ချင်းရိုင်ပြည်နယ်ရှိ မဲဆွယ်စည်းရုံးပွဲတစ်ခုတွင် ပြောဆိုခဲ့သော လူမျိုးရေးခွဲခြားသည့် မှတ်ချက်ပြုပြောစကားများကြောင့် ထိုင်းဝန်ကြီးချုပ်ဟောင်း သက်ဆင်ရှင်နာဝပ်ထရာကို ဒေါသတကြီးဝေဖန်မှုများထွက်ပေါ်ခဲ့ကာ အဆင်အခြင်မဲ့သော အဆိုပါ ပြောကြားများအတွက် လူသိရှင်ကြားတောင်းပန်ရန် လွှတ်တော်အမတ်တစ်ဦးကလည်း သူ့ကို တောင်းဆိုခဲ့သည်။
ချင်းရိုင်ပြည်နယ်အုပ်ချုပ်ရေးအဖွဲ့(PAO)ကပြုလုပ်သော ရွေးကောက်ပွဲတွင် ပါဝင်ယှဉ်ပြိုင်နေသည့် ဖြူထိုင်းပါတီ ကိုယ်စားလှယ်လောင်း Salakjit Tiyapairat အတွက် ထောက်ခံအားပေးသည့် မဲဆွယ်စည်းရုံးပွဲတွင် သက်ဆင်က မိန့်ခွန်းပြောခဲ့ရာ၌ ဖျော်ဖြေရေးနယ်ပယ်တွင် ထိုင်းလူမျိုးများ ပိုမို၍ အခွင့်အလမ်းရှာကြရန် အားပေးတိုက်တွန်းမှုလုပ်ခဲ့သည်။
သို့ရာတွင် သူ့မိန့်ခွန်းအတွင်း အာဖရိကမော်ဒယ်များနှင့်ပတ်သက်၍ ချိုးချိုးဖဲ့ဖဲ့ပြောဆိုခဲ့မှုများကို လူမျိုးရေးခွဲခြားမှုအဖြစ် အများက ရှုမြင်ခဲ့ကြသည်။
“အသားမည်းပြီး အသက်ရှုရခက်စေတဲ့ နှာခေါင်းပြားတဲ့ အာဖရိကသားတွေကို မော်ဒယ်လုပ်ဖို့ ဘတ်သန်းနဲ့ချီပေးပြီး ငှားရပါတယ်။ ထိုင်းလူမျိုးတွေက အများကြီးပိုကြည့်ပျော်ရှုပျော်ရှိကြပါတယ်၊ နှာခေါင်း၊ မေးရိုးနဲ့ ရင်သားတွေကို ပြုပြင်ဖြည့်စွက်စရာ မလိုအပ်ကြပါဘူး” သက်ဆင်က ပြောခဲ့သည်။
“ကရင်လို တိုင်းရင်းသား လူမျိုးစုတွေထဲက လူတွေ အပါအဝင် သဘာဝအလှတရားတွေကို ပိုင်ဆိုင်ထားကြတဲ့ ထိုင်းနိုင်ငံသားတွေကို နိုင်ငံတကာမော်ဒယ်တွေဖြစ်လာအောင် အားပေးတိုက်တွန်းဖို့ အချိန်တန်ပါပြီ” ဟု သူက ဆက်လက်ပြောဆိုသွားခဲ့သည်။
အဆိုပါစကားများအတွက် သက်ဆင်အနေဖြင့် လူသိရှင်ကြား တောင်းပန်ရန် လွှတ်တော်အမတ် Angkhana Neelapaijit က တနင်္လာနေ့တွင် တောင်းဆိုခဲ့သည်။
“ဒီလိုမှတ်ချက်တွေက ဖွဲ့စည်းပုံအခြေခံဥပဒေကို ရော ထိုင်းနိုင်ငံအပါအဝင် နိုင်ငံတကာအဖွဲ့အစည်းအသီးသီးရဲ့ စံနှုန်းတွေကိုရော ချိုးဖောက်ရာရောက်ပါတယ်” ဟု သူက ဆိုသည်။
“လူ တွေရဲ့ အသားအရောင်အပေါ်အခြေခံပြီး ခွဲခြားတာဟာ ပြဿနာကြီးတစ်ခုပါ၊ သက်ဆင်အနေနဲ့ သူ့ရဲ့မှတ်ချက်တွေအတွက် တောင်းပန်စေချင်ပါတယ်” ဟု သူက ဆက်လက်ပြောဆိုခဲ့သည်။
ထို့အပြင် နိုင်ငံတော်လူ့အခွင့်အရေးကော်မရှင်အဖွဲ့ဝင်ဟောင်းလည်းဖြစ်သူ မစ္စ Angkhana က သက်ဆင်၏ သမီးဖြစ်သူ ဝန်ကြီးချုပ် ပေတုံတန်ရှင်နာဝပ်ထရာအနေဖြင့် ယခုကိစ္စအပေါ် အလေးအနက်ထားသင့်ကြောင်းလည်း တိုက်တွန်းသွားခဲ့သည်။
Ref: ဘန်ကောက်ပို့စ်