ရုရှားနှင့် အီရန်အပေါ် ပိတ်ဆို့အရေးယူမှု တိုးချဲ့သည့် ဥပဒေကို သမ္မတထရမ့် လက်မှတ်ရေးထိုး

ဝါရှင်တန်၊ စက်တင်ဘာ ၁၉

ရုရှားနိုင်ငံအပေါ် ပိတ်ဆို့အရေးယူမှုများ တိုးချဲ့ရန်နှင့် အီရန်နိုင်ငံအပေါ် လက်ရှိပိတ်ဆို့အရေးယူမှုများကို သက်တမ်းတိုးရန် ပြဋ္ဌာန်းထားသည့် ဥပဒေကို အမေရိကန်သမ္မတ ဒေါ်နယ်ထရမ့်က စက်တင်ဘာ ၁၈ ရက်တွင် လက်မှတ်ရေးထိုးအတည်ပြုခဲ့ကြောင်း အိမ်ဖြူတော်က ထုတ်ပြန်သည်။

အဆိုပါဥပဒေမှာ H.R. 5334 “Lindsey O. Graham Sanctioning Russia and Iran Act of 2026” ဖြစ်ပြီး ကွယ်လွန်သူ အမေရိကန်အထက်လွှတ်တော်အမတ် Lindsey O. Graham ကို ဂုဏ်ပြုသည့်အနေဖြင့် အမည်ပေးထားခြင်းဖြစ်သည်။

ဥပဒေကို အမေရိကန်အောက်လွှတ်တော်က စက်တင်ဘာ ၁၆ ရက်တွင် ထောက်ခံမဲ ၂၆၂ မဲ၊ ကန့်ကွက်မဲ ၁၅၉ မဲဖြင့် အတည်ပြုခဲ့ပြီး အထက်လွှတ်တော်ကလည်း ဩဂုတ် ၇ ရက်တွင် ထောက်ခံမဲ ၈၆ မဲ၊ ကန့်ကွက်မဲ ၁၁ မဲဖြင့် အတည်ပြုထားခဲ့သည်။

ယင်းဥပဒေအရ ရုရှားအစိုးရနှင့် ဆက်နွှယ်သည့် အရာရှိများ၊ ဘဏ္ဍာရေးအဖွဲ့အစည်းများနှင့် အခြားလူပုဂ္ဂိုလ်များအပေါ် ပိတ်ဆို့အရေးယူမှုများ ချမှတ်နိုင်သည့် အမေရိကန်အစိုးရ၏ လုပ်ပိုင်ခွင့်ကို တိုးချဲ့ပေးထားသည်။

ထို့ပြင် ရုရှားနိုင်ငံမှ ရေနံနှင့် သဘာဝဓာတ်ငွေ့ အဓိကဝယ်ယူနေသည့် နိုင်ငံများအပေါ် ကုန်သွယ်ရေးဆိုင်ရာ အရေးယူမှုများ ပြုလုပ်နိုင်သည့် လုပ်ပိုင်ခွင့်များလည်း ပါဝင်ပြီး ရုရှားနှင့် ဆက်လက်စီးပွားရေးလုပ်ကိုင်နေသူများအပေါ် အရေးယူမှုများ တိုးမြှင့်နိုင်ရန် ရည်ရွယ်ထားသည်။

အဆိုပါဥပဒေတွင် အခြေအနေအချို့၌ ပိတ်ဆို့အရေးယူမှုများမှ ကင်းလွတ်ခွင့်ပေးနိုင်သည့် လုပ်ပိုင်ခွင့်ကို သမ္မတအား ပေးထားသကဲ့သို့ ရုရှား-ယူကရိန်းစစ်ပွဲနှင့်ပတ်သက်၍ ငြိမ်းချမ်းရေးသဘောတူညီချက် ရရှိလာပါက ပိတ်ဆို့အရေးယူမှုများ ရပ်ဆိုင်းနိုင်သည့် လုပ်ပိုင်ခွင့်လည်း ထည့်သွင်းထားသည်။

တစ်ချိန်တည်းတွင် အီရန်နိုင်ငံအပေါ် ပိတ်ဆို့အရေးယူမှုဆိုင်ရာ လက်ရှိအမေရိကန်ဥပဒေ၏ သက်တမ်းကိုလည်း နောက်ထပ် ငါးနှစ် တိုးမြှင့်ထားကြောင်း သိရသည်။

Ref: White House / U.S. Senate