ရှီ အမေရိကသို့ လာမည်ဟု မျှော်လင့်–ထရမ့်ပ်

တရုတ်သမ္မတ ရှီကျင့်ဖျင်သည် အမေရိကန်ပြည်ထောင်စုသို့ လာရောက်မည်ဟု သူမျှော်လင့်ထားကြောင်း ခရီးစဉ်အချိန်ကာလကို မဖော်ပြဘဲ သမ္မတ ဒေါ်နယ်ထရမ့်ပ်က ဗုဒ္ဓဟူးနေ့တွင် ပြောကြားခဲ့သည်။

ထရမ့်ပ်က အဲရ်ဖို့စ်ဝမ်းပေါ်တွင် သတင်းထောက်များကို ယင်းကဲ့သို့ မှတ်ချက်ပြု ပြောကြားခဲ့ခြင်းဖြစ်ပြီး အမေရိက-တရုတ် ကုန်သွယ်ရေးသဘောတူညီချက်အသစ်တစ်ခု ရနိုင်ဖွယ်ရှိသည်ဟုလည်း ပြောဆိုသွားသည်။ ရှီနှင့် ထရမ့်ပ်အကြား စကားပြောဆိုခြင်းသို့မဟုတ် အဆက်အသွယ်ရှိခြင်းသည် ကုန်သွယ်မှု အခွန်အခများကို ဖြေလျှော့ခြင်း သို့မဟုတ် ဆိုင်းငံ့ခြင်းတို့ ဖြစ်နိုင်ခြေအတွက် အရေးပါသည်ဟု ရှုမြင်ကြသည်။

ရှီသည် ၂၀၂၃ ခုနှစ် နိုဝင်ဘာလအတွင်းက အမေရိက သို့ နောက်ဆုံးအကြိမ်သွားရောက်ခဲ့ပြီး တရုတ်သမ္မတအဖြစ် အမေရိကသို့ ပဉ္စမြောက် ခရီးစဉ်လည်းဖြစ်ကာ ယခင်သမ္မတ ဂျိုးဘိုင်ဒင်နှင့် ထိပ်သီးအစည်းအဝေးပြုလုပ်ခဲ့သည်။ ယင်းအစည်းအဝေးအတွင်း စစ်တပ်ချင်း ဆက်သွယ်မှုများ ပြန်လည်စတင်ရန်နှင့် ဖန်တနိုင်း မူ_းယစ်ဆေးဝါးထုတ်လုပ်မှု တားမြစ်ရေးတို့ကို သဘောတူညီချက်ရခဲ့သည်။

ထရမ့်ပ်နှင့် ရှီသည် ဇန်နဝါရီ ၂၀ ရက် ထရမ့်ပ် ရာထူးစတင်မထမ်းဆောင်မီလေးတွင် ဖုန်းဆက်ပြောဆိုခဲ့ပြီး TikTok ၊ ကုန်သွယ်ရေးနှင့် ထိုင်ဝမ်အရေးကိစ္စတို့ကို ဆွေးနွေးခဲ့ကြသည်။

တရုတ်မိခင်ကုမ္ပဏီ ByteDance က ပိုင်ဆိုင်သော နာမည်ကျော် အက်ပ်ကို ရောင်းချရန်အတွက် အမေရိကန်ပြည်ထောင်စုက ကြားဝင်ညှိနှိုင်းနေစဉ်ကာလတွင် TikTok နှင့် ပတ်သက်၍ တရုတ်နှင့် သူ ပြောဆိုဆွေးနွေးနေသည်ဟု ဗုဒ္ဓဟူးနေ့တွင် ထရမ့်ပ်က သတင်းထောက်များကို ပြောကြားခဲ့သည်။

သူ တာဝန်ထမ်းဆောင်ပြီးနောက် ပထမဆုံးအကြိမ်အဖြစ် ပြီးခဲ့သည့် သီတင်းပတ်က သူ ရှီနှင့် စကားပြောဆိုခဲ့ကြောင်း ထရမ့်ပ်က ပြောခဲ့သော်လည်း ပြောဆိုခဲ့သည့် အကြောင်းအရာ အသေးစိတ်ကို ထုတ်ပြောခဲ့ခြင်းမရှိပေ။

Ref: ယူအက်စ်နူးစ်