ရုရှားက ဟိုက်ပါဆောနစ်ဒုံးကျည် ထုတ်သုံးလာ၍ နေတိုးနှင့် ယူကရိန်း အရေးပေါ်အစည်းအဝေးလုပ်မည်

စစ်ပွဲ က ၃၃ လနီးပါးအကြာတွင် စစ်ရှိန်ပိုမြင့်စေခဲ့သည့် ယူကရိန်း၏ အလယ်ပိုင်းမြို့တစ်မြို့ကို ရုရှားက စမ်းသပ်ဆဲ အသံထက်မြန်သော ဟိုက်ပါဆောနစ်ဒုံးကျည်သုံး တိုက်ခိုက်လာမှုကြောင့် နေတိုးအဖွဲ့နှင့် ယူကရိန်းတို့အကြား အင်္ဂါနေ့(နိုဝင်ဘာ ၂၆) တွင် အရေးပေါ် ဆွေးနွေးမှုလုပ်သွားမည်ဖြစ်သည်။

ပဋိပက္ခသည် “အဆုံးအဖြတ်အဆင့်သို့ ရောက်ရှိလာပြီ” ဟု ပိုလန်နိုင်ငံဝန်ကြီးချုပ် ဒေါ်နယ်တပ်စ်က သောကြာနေ့တွင် ပြောကြားလိုက်ပြီး “အလွန်စိတ်လှုပ်ရှားစရာ အနေအထားများပေါ်ပေါက်နေပြီ” ဟုလည်း ဆိုခဲ့သည်။

ကြာသပတေးနေ့တွင် ရုရှားက ဒီနီပရိုမြို့ရှိ စစ်ဘက်အဆောက်အအုံကို တိုက်ခိုက်ခဲ့ပြီးနောက် လုံခြုံရေးတင်းကျပ်ထားရသဖြင့် ယူကရိန်း၏ ပါလီမန်အစည်းအဝေးကို ဖျက်သိမ်းလိုက်ရသည်။

နိုင်ငံတော်ရုပ်သံမိန့်ခွန်းတွင် အနောက်နိုင်ငံများအပေါ် ပြတ်သားသော သတိပေးမှုအနေဖြင့် တာလတ်ပစ် Oreshnik ဒုံးကျည်သုံး တိုက်ခိုက်ခဲ့မှုသည် ကိဗ်က ရုရှားပိုင်နက်အတွင်းပိုင်းအထိ ရောက်ရှိနိုင်သည့် အမေရိကနှင့် ဗြိတိန်တို့ပံ့ပိုးသော တာဝေးပစ်ဒုံးကျည်များသုံး၍ တိုက်ခိုက်ခဲ့ခြင်းအား လက်တုန့်ပြန်မှုဖြစ်သည်ဟု သမ္မတ ဗလာဒီမာ ပူတင်က ပြောဆိုသွားခဲ့သည်။

ယင်း ဒုံးကျည်အသစ်များကို အနောက်နိုင်ငံများ၏ လေကြောင်းကာကွယ်ရေးစနစ်များက တာဆီးနိုင်သည့် အစွမ်းအစမရှိဟုလည်း ပူတင်က ပြောဆိုခဲ့သည်။

ဒီနီပရိုကို ပစ်ခတ်ခဲ့သော ဒုံးကျည်သည် Mach 11 မြန်နှုန်း(တစ်နာရီ ကီလိုမီတာ ၁၃၀၀၀ ကျော်သော အမြန်နှုန်း) ဖြင့် ပျံသန်းခဲ့ပြီး နျူကလီးယားမဟုတ်သော ထိပ်ဖူးခြောက်ခုကို သယ်ဆောင်ခဲ့ကာ ဆင့်ပွားကျည်ခြောက်လုံး ထုတ်လွှတ်ခဲ့သည်ဟု ယူကရိန်းစစ်တပ်အရာရှိများက ပြောဆိုသည်။

သောကြနေ့က စစ်ဘက်နှင့် လက်နက်လုပ်ငန်းဆိုင်ရာ အရာရှိများနှင့် တွေ့ဆုံပြောဆိုခဲ့မှုအတွင်း ရုရှားသည် Oreshnik ဒုံးကျည်များကို စတင်ထုတ်လုပ်နေပြီဟု ပူတင်က ပြောဆိုခဲ့သည်။

ကမ္ဘာပေါ်တွင် ယင်းသို့လက်နက်မျိုး မည်သည့်နိုင်ငံမှ မရှိသေးဟု ပူတင်က ပြုံးစစမျက်နှာပေးဖြင့် ပြောဆိုခဲ့ပြီး အခြားနိုင်ငံများသည်လည်း အနှေးနှင့်အမြန် ယင်းလက်နက်များရရှိနိုင်ကြောင်းနှင့် ထုတ်လုပ်ဆဲအနေအထားကို ရောက်ရှိနေပြီဟု မိမိတို့သိထားကြောင်း ဆိုခဲ့သည်။

သို့သော်လည်း ယင်းလက်နက်စနစ်မိမိတို့တွင် ရှိနေပြီဖြစ်ကာ ယင်းအချက်သည် အရေးကြီးသည်ဟု သူက ဆက်လက် ပြောကြားသွားခဲ့သည်။

Ref: အေပီ