လာအိုနိုင်ငံ နိုင်ငံတော်အဆင့် ချစ်ကြည်ရေးခရီးစဉ်မှ ပြန်လည်ရောက်ရှိလာသော နိုင်ငံတော်သမ္မတ ဦးမင်းအောင်လှိုင်နှင့် ဇနီးတို့အား ဂုဏ်ပြုကြိုဆို

လာအိုနိုင်ငံသမ္မတ H.E. Mr. Thongloun Sisoulith ၏ ဖိတ်ကြားချက်အရ လာအိုနိုင်ငံသို့ နိုင်ငံတော်အဆင့် ချစ်ကြည်ရေးခရီးစဉ် သွားရောက်ခဲ့သော နိုင်ငံတော်သမ္မတ ဦးမင်းအောင်လှိုင်နှင့် ဇနီး ဒေါ်ကြူကြူလှတို့ ဦးဆောင်သည့် မြန်မာအဆင့်မြင့်ကိုယ်စားလှယ်အဖွဲ့သည် ယနေ့ ဇူလိုင် ၅ ရက် ညနေပိုင်းတွင် အထူးလေယာဉ်ဖြင့် နေပြည်တော်တပ်မတော်လေဆိပ်သို့ ပြန်လည်ရောက်ရှိလာရာ တာဝန်ရှိသူများက ဂုဏ်ပြုကြိုဆိုခဲ့ကြသည်။

သုံးရက်ကြာ ချစ်ကြည်ရေးခရီးစဉ်အတွင်း နိုင်ငံတော်သမ္မတသည် ဇူလိုင် ၃ ရက်တွင် လာအိုနိုင်ငံသမ္မတ၊ ဝန်ကြီးချုပ်နှင့် အမျိုးသားလွှတ်တော်ဥက္ကဋ္ဌတို့အား တွေ့ဆုံဆွေးနွေးခဲ့ပြီး နှစ်နိုင်ငံပူးပေါင်းဆောင်ရွက်ရေးဆိုင်ရာ နားလည်မှုစာချွန်လွှာ (MoU) များ လဲလှယ်ခြင်း၊ သဘောတူညီချက်များ လက်မှတ်ရေးထိုးခြင်း အခမ်းအနားများသို့ တက်ရောက်ခဲ့သည်။ ထို့ပြင် လာအိုနိုင်ငံသမ္မတက တည်ခင်းဧည့်ခံသည့် နိုင်ငံတော်ဂုဏ်ပြု ညစာစားပွဲသို့လည်း တက်ရောက်ခဲ့သည်။

ယင်းနေ့တွင်ပင် နိုင်ငံတော်သမ္မတ ဦးမင်းအောင်လှိုင်နှင့် ဇနီးတို့သည် ဗီယင်ကျန်းမြို့ရှိ အညတရသူရဲကောင်းစစ်သည်ဗိမာန်၌ သူရဲကောင်းစစ်သည်များအား ဂုဏ်ပြုပန်းခွေချ၍ ဂါရဝပြုအလေးပြုခဲ့ကြသည်။ ထို့အပြင် နိုင်ငံတော်သမ္မတ၏ ဇနီး ဒေါ်ကြူကြူလှသည် လာအိုအနုပညာပြတိုက်နှင့် လာအိုရိုးရာပိုးထည်ပြတိုက်တို့ကို သွားရောက်ကြည့်ရှုလေ့လာခဲ့သည်။

ဇူလိုင် ၄ ရက်တွင် နိုင်ငံတော်သမ္မတနှင့် ဇနီးတို့သည် လာအိုနိုင်ငံ၏ အထွတ်အမြတ်ထားရာ သက်လွမ်စေတီတော်မြတ်၌ ဆွမ်း၊ ပန်း၊ ရေချမ်း၊ သစ်သီးနှင့် ဆီမီးများ ဆက်ကပ်ပူဇော်ခဲ့ပြီး ဧည့်သည်တော်မှတ်တမ်းစာအုပ်တွင် လက်မှတ်ရေးထိုးခဲ့သည်။ ထို့နောက် သက်လွမ်စေတီတော် ဓမ္မခန်းမ၌ လာအိုဗုဒ္ဓဘာသာအသင်းဗဟိုဥက္ကဋ္ဌနှင့် လာအိုနိုင်ငံ သံဃရာဇာဘုန်းတော်ကြီး Maha Ahjan Yai Mahaved Menenai နှင့် သက်တော် (၁၀၆) နှစ်ရှိ Most Ven. Noi Sangvalo တို့အား ဖူးမြော်ကြည်ညိုကာ လှူဖွယ်ပစ္စည်းများ ဆက်ကပ်လှူဒါန်းခဲ့သည်။

ထို့အပြင် လာအိုနိုင်ငံ၏ အမျိုးသားအထိမ်းအမှတ် Patuxai (Victory Gate) အဆောက်အအုံနှင့် အတွင်းရှိ အနုပညာလက်ရာများကိုလည်း လေ့လာကြည့်ရှုခဲ့ကြသည်။ ယင်းနောက် လာအို-မြန်မာချစ်ကြည်ရေးအသင်းဥက္ကဋ္ဌ၊ မြန်မာသံရုံးနှင့် စစ်သံရုံးဝန်ထမ်းများ၊ ပညာသင်တပ်မတော်အရာရှိများနှင့် တွေ့ဆုံခဲ့ပြီး လာအိုနိုင်ငံ၏ ရိုးရာပိုးထည်နှင့် လက်မှုပညာအခြေပြု အသေးစားနှင့် အလတ်စားစက်မှုလုပ်ငန်းများ (SMEs) ဖြစ်သည့် Phontong Handicrafts Cooperative နှင့် CAMACrafts တို့ကိုလည်း သွားရောက်လေ့လာခဲ့သည်။

ဇူလိုင် ၅ ရက်တွင် နိုင်ငံတော်သမ္မတနှင့် ဇနီးတို့သည် လွန်ပရာဘန်မြို့ရှိ သမိုင်းဝင်ယဉ်ကျေးမှုအမွေအနှစ်နေရာများ၊ တော်ဝင်နန်းတော်ပြတိုက်နှင့် ဒေသထင်ရှားနေရာများကို သွားရောက်လေ့လာခဲ့ပြီး လွန်ပရာဘန်ပြည်နယ်ပါတီကော်မတီအတွင်းရေးမှူး H.E. Mr. Bounleuam Manivong နှင့် တွေ့ဆုံကာ ဂုဏ်ပြုနေ့လယ်စာအခမ်းအနားသို့ တက်ရောက်ခဲ့သည်။

သုံးရက်တာ ချစ်ကြည်ရေးခရီးစဉ်အတွင်း နိုင်ငံတော်သမ္မတ ဦးမင်းအောင်လှိုင်သည် လာအိုနိုင်ငံခေါင်းဆောင်များ၊ အစိုးရတာဝန်ရှိသူများနှင့် တွေ့ဆုံဆွေးနွေးကာ နှစ်နိုင်ငံအကြား နိုင်ငံရေး၊ စီးပွားရေး၊ ကုန်သွယ်ရေး၊ ရင်းနှီးမြှုပ်နှံမှု၊ စွမ်းအင်၊ စိုက်ပျိုးရေး၊ ခရီးသွားလုပ်ငန်း၊ ယဉ်ကျေးမှုနှင့် ပြည်သူအချင်းချင်း ဆက်ဆံရေးကဏ္ဍများတွင် ပူးပေါင်းဆောင်ရွက်မှုများ ပိုမိုတိုးမြှင့်နိုင်ရေးအတွက် ဆွေးနွေးမှုများနှင့် အစီအစဉ်အမျိုးမျိုးကို ဆောင်ရွက်ခဲ့ကြောင်း သိရသည်။