ရန်ကုန်မြို့၊ ဒဂုံမြို့နယ်၊ မြို့မကျောင်းလမ်းရှိ အမျိုးသားဇာတ်ရုံတွင် ဟိန္ဒူဘာသာဝင်များ၏ ဒီပါဝလီအထိမ်းအမှတ်အခမ်းအနားကို ယနေ့ အောက်တိုဘာ ၁၇ ရက်ညနေပိုင်းကကျင်းပရာ မြန်မာနိုင်ငံတော် ယာယီသမ္မတ ဗိုလ်ချုပ်မှူးကြီး နိုင်ငံတော်လုံခြုံရေးနှင့်အေးချမ်းသာယာရေးကော်မရှင်ဥက္ကဋ္ဌ၊ ဗိုလ်ချုပ်မှူးကြီးမင်းအောင်လှိုင်နှင့် ဇနီးတို့တက်ရောက်ခဲ့ကြောင်း သိရသည်။
မြန်မာနိုင်ငံတော်ယာယီသမ္မတနှင့် ဇနီးတို့သည် ဟိန္ဒူရိုးရာဆီမီးနံ့သာ၊ ဟိန္ဒူရိုးရာ မွန်မြတ်ပြီးမင်္ဂလာရှိသော Pur Kumbham (ပုရ်ဏကုမ္ဘမ်)ဖြင့်ဆုတောင်းကြိုဆိုမှုတို့ကိုခံယူပြီးနောက် ယာယီသမ္မတက ဒီပါဝလီအထိမ်း အမှတ်အခမ်းအနားကို စက်ခလုပ်နှိပ်ဖွင့်လှစ်ပေးပြီး မြန်မာ-အိန္ဒိယနှစ်နိုင်ငံချစ်ကြည်ရေးပြခန်းများ၊ စီးပွားရေးလုပ်ငန်းပြခန်းများနှင့် မျိုးနွယ်စုများ၏ပြခန်းများကိုကြည့်ရှုပြီးနောက် ဒီပါဝလီအထိမ်းအမှတ် ဆီမီးထွန်းညှိပေးခဲ့ကြကြောင်း သိရသည်။
ထို့နောက် ယာယီသမ္မတမှ နိုင်ငံအတွင်းမှီတင်းနေထိုင်ကြသူများ၏ ဘာသာရေးဆိုင်ရာယုံကြည်ကိုးကွယ်မှုနှင့်ပတ်သက်၍ တူညီသည့်အခွင့်အရေးများနှင့် လွတ်လပ်စွာယုံကြည်ကိုးကွယ်ခွင့်ကို ဖွဲ့စည်းပုံအခြေခံဥပဒေနှင့်အညီ ခွင့်ပြုပေးထားပြီးဖြစ်ရာ ကိုးကွယ်ယုံကြည်ရာ ဘာသာတရားအလျောက် ဘာသာရေးပွဲတော်များကို အနှစ်သာရရှိရှိကျင်းပကြရန် အလွန်အရေးကြီးသည်ဟု ပြောကြားသည်။
ထို့အတူ မတူကွဲပြားသည့် သဘာသာဝင်များကြား မေတ္တာ၊ ကရုဏာ၊ မုဒိတာ၊ ဥပေက္ခာဆိုသည့် ဗြဟ္မစိုရ်တ ရား(၄)ပါးကိုလက်ကိုင်ထားပြီး သင့်မြတ်စွာစုစည်းနေထိုင်ရန်၊ ဘာသာပေါင်းစုံ စုစည်းညီညွတ်စွာနေထိုင်နိုင်ရေးအတွက်အခြေခံမူများဖြစ်သည့် ဘာသာပေါင်းစုံမှဘာသာဝင်များအချင်းချင်းအပြန်အလှန်လေးစားပြီး အတူတကွအေးချမ်းစွာနေထိုင်ရန်၊ ဘာသာရေး၊ လူမှုရေးပဋိပက္ခများကြောင့် ဒုက္ခရောက်နေသူများကိုကူညီစောင့်ရှောက်ရန်၊ ဘာသာရေးနှင့်ဆက်နွှယ်သည့် နစ်နာမှုများရှိလာပါက ဥပဒေနှင့်အညီညှိနှိုင်းဆောင်ရွက်ရန်အခြေခံမူများကို ချမှတ်ထားသည်ဟုလည်း ပြောကြားခဲ့သည်။
” မြန်မာနိုင်ငံကပိုင်ဆိုင်တဲ့ ဒီမြေ၊ ဒီရေ၊ ဒီလေကိုတူညီစွာသုံးစွဲနေထိုင်ကြတဲ့ မည်သည့်လူမျိုး၊ မည်သည့်ဘာသာဝင်ပင်ဖြစ်ပါစေ ပြည်ထောင်စုစိတ်ဓာတ်မွေးမြူပြီး နေထိုင်ကြဖို့ အဲဒီစိတ်ဓာတ်ကိုအခြေခံပြီး အပြန်အလှန် ချစ်ကြည်ရင်းနှီးမှုတွေကတစ်ဆင့် မြန်မာနိုင်ငံရဲ့အကျိုးကို ဝိုင်းဝန်းသယ်ပိုးကြဖို့လိုပါတယ်”ဟု ယာယီသမ္မတက မှာကြားသည်။
ထို့နောက် ယာယီသမ္မတနှင့် ဇနီး၊ တက်ရောက်လာကြသူများက မြန်မာ-အိန္ဒိယ ရိုးရာယဉ်ကျေးမှုအကအဖွဲ့၊ ဟိန္ဒူရိုးရာယဉ်ကျေးမှုအကအဖွဲ့နှင့် အမျိုးသားယဉ်ကျေးမှုနှင့် အနုပညာတက္ကသိုလ်(ရန်ကုန်)မှ ယဉ်ကျေးမှုအဖွဲ့တို့၏ ဟိန္ဒူရိုးရာယဉ်ကျေးမှုအကများ၊ လူမျိုးစုများ၏ ရိုးရာအကများ၊ မြန်မာရိုးရာအကများဖြင့် ဖျော်ဖြေမှုများကိုကြည့်ရှုအားပေးပြီး ယဉ်ကျေးမှုအဖွဲ့များအား အမှတ်တရဂုဏ်ပြုပန်းခြင်းပေးအပ်ချီးမြှင့်ပြီး ဟိန္ဒူမျိုးနွယ်စုများ၊ ဟိန္ဒူရိုးရာယဉ်ကျေးမှုအဖွဲ့များအားရင်းရင်းနှီးနှီးနှုတ်ဆက်ခဲ့ကြောင်း သိရသည်။