နိုင်ငံတော်မှ အကြမ်းဖက်အဖွဲ့အဖြစ်ကြေညာထားသည့် TNLA သည် နိုဝင်ဘာ ၂၅ ရက်က တွေ့ဆုံဆွေးနွေးမှုများပြုလုပ်လိုကြောင်း ထုတ်ပြန်ပြီးနောက် ရက်ပိုင်းမျှအကြာတွင် MNDAA မှလည်း ယနေ့ ဒီဇင်ဘာ ၃ ရက်တွင် လက်ရှိစစ်ရေးပဋိပက္ခများအား အပစ်အခတ်ရပ်စဲ၍ နိုင်ငံရေးနည်းလမ်းဖြင့်ဖြေရှင်းလိုသည်ဟု ထုတ်ပြန်လာခဲ့သည်။
အဆိုပါထုတ်ပြန်ချက်သည် MNTJP/MNDAA ၏ ရပ်တည်ချက်နှင့်သဘောထားဖြစ်ကြောင်း ဖော်ပြထားပြီး တိုက်ပွဲများဖော်ဆောင်ခဲ့သည့် ဒေသများရှိပြည်သူလူထု၏ အကျိုးကို ငဲ့ညှာထောက်ထားရန်အပါအဝင် တရုတ်-မြန်မာ နယ်စပ်တည်ငြိမ်အေးချမ်းရန်၊ စစ်ရေးပဋိပက္ခများကို နိုင်ငံရေးနည်းလမ်းဖြင့် ဖြေရှင်းနိုင်ရန် ရည်ရွယ်ကြောင်း ဖော်ပြထားသည်။
၎င်းတို့သည် နိုင်ငံတော်မှခွဲထွက်၍ နိုင်ငံတော်အသစ်ထူထောင်ခြင်းပြုလုပ်မည်မဟုတ်ဘဲ စစ်မှန်သောကိုယ်ပိုင်အုပ်ချုပ်ခွင့်ရဒေသကိုသာ တောင်းဆိုခြင်းဖြစ်သည်ဟုဆိုသည်။
ယနေ့မှစ၍ ရောက်ရာနေရာမှ ချက်ချင်းအပစ်အခတ်ရပ်စဲ၍ တပ်မတော်အားအစပြုထိုးစစ်ဆင်တိုက်ခိုက်မည်မဟုတ်ကြောင်း၊ တရုတ်နိုင်ငံ၏ ကြားဝင်စေ့စပ်ကြိုးပမ်းဆောင်ရွက်မှုအောက်တွင် လားရှိုးအပါအဝင် သက်ဆိုင်ရာကိစ္စများ၌ တွေ့ဆုံဆွေးနွေးသောနည်းလမ်းဖြင့်ဖြေရှင်းနိုင်မည်ကို မျှော်လင့်ကြောင်း ဖော်ပြထားသည်။
ထို့ပြင် တပ်မတော်မှဖော်ဆောင်နေသည့် ဝေဟင်နှင့်မြေပြင်ထိုးစစ်ဆင်တိုက်ခိုက်နေမှုများကို ရပ်ဆိုင်းပေးရန် တောင်းဆိုထားပြီး MNDAA အနေဖြင့် နိုင်ငံရေးနည်းလမ်းကို အားပေးထောက်ခံသော်လည်း မိမိကိုယ်ကိုခုခံကာကွယ်ခွင့်အား ယခင်နည်းတူဆက်လက်စွဲကိုင်သွားမည်ဟု ဆိုသည်။
တွေ့ဆုံဆွေးနွေးခွင့်ရပါက နှစ်ဦးနှစ်ဖက်ကြားရှိပဋိပက္ခများနှင့်အမြင်သဘောထားကွဲလွဲမှုများအား နိုင်ငံရေးနည်းလမ်းဖြင့်ဖြေရှင်းသွားနိုင်မည်ကို မျှော်လင့်သည်ဟုလည်း ရေးသားထားသည်။
