ရန်ကုန်တိုင်းဒေသကြီးအတွင်း မော်တော်ယာဉ် မတော်တဆမှု ဖြစ်စဉ်များတွင် အရေးပေါ် ကယ်ဆယ်ရေး လုပ်ငန်းများ ထိရောက်စွာ ဆောင်ရွက်နိုင်ရန် ရည်ရွယ်၍ ကယ်ဆယ်ရေးသင်တန်းအား မြန်မာနိုင်ငံမီးသတ်တပ်ဖွဲ့ဌာနချုပ်မှ သင်ကြားပေးလျက်ရှိကြောင်း သိရသည်။
အဆိုပါ သင်တန်းဖွင့်ပွဲကို မရမ်းကုန်းမြို့နယ်၊ မြန်မာနိုင်ငံမီးသတ်တပ်ဖွဲ့ဌာနချုပ်၊ သီတာခန်းမ၌ မော်တော်ယာဉ် မတော်တဆမှု ဖြစ်စဉ် ကယ်ဆယ်ရေးသင်တန်း (Road Traffic Accident Vehicle Extrication) ကို ဖေဖော်ဝါရီ (၁၇) ရက် နံနက်ပိုင်းက ကျင်းပခဲ့ခြင်းဖြစ်သည်။
အဆိုပါ သင်တန်း၌ နိုင်ငံတော်အတွင်း မော်တော်ယာဉ်သုံးစွဲမှု များပြားလာသည်နှင့်အမျှ နေ့စဉ် ဖြစ်ပွားလျက်ရှိသည့် ယာဉ်မတော်တဆမှု ဖြစ်စဉ်များတွင် မီးသတ်တပ်ဖွဲ့ဝင်များက အရေးပေါ် ကယ်ဆယ်ရေး လုပ်ငန်းများ ထိရောက်စွာ လုပ်ဆောင်နိုင်ရန် ရည်ရွယ် ဖွင့်လှစ်ခဲ့ခြင်းဖြစ်ကြောင်း သိရသည်။
၎င်း သင်တန်းသို့ မြန်မာနိုင်ငံမီးသတ်တပ်ဖွဲ့ဌာနချုပ် ရှာဖွေကယ်ဆယ်ရေးအထူးအဖွဲ့မှ သင်တန်းသား (၁၅)ဦး၊ ရန်ကုန်တိုင်းဒေသကြီး မီးသတ်တပ်ဖွဲ့ဝင် (၃၅)ဦး စုစုပေါင်း(၅၀)ဦးကို စာတွေ့ လက်တွေ့ သင်ကြားပေးမည်ဖြစ်ပြီး သင်တန်းကာလမှာ ဖေဖော်ဝါရီ (၁၇) ရက်မှ ဖေဖော်ဝါရီ (၂၈) ရက်အထိ ရက်သတ္တပတ် (၂)ပတ်ကြာ သင်ကြားပို့ချသွားမည်ဖြစ်ကြောင်း သိရသည်။
အဆိုပါ အခမ်းအနားသို့ မီးသတ်ဦးစီးဌာန ဒုတိယညွှန်ကြားရေးမှူးချုပ် ဦးရဲမင်းသူမှ တက်ရောက် အမှာစကားပြောကြားခဲ့ပြီး မြန်မာနိုင်ငံမီးသတ်တပ်ဖွဲ့ဌာနချုပ်မှ အရာရှိကြီးများ၊ ရန်ကုန်တိုင်းဒေသကြီး မီးသတ်ဦးစီးမှူးနှင့် အရာရှိများ၊ သင်တန်းနည်းပြများ၊ ဖိတ်ကြားထားသည့် ဧည့်သည်တော်များ တက်ရောက်ခဲ့ကြကြောင်း သိရသည်။