများနှင့် ဓာတ်အားခွဲရုံများ၏ ဝန်အားခံနိုင်ရည်အပေါ် မူတည်၍ ပြည်သူများ လျှပ်စစ်ဓာတ်အား ပိုမိုအသုံးပြုနိုင်ရေးကို အဆင့်လိုက် ဆောင်ရွက်လျက်ရှိကြောင်း သိရသည်။
ထို့ပြင် ပြည်သူ့ဆေးရုံကြီးများ၊ အရေးကြီးဌာနဆိုင်ရာများ၊ LNG ဖြင့် ဓာတ်အားရယူထားသည့် စက်မှုဇုန်များနှင့် စီးပွားရေးလုပ်ငန်းများသို့ အချိန်ပြည့် လျှပ်စစ်ဓာတ်အား ဖြန့်ဖြူးပေးထားပြီး ရုံးပိတ်ရက်များတွင်လည်း အများပြည်သူထံ လျှပ်စစ်ဓာတ်အား ပိုမိုဖြန့်ဖြူးပေးလျက်ရှိကြောင်း သိရသည်။
လျှပ်စစ်ဓာတ်အားစနစ်နှင့်ပတ်သက်၍ နိုင်ငံတော်နှင့် ပြည်သူများ နစ်နာမှုများရှိပါက သက်ဆိုင်ရာ Call Center များ၏ ဖုန်းနံပါတ်များသို့ ဆက်သွယ်၍ အကြံပြုခြင်းနှင့် တိုင်ကြားခြင်းများ ပြုလုပ်နိုင်ကြောင်း လျှပ်စစ်နှင့် စွမ်းအင်ဝန်ကြီးဌာနက အသိပေးထားသည်။