ရန်ကုန် – ပုဂံ – ရန်ကုန် တိုက်ရိုက် အမြန်ရထားခရီးစဉ်ကို ပြန်လည်ပြေးဆွဲပေးနေပြီဖြစ်ပြီး မှောင်ခိုဈေးဖြင့် လက်မှတ်ဝယ်ယူရမှုများ ရှိနေကြောင်း ခရီးသွားပြည်သူများထံမှ စုံစမ်းသိရှိရသည်။
ယင်းကဲ့သို့ မှောင်ခိုရောင်းချမှုများကို သက်ဆိုင်ရာတာဝန်ရှိသူများထံ အသိပေးတိုင်ကြားနိုင်ကြောင်းလည်း မြန်မာ့မီးရထား (အောက်မြန်မာပြည်) ရုံးမှ တာဝန်ရှိသူက ပြောကြားထားသည်။
မြန်မာ့မီးရထားမှ သတ်မှတ်ထားသည့် ရန်ကုန် – ပုဂံ ရထားလက်မှတ်ခနှုန်းထားများမှာ ရိုးရိုးတန်း ၇၂၀၀ ကျပ် ၊အထက်တန်း ၁၄၄၀၀ ကျပ် ၊ အိပ်စင် ၁၉၈၀၀ ကျပ်ဖြစ်ပြီး အမှန်တကယ်ဝယ်ယူရသည့် ဈေးနှုန်းမှာ ရိုးရိုးတန်း ၈၅၀၀ ကျပ် ၊ အထက်တန်း ၁၆၀၀၀ ကျပ်၊ အိပ်စင် ၂၂၀၀၀ ကျပ်ဖြစ်သည်။
“ကျွန်တော်တို့က ကြိုတင်လက်မှတ် ဝယ်ယူတာပေါ့။ ဒါပေမဲ့ သူတို့ထုတ်ပြန်ထားတဲ့ဈေးနဲ့က ကွာခြားမှုတွေရှိနေတယ်။ အစောကြီးထပြီး တန်းသွားစီလည်း လက်မှတ်က မရဘူး။ အပြင်က မှောင်ခိုရောင်းတယ့်သူက ပိုများနေတယ်”ဟု ရန်ကုန်မှ ပုဂံသို့ သွားမည့်ခရီးသည်တစ်ဦးက ပြောသည်။
ရန်ကုန် – ပုဂံ ရထားခရီးစဉ်သည် ရန်ကုန်မှ ညနေ ၄ နာရီ ၁၅ မိနစ် တွင် ထွက်ခွာမည်ဖြစ်ပြီး ပုဂံသို့ နေ့လည် ၁၂ နာရီရောက်ရှိမည်ဖြစ်ကာ ပုဂံမှ ညနေ ၄ နာရီ ၁၅ မိနစ်အချိန်တွင်ထွက်ခွာမည်ဖြစ်ပြီး ရန်ကုန်သို့ နေ့လည် ၁၂ နာရီပြန်လည်ရောက်ရှိမည်ဖြစ်ကြောင်း သိရသည်။
“လက်မှတ်ဈေးပိုပေးရတယ်ဆိုရင် တိုင်လို့ရတယ်။ တချို့ကကျတော့ လက်မှတ်မတန်းစီချင်လို့ အပြင်လူတွေနဲ့ဝယ်ကြတာ။ အဲဒီတော့မှ ဈေးပိုပေးပြီးဝယ်ရတယ်လို့ပြောကြတာပေါ့။ တစ်ကယ်လက်မှတ်မရဘူး၊ မှောင်ခိုဝယ်နေရတယ်ဆိုရင် တိုင်လို့ရပါတယ်”ဟု မြန်မာ့မီးရထား (အောက်မြန်မာပြည်)မှ တာဝန်ရှိသူတစ်ဦးက ပြောသည်။
ရန်ကုန် – ပုဂံ ရထား၏ ခုတ်မောင်းချိန် မှာ ၁၉နာရီ ၄၅ မိနစ် ကြာမြင့်မည်ဖြစ်ပြီး ခရီးစဉ်အတွင်း ရပ်တန့်ပေးမည့်ဘူတာများမှာ သာယာဝတီ၊ လက်ပံတန်း၊ မင်းလှ ၊ အုတ်ဖို ၊ ကြို့ ပင်ကောက် ၊ ဇီးကုန်း၊ နတ္တလင်း၊ ပေါင်းတည်၊ ပုတီးကုန်းသဲကုန်း ၊ ဆင်မြီးဆွဲ၊ ပြည် ( ရွှေတံခါး)၊ အောင်လံ၊ ဆတ်သွား ၊ တောင်းတွင်းကြီး ၊ မြို့သစ်၊ နတ်မောက် ၊ လေးအိမ်၊ သာမြား၊ ပင်းချောင်း၊ ကျောက်ပန်းတောင်း ငါ့မင်းမေး ၊စုတည် ဘူတာများတွင် ရပ်တန့်ပေးမည်ဖြစ်သည်။