ဘရပ်ဆဲလ်၊ စက်တင်ဘာ ၂၂
ရုရှားဘီလျံနာစီးပွားရေးလုပ်ငန်းရှင် အလီရှာ အူစ်မာနော့ဗ်နှင့် မစ်ဟိုင်း ဖရစ်ဒ်မန်းတို့အပေါ် ချမှတ်ထားသည့် ပိတ်ဆို့အရေးယူမှုများ ရုပ်သိမ်းရေးနှင့်ပတ်သက်၍ ဥရောပသမဂ္ဂ (EU) အဖွဲ့ဝင်နိုင်ငံများအကြား အပြီးသတ်သဘောတူညီမှု မရရှိသေးကြောင်း သိရသည်။
ယူကရိန်းစစ်ပွဲနှင့်ဆက်နွှယ်၍ လူပုဂ္ဂိုလ်နှင့် အဖွဲ့အစည်းပေါင်း ၃,၀၀၀ နီးပါးအပေါ် ချမှတ်ထားသည့် EU ပိတ်ဆို့အရေးယူမှုများ သက်တမ်းတိုးရေး ဆွေးနွေးမှု၏ တစ်စိတ်တစ်ပိုင်းအဖြစ် အူစ်မာနော့ဗ်နှင့် ဖရစ်ဒ်မန်းတို့ကို ပိတ်ဆို့မှုစာရင်းမှ ဖယ်ရှားရန် ယာယီသဘောတူညီမှု ရရှိခဲ့သော်လည်း လတ်ဗီးယားက နောက်ဆုံးအဆင့်တွင် ကန့်ကွက်ခဲ့သဖြင့် အတည်ပြုနိုင်ခြင်း မရှိသေးကြောင်း သံတမန်များက ပြောသည်။
ရုရှား-ဥဇဘက်ကစ္စတန်နွယ်ဖွား ဘီလျံနာ အူစ်မာနော့ဗ်ကို ပိတ်ဆို့မှုစာရင်းမှ ဖယ်ရှားပေးရန် ပြင်သစ်နှင့် ဆလိုဗက်ကီးယားတို့က တောင်းဆိုခဲ့ပြီး လူဇင်ဘတ်ကလည်း ဖရစ်ဒ်မန်းအပေါ် ပိတ်ဆို့မှု ရုပ်သိမ်းပေးရန် တောင်းဆိုထားသည်။
သို့သော် ပိုလန်နှင့် ဘောလ်တစ်ဒေသနိုင်ငံများအပါအဝင် EU အဖွဲ့ဝင်နိုင်ငံအချို့က ရုရှားအပေါ် ဖိအားလျှော့ချခြင်းထက် ပိတ်ဆို့အရေးယူမှုများ ပိုမိုတင်းကျပ်သင့်ကြောင်း ရပ်တည်ကာ ရုရှားစီးပွားရေးလုပ်ငန်းရှင်နှစ်ဦးအပေါ် ပိတ်ဆို့မှုရုပ်သိမ်းရေးကို ကန့်ကွက်လျက်ရှိသည်။
ယူကရိန်းနိုင်ငံခြားရေးဝန်ကြီး အန်ဒရီယီ စီဘီဟာကလည်း ယခုအချိန်တွင် ရုရှားအပေါ် ပိတ်ဆို့မှုလျှော့ချခြင်းသည် မှားယွင်းသည့်အချက်ပြမှု ဖြစ်လာနိုင်ကြောင်း ဝေဖန်ကာ ပိတ်ဆို့အရေးယူမှုများ ပိုမိုတင်းကျပ်ရန် တောင်းဆိုထားသည်။
EU ၏ နိုင်ငံခြားရေးနှင့် လုံခြုံရေးမူဝါဒဆိုင်ရာ အဆင့်မြင့်ကိုယ်စားလှယ် ကာဂျာ ကားလတ်စ်ကလည်း ရုရှားအပေါ် ပိတ်ဆို့အရေးယူမှုများသည် ယူကရိန်းစစ်ပွဲအပေါ် EU ၏ တုံ့ပြန်မှုတွင် အဓိကအစိတ်အပိုင်းတစ်ခုဖြစ်ကြောင်း ပြောကြားကာ ပိတ်ဆို့မှုများ ဆက်လက်ထိန်းသိမ်းထားရန် တိုက်တွန်းထားသည်။
EU သံအမတ်ကြီးများသည် ပိတ်ဆို့အရေးယူမှု သက်တမ်းတိုးရေးနှင့် ရုရှားဘီလျံနာနှစ်ဦးကို ပိတ်ဆို့မှုစာရင်းမှ ဖယ်ရှားရေးတို့အတွက် ဘရပ်ဆဲလ်မြို့၌ ဆက်လက်ဆွေးနွေးသွားမည်ဖြစ်ကြောင်း သိရသည်။
Ref: AFP