၂၀၂၅ ခုနှစ်အတွင်း ရွေးကောက်ပွဲ ကျင်းပမည်ဟု နစက ဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က ပြောကြားထားပြီး အဆိုပါ ရွေးကောက်ပွဲမကျင်းပမီအချိန်အတွင်း အားလုံးပါဝင်သည့် တွေ့ဆုံဆွေးနွေးပွဲတစ်ရပ် ကျင်းပသင့်သည်ဟု တင်ပြဆွေးနွေးခဲ့ကြောင်း ရခိုင့်ဦးဆောင်ပါတီ ဥက္ကဋ္ဌ ဒေါက်တာအေးမောင်က ပြောသည်။
အဆိုပါ တင်ပြမှုကို ယခင်ကလည်း လုပ်ဆောင်ခဲ့ဖူးသလို ပြီးခဲ့သည့် ဇန်နဝါရီ (၂၄) ရက်က နေပြည်တော်တွင် NSPNC နှင့် တွေ့ဆုံစဉ် အထွေထွေကဏ္ဍ၌လည်း ထပ်မံတင်ပြခဲ့ကြောင်း ၎င်းကဆိုသည်။
” ရွေးကောက်ပွဲ မတိုင်ခင်မှာ အားလုံးပါဝင်တဲ့ တွေ့ဆုံဆွေးနွေးပွဲတစ်ခုနဲ့ ဒီရွေးကောက်ပွဲကြီး တည်ငြိမ်အေးချမ်းစွာ ပြီးပြီးမှ အားလုံးလက်ခံတဲ့ ရွေးကောက်ခံအစိုးရတစ်ရပ် ပေါ်ထွက်လာအောင် လမ်းဖွင့်ပေးရင် မကောင်းဘူးလား ဆိုတဲ့ ဘက်နဲ့တော့ ကျွန်တာ်တို့ တင်ပြတာ ရှိပါတယ်။ တနည်းအားဖြင့် တွေ့ဆုံဆွေးနွေးပြီးမှ အားလုံးပါဝင်တဲ့ အားလုံးလက်ခံတဲ့ ၂၀၀၈ ဖွဲ့စည်းပုံအခြေခံ ဥပဒေအရ တည်ငြိမ်အေးချမ်းစွာဖြင့် အစိုးရတစ်ရပ်ကိုအပြောင်းအလဲလုပ်နိုင်တဲ့ အနေအထားဖြစ်အာင် လက်နက်ကိုင်အဖွဲ့အစည်းများနဲ့ သဘောတူညီမှု ကြိုတင်ရနိုင်ခဲ့ရင်မကောင်းဘူးလား ဆိုတဲ့ဘက်နဲ့တော့ တင်ပြဖူးပါတယ်။ ဒါလည်းပဲ ဆက်ပြီးတော့ ကြည့်ရမယ့်အနေအထားပါ” ဟု ဒေါက်တာအေးမောင်က ပြောသည်။
လက်ရှိအခြေအနေများကို ကျော်လွှားနိုင်ရန် လတ်တလောကြုံတွေ့နေရသည့် ပဋိပက္ခများကို နိုင်ငံရေးနည်းအရ တွေ့ဆုံဆွေးနွေး အဖြေရှာကြရန် ပြည်တွင်းနိုင်ငံရေး အင်အားစုများကလည်း အကြံပြုမှုများရှိနေခြင်း ဖြစ်သည်။
ပြီးခဲ့သည့် ၂၀၂၄ ခုနှစ် စက်တင်ဘာလအတွင်းက ငွေဆောင်တွင် ပြုလုပ်ခဲ့သည့် ပြည်တွင်းနိုင်ငံရေး အင်အားစုများ၏ တွေ့ဆုံမှု၌လည်း အဆိုပါ အားလုံးပါဝင်သည့် တွေ့ဆုံဆွေးနွေးမှု လုပ်ဆောင်ရန်ဆိုသည့် အကြံပြုချက်ပါဝင်သည့် သဘောတူညီမှုတစ်ရပ် ထွက်ပေါ်ခဲ့ပြီး ယင်းသဘောတူညီချက်များကို သက်ဆိုင်ရာ ဘက်အသီးသီးသို့ တင်ပြသွားမည်ဆိုသည့်သဘောမျိုး ငွေဆောင်ဆွေးနွေးပွဲ၌ ပါဝင်ခဲ့သူများဘက်က ထုတ်ဖော်ပြောဆိုထားသည်ကို တွေ့ရသည်။
အလားတူ အာဆီယံ အပါအဝင် နိုင်ငံတကာအသိုင်းအဝိုင်းကလည်း မြန်မာနိုင်ငံတွင် ဖြစ်ပေါ်နေသည့် ပဋိပက္ခများ အမြန်ဆုံးပြေလည်နိုင်စေရန် အားလုံးပါဝင်သည့် တွေ့ဆုံဆွေးနွေးမှုဖြင့် အဖြေရှာရန် တိုက်တွန်းမှုများ ရှိနေသည့် အခြေအနေဖြစ်သည်။
အမေရိကန် ၊ ဥရောပသဂ္ဂ အပါအဝင် အနောက်နိုင်ငံ အချို့ကလည်း နိုင်ငံရေးအကျဥ◌်းသားများကိုလွှတ်ပေးကာ ပါဝင်သင့်ပါဝင်ထိုက်သူ အားလုံးပါဝင်သည့် တွေ့ဆုံဆွေးနွေးပွဲများကျင်းပကာ လက်ရှိကြုံတွေ့နေရသည့် ပဋိပက္ခများကို အဖြေရှာရန် တိုက်တွန်းမှုများ ရှိနေသည်။
” အမှန်ကတော့ အားလုံးပါဝင်တဲ့ ဆွေးနွေးပွဲကြီးတစ်ခုကတော့ လိုအပ်ချက်ပါ။ အားလုံးပါဝင်နိုင်ခြေရှိမရှိကတော့ သူ့ရဲ့ ကိုယ့်ရဲ့ ရပ်တည်ချက်တွေနဲ့လည်း ဆိုင်ကြမယ် ထင်ပါတယ်။ ကျွန်တော်တို့ရည်မှန်းချက်ကတော့ အားလုံပါဝင်ပြီးတော့မှ မြန်မာ့နိုင်ငံရေးပြဿနာကို အတူတူရင်ဆိုင်ဖြေရှင်းကြမယ်။ ဒါကတော့ လက်ရှိ မြန်မာနိုင်ငံရေး ရေချိန်ကိုကြည့်ကြည့် သမိုင်းသင်ခန်းစာကိုကြည့်ကြည့် လိုအပ်ချက်ပါ” ဟု ဒေါက်တာအေးမောင်က ဆိုသည်။
၎င်း၏ ဆွေးနွေးတင်ပြချက်များအပေါ် NSPNC တာဝန်ရှိသူများက မှတ်သားသွားပြီး သက်ဆိုင်ရာ တာဝန်ရှိသူအဆင့်ဆင့်ကို ပြန်လည်တင်ပြသွားမည့်အခြေအနေဖြစ်ကြောင်းလည်း သိရသည်။
နစက အနေဖြင့် ၂၀၂၅ ခုနှစ်အတွင်း ပါတီစုံအထွေထွေရွေးကောက်ကျင်းပကာ အဆိုပါ ရွေးကောက်ပွဲမှ ပေါ်ထွက်လာမည့် အစိုးရသစ်အား အာဏာလွဲပေးသွားမည်ဟု ပြောဆိုထားပြီး တိုင်းပြည်၏ ပဋိပက္ခများကို နိုင်ငံရေးနည်းလမ်းဖြင့်သာ ဆွေးနွေးအဖြေရှာကြရန်နှင့် လက်နက်ကိုင်လမ်းစဉ်ကို စွန့်လွှတ်ကြရန် ပြောကြားထားမှုများလည်း ရှိနေသည်။